މިއަހަރުގެ ޖެނުއަރީ މަަހު ގދ. ތިނަދޫ އިންޖީނުގެ އަނދައިހުލިވި ހާދިސާއަށްފަހު، އެރަށުގައި އިމާރާތްކުރަމުންދާ އާ އިންޖީނުގޭގެ މަސައްކަތް ހުއްޓިފައިވަނީ މަސައްކަތް ހަވާލުކޮށްފައިވާ ކުންފުންޏަށް އެޑްވާންސް ޕޭމެންޓް ދެއްކުމުގައި ދަތިތަކެއް ދިމާވުމުން ކަމަށް ފެނަކަ ކޯޕަރޭޝަނުން ބުނެފި އެވެ.
ފެނަކައިގެ މެނޭޖިން ޑިރެކްޓަރު އަޙްމަދު ޝަރީފް އިއްޔެ ވިދާޅުވީ، ތިނަދޫ އިންޖީނުގޭގެ މަސައްކަތް ހަވާލުކޮށްފައިވާ ސްރީ ލަންކާ ކުންފުންޏެއް ކަމަށްވާ، އެޑްވާންސް ސްޓީލް ސްޓަރަކްޗަރު ޕްރައިވެޓް ލިމިޓެޑަށް އެޑްވާންސްޑް ޕޭމެންޓް ދައްކަން ޖެހެނީ ޑޮލަރުން ކަމަށާއި، ނަމަވެސް ޑޮލަރު ލިބުމުގެ ދަތިކަން ކުރިމަތިވެފައިވާ ކަމަށެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު އަޙްމަދު ޝަރީފް: އޭނާ ވިދާޅުވީ ގދ. ތިނަދޫގެ އާ އިންޖީނުގޭގެ މަސައްކަތް ހުއްޓިފައިވަނީ މަސައްކަތް ހަވާލުކޮށްފައިވާ ކުންފުންޏަށް އެޑްވާންސް ޕޭމެންޓް ދެއްކުމުގައި ދަތިތަކެއް ދިމާވުމުން ކަމަށް --- ސަން ފޮޓޯ/ އިޙްތިޝާމް މުހައްމަދު
އޭނާ ވިދާޅުވީ، އެ މަސައްކަތް ހަވާލު ކޮށްފައިވާ ކުންފުންޏާ އެކު ބައްދަލުވުމެއް ބާއްވާފައިވާ ކަމަށެވެ. އެ ބައްދަލުވުމުގައި އެ މައްސަލަ ހައްލުކުރެވޭނެ ގޮތްތައް ހޯދައި ދިވެހި ރުފިޔާއިން އެޑްވާންސް ޕޭމެންޓް ދައްކައިފި ނަމަ އެ މަސައްކަތް ފެށިދާނެތޯ އެބޭފުޅުންނާ ވާހަކަ ދައްކާފައިވާ ކަމަށެވެ.
ޝަރީފް ވިދާޅުވީ، އެބޭފުޅުން އަދި ވަކި ޖަވާބެއް ނުދެއްވާ ކަމަށާއި، ނަމަވެސް ޕޭމެންޓް ޝެޑިއުލް ކުރުމާއެކު އިންޖީނުގޭގެ މަސައްކަތް ފަށައި، ދީފައިވާ މުއްދަތުގެ ތެރޭގައި ނިންމާނެ ކަމުގެ ޔަގީންކަން ދީފައިވާ ކަމަށެވެ.
އެ ކުންފުންޏާ ތިނަދޫ އިންޖީނުގޭގެ މަސައްކަތް ހަވާލުކޮށްފައިވަނީ 11 މިލިއަން ރުފިޔާއަށް 153 ދުވަސް ތެރޭގައި ނިންމުމަށެވެ.
ތިނަދޫ އިންޖީނު ގޭގައި އަލިފާން ރޯވެފައި ވަނީ މިއަހަރުގެ ޖެނުއަރީ މަހުގެ 25 ވަނަ ދުވަހުގެ ރޭ ދަންވަރުގެ ވަގުތެއްގައެވެ. އެ ހާދިސާގައި އިންޖީނުގޭގައި ހުރި ހުރިހާ އިންޖީނެއް ބޭނުން ނުކުރެވޭ ވަރަށް ވަނީ އަނދައިފައެވެ. އެ ހާދިސާގެ ސަބަބުން ތިނަދުއަށް ކަރަންޓު ލިބުނީ ފަސް ދުވަސް ފަހުންނެވެ.