ޒައީމް ޑީއާރްޕީގެ ނަމުގައި ހިންގާ ހަރަކާތަކީ މައުމޫން ވެރިކަމަށް ވަޑައިގަތުމަށް ފައްޓަވާފައިވާ ކެމްޕޭނެއް: ޑީއާރްޕީ

ވަކި ފެކްޝަނެއް ހަދައި، ޒައީމް ޑީއާރްޕީގެ ނަމުގައި ހިންގާ ހަރަކާތަކީ އަލްއުސްތާޒު މައުމޫން އަބްދުލް ގައްޔޫމް، އަނބުރި ރާއްޖޭގެ ވެރިކަމަށް ވަޑައިގަތުމަށް ފައްޓަވާފައިވާ ކެންޕޭނެއް ކަމަށް ޑީއާރްޕީން ބުނެފި އެވެ.

މައުމޫން ސިޔާސީ މައިދާނުން ވަކިވެ ވަޑައިގެންނެވިކަން އިއުލާން ކުރެއްވެވީ 25 ޖެނުއަރީ 2010 ގަ އެވެ.

".... ޕާޓީ އިސްލާހު ކުރުމުގެ ނަމުގައި ޕާޓީގެ ޝަރަފުވެރި މަޤާމެއްގައި ހުންނެވި ކުރީގެ ރައީސް އަލްއުސްތާޒު މައުމޫން އަބްދުލް ގައްޔޫމް އިސްވެ ހުންނަވައިގެން ޙަރަކާތްތެރިވަމުން އަންނަ ޒަޢީމް-ޑީއާރްޕީގެ ހަގީގީ ބޭނުމާއި މަގްސަދު ދިވެހި ހުރިހާ ރައްޔިތުންނަށް ސާފުކޮށް މިއަދުވަނީ އެނގިފަ އެވެ. މިހަރަކާތަކީ އަލްއުސްތާޒު މައުމޫން އަބްދުލް ގައްޔޫމް، ސިޔާސީ މައިދާނުން ވަކިވެ ވަޑައިގަތް ކަމަށްވިދާޅުވި ނަމަވެސް އަނބުރާ ސިޔާސީ މައިދާނަށް، ދިވެހި ރާއްޖޭގެ ވެރިކަމަށް ވަޑައިގަތުމަށް ޓަކައި ފަށާފައިވާ ކެންޕޭނެކެވެ." ޑީއާރްޕީން ނެރުނު ބަޔާނުގައި ވެއެވެ.

ދިވެހި ރައްޔިތުންގެ ޕާޓީ ރޫޅާލައި ފުނޑުފުނޑު ކޮއްލުމަށް މައުމޫން ފަސްޖެހި ވަޑައި ނުގަންނަވާނެކަން އަމަލާއި ބަހުން ހާމަވަމުންދާ ކަމަށާއި ޕާޓީގެ މަސްލަހަތު ނަގާލައި ޕާޓީ ބައިބައި ކޮށްލުމަށް ހިންގަމުން ގެންދާ މި ޢަމަލުތައް ވަރަށް ހަރުކަށި އިބާރާތުން ކުށްވެރި ކުރާ ކަމަށްވެސް އެ ބަޔާނުގައި ވެއެވެ.

ބާނުގައި ބުނަނީ 2010ގައި ބޭއްވި އެ ޕާޓީގެ ޤައުމީ ޖަލްސާގެ މަންދޫބުން ޕާޓީގެ އެކި މަޤާމުތަކަށް މެމްބަރުން އިންތިޚާބު ކޮއްފައިވާ ކަމަށެވެ. ނަމަވެސް މިހާރު އިވޭ އަޑުތަކާއި އެކިއެކި ކަންކަމާއި ގުޅޭގޮތުން ވަރަށް ފުޅާ ދާއިރާއެއްގައި ބަހުސް ކުރެވި، އެ ބަހުސްތަކުގެ ނަތީއްޖާއިން އަސާސީ ގަވާއިދަށް އިސްލާހު ހުށަހެޅި، ޤައުމީ ޖަލްސާގެ ބައިވެރިވި މަންދޫބުން ވޯޓު ދީފައިވާ ކަމަށެވެ. އެ ވޯޓުގެ ނަތީއްޖާ އިން ނިމުނު ގޮތަށް އަސާސީ ޤަވާއިދު އަޢުލަބިއްޔަތުން އިސްލާހުކޮށް ފާސްކޮށްފައިވާ ކަމަށެވެ.

ޑީއާރްޕީގެ ބަޔާން ބުނާ ގޮތުން މިހާރު މިފެންނަ މަންޒަރަކީ ޕާޓީގެ ޑިމޮކްރެޓިކް ނިންމުންތަކާ ޚިލާފަށް ޕާޓީގެ ބައެއް މެންބަރުން އަމިއްލަ މަސްލަހަތު ކުރިއެރުވުމުގެ ނިޔަތުގައި ވަކި ފެކްޝަނެއް ހަދައި އުޅޭ އުޅުމެއް ކަމަށެވެ.

"... ތަފާތު ޚިޔާލު ގެންގުޅުމަކީ ޑިމޮކްރަސީގައި މުހިންމުކަމެއް ކަމުގައިވިޔަސް އަޢުލަބިއްޔަތުގެ ނިންމުމަށް އިޙްތިރާމްކުރުމަކީ ޑިމޮކްރަސީގެ މައިގަނޑު އާސާސް އެވެ. އެހެންކަމުން ޕާޓީގެ ޤައުމީ ޖަލްސާގެ ނިންމުން ތަކަށް ގޮންޖަހާ ވަކި މީހެއްގެ މަސްލަހަތު ދެމެހެއްޓުމަށްޓަކައި ހިންގާ ހަރަކާތަކީ ޕާޓީގެ އާންމު މަސްލަހަތާއި ފުށުއަރާ ޑިމޮކްރަސީއާއި ވެސް ޚިލާފު އަމަލުތަކެކެވެ. އަދި ދިވެހި ރައްޔިތުންގެ ޕާޓީގެ އަސާސީ ގަވާއިދަށް ގޮންޖަހާ، ޕާޓީގެ ލީޑަ ޝިޕް ބަލިކަށިކުރުމެގެ ނިޔަތުގައި މުޅި ދިވެހި ރައްޔިތުންގެ ޕާޓީގެ މެމްބަރުންނަށް ދެވޭ ނިކަމެތިކަމެކެވެ،"