ޑީއާރުޕީގެ ގައުމީ މަޖިލީހުގެ ޖަލްސާއަކަށް ނުސީދާކޮށް ޒައީމު މައުމޫން ގޮވައިލައްވައިފި

ޑީއާރްޕީ އެތެރޭގައި އުފެދިފައިވާ މައްސަލަތައް ހައްލު ކުރެވޭނީ ޕާޓީގެ އެންމެ މަތީ ގުނަވަން ކަމުގައިވާ ގައުމީ މަޖިލީހުގެ ޖަލްސާއެއް ބާއްވައިގެން ކަމަށް އާންމު މެންބަރުންނަށް ފެންނަ ނަމަ، އެ ކަމަށް ތާއިދު ކުރައްވާނެ ކަމަށް ޑީއާރްޕީގެ ޒައީމް އަލްއުސްތާޒު މައުމޫން ބައްދުލް ގައްޔޫމް ވިދާޅުވެއްޖެ އެވެ.

ޑީއާރްޕީގެ އެތެރޭގައި އުފެދިގެން އުޅޭ މައްސަލަތައް ހައްލު ކުރުމަށް ކުރެއްވި މަސައްކަތްޕުޅުތަކާ ބެހޭ ގޮތުން ވީ ޓީވީ އާއި ދި ޓީވީ މެދުވެރިކޮށް ރައީސް މައުމޫން ދެއްވި ޚިތާބެއްގައި މިއަދު ވިދާޅުވީ ޕާޓީގެ މައްސަލަތައް ހައްލު ކުރެވޭނީ އަވަސް މުއްދަތެއްގެ ތެރޭގައި ގައުމީ ޖަލްސާއެއް ބޭއްވުން ކަމަށް އާންމު މެންބަރުންނަށް ފެންނަ ނަމަ، އެކަމަށް އެމަނިކުފާނުގެ ތާއިދު ދެއްވާނެ ކަމަށާއި އަދި ގައުމީ ޖަލްސާ ބާއްވަން ޖެހޭނީ އިތުބާރު ހުރި ގާބިލް ބައެއްގެ މައްޗަށް އެކުލެވޭ ކޮމެޓީއެއްގެ ބެލުމުގެ ދަށުން ކަމަށެވެ.



"ތިޔަ ބޭފުޅުންނަށް ފެނިވަޑައިގަންނަވާ ގޮތުގައި، މިވަގުތު ޕާޓީ އަށް ދިމާވެފައިވާ މައްސަލަތައް ހައްލު ކުރެވޭނެ އެންމެ ރަނގަޅު ގޮތަކީ އަވަސް މުއްދަތެއްގެ ތެރޭގައި ޕާޓީގެ ގައުމީ ޖަލްސާއެއް ބޭއްވުން ކަމަށް ވަނީ ނަމަ އެކަމަށް ވެސް އަޅުގަނޑުގެ ފުރިހަމަ ތާއިދު އޮންނާނެ ކަމުގައި ދަންނަވަން. އެހެންނަމަވެސް ޕާޓީގެ ގައުމީ ޖަލްސާއެއް ބާއްވަން ޖެހޭނީ އިތުބާރު ހުރި ގާބިލް ބޭފުޅުންގެ މައްޗަށް އެކުލަވާލެވޭ ސިދާ ބެއްލެވުމުގެ ދަށުން ހުރިހައި ކަމެއް ހަމަޖައްސައިގެން. ގައުމީ ޖަލްސާގައި ބައިވެރިވެ ވަޑައިގަންނަވަންވާނީ ވެސް މި ކޮމެޓީގެ ބެއްލެވުމުގެ ދަށުން ބާއްވާ މިނިވަން އިންސާފުވެރި އިންތިހާބަކުން ހޮވޭ ބޭފުޅުން،" ޒައީމް މައުމޫން މިއަދު ވިދާޅުވި އެވެ.

އެމަނިކުފާނު ވިދާޅުވީ ޕާޓީގެ އެތެރޭގެ މައްސަލަތައް ހައްލު ކުރުމަށް ފާއިތުވެދިޔަ ނުވަ މަސް ދުވަހުގެ ތެރޭގައި ބުރަ މަސައްކަތްތަކެއް ކުރެއްވި ކަމަށާއި އެ މަސައްކަތަކަށް ގިނަ ބައެއްގެ އެއްބާރުލުން ލިބުނު ކަމަށެވެ. އަދި އެ މައްސައްކަތަށް އެއްބާރުލުން ނުދެއްވައި އެމަނިކުފާނަށް ރައްދު ދެއްވި އެކި ބޭފުޅުންނަށް އެއްވެސް އެއްޗެއް ވިދާޅުވަން ބޭނުންނުވާ ކަމަށް ވިދާޅުވި އެވެ.

ޒައީމް މައުމޫން ވިދާޅުވީ ޕާޓީގެ މަޖިލިސް މެންބަރުނާއި ކައުންސިލް މެންބަރުން ޕާޓީ ދޫކުރައްވައި ވަޑައިގަންނަވާ އަޑު އިވުމާ އެކު އެ ބޭފުޅުންނަށް ގުޅައި ނަސޭހަތް ތެރިވި ކަމަށެވެ. ނަމަވެސް އެ ބޭފުޅުން އެ ނަސޭހަތް ގަބޫލު ނުކެރެއްވުމަކީ އެމަނިކުފާނު ހިތާމަ ކުރައްވާ ކަމެއް ކަމަށް ވިދާޅުވި އެވެ.

"އެއްވެސް މެންބަރަކު ވަކިވެވަޑައިގަންނަވަން އުޅުއްވާކަމުގެ ޚަބަރު އަޅުގަނޑަށް ލިބިއްޖެ ނަމަ ވަގުތުން އަޅުގަނޑު އެ ބޭފުޅަކާ ގުޅާ އެހެން ނެހެއްދެވުމަށް ވަރަށް ބޮޑަށް ނަސޭހަތްތެރިވެ، ބާރުއަޅާފައިވާނެ. އެހެން ނަމަވެސް އަޅުގަނޑުގެ ނަސޭހަތް ގަބޫލު ނުކުރައްވައި އަދި ޕާޓީގެ ޒައީމްގެ ހައިސިއްޔަތުން އަޅުގަނޑު ސޮއިކޮށްފައި ދިން ޑީއާރްޕީ ޓިކެޓްގައި ރައްޔިތުންގެ މަޖިލީހުގެ އިންތިހާބުގައި ވާދަކުރައްވައި އަދި ޑީއާރްޕީގެ މެންބަރުނާއި ޕާޓީ އަށް ތާއީދު ކުރައްވާ އާންމު ރައްޔިތުންގެ ވޯޓުން ހޮވިވަޑައިގެންނެވި މެންބަރުން އެކަން ހަނދުމަފުޅު ނައްތަވާލެއްވުމަކީ ވަރަށް ދެރަކަމެއް،" ޑީއާރްޕީގެ ޓިކެޓްގައި މަޖިލީހުގެ ގޮނޑި ކާމިޔާބު ކުރެއްވި ތޮއްޑޫ ދާއިރާގެ އަލީ ވަހީދާއި މާފަންނު ހުނޅަގު ދާއިރާގެ މެންބަރު އަބްދުﷲ އަބްދު ރަހީމް ޕާޓީ ދޫކުރައްވައި ވަޑައިގެންނެވުމާ ގުޅިގެން މައުމޫން މިއަދު ވިދާޅުވި އެވެ.

އެމަނިކުފާނު ވިދާޅުވީ ޑީއާރްޕީ ހިގަންވާނީ ދިމުގުރާތީ އުސޫލާއި އެ ޕާޓީގެ އަސާސީ ގަވާއިދުގެ އިތުރުން ޕާޓީގެ އާންމު މެންބަރުން ބޭނުންވާ އުސޫލާ އެތްގޮތަށް ކަމަށެވެ. އަދި އިދިކޮޅު ޕާޓީއެއްގެ ގޮތުގައި ޑީއާރްޕީ އަލުން ހައްދަވައި ދެއްވުމަށް އެދި މައުމޫންގެ ޚިތާބު ނިންމަވާލައްވަމުން ވިދާޅުވީ "ރައްޔިތުންގެ ހައްގުގައި އަޑު އުފުލައި ދީނާއި ގައުމަށްޓަކާ ވާންޖެހުނު ކޮންމެ ގުރުބާނީއެއް ވަމުންދާ ވަރުގަދަ" ޕާޓީ އަށް ޑީއާރްޕީ ހަދައިދިނުމަށް އާންމު މެންބަރުންގެ ކިބައިން އެދިވަޑައިގަންނަވާ ކަމަށެވެ.