މަނާގުއާ (އޮގަސްޓް 3): ނިކަރާގުއާގެ ރައީސް ޑެނިއެލް އޯޓޭގާ ތިން ވަނަ ދައުރަކަށް ވެރިކަމަށް ކުރިމަތިލައްވާ އިރު ރަނިންމޭޓަކަށް ވާނީ އަނބިކަނބަލުން ރޮޒާރިއޯ މުރީލޯ ކަމަށް އިއުލާންކޮށްފި އެވެ.
ޓީވީ މެދުވެރިކޮށް ނިކަރާގުއާގެ ރައްޔިތުންނާ ގާތްގަނޑަކަށް ކޮންމެ ދުވަހަކު މުހާތަބު ކުރައްވާ މުރީލޯއަކީ ގައުމުގެ ރައްޔިތުންގެ މެދުގައި މަގުބޫލު ބޭފުޅެކެވެ. އަދި ސަރުކާރުގެ ތަރުޖަމާނުގެ މަގާމު މިހާރު ފުރުއްވަމުން ގެންދަވާ މުރީލޯއަކީ މިހާރުވެސް ނިކަރާގުއާގައި ބާރުވެރި ފަރާތެވެ.
ނަމަވެސް، ސަރުކާރާ އިދިކޮޅު ފަރާތްތަކުން ވަނީ ރައީސް އާއި ފަސްޓް ލޭޑީ ގައުމު ހިންގަވަމުން ގެންދަވަނީ އަމިއްލަ ސަރަހައްދެއްގެ ގޮތުގައި ކަމަށް ބުނެފަ އެވެ. އަދި ތިން ވަނަ ދައުރަކަށް ރައީސް އޯޓޭގާ އިންތިހާބު ވެއްޖެ ނަމަ ގައުމުގެ ވެރިކަން އާއިލީ ވެރިކަމަކަށް ބަދަލުވެދާނެ ކަމަށް ބުނެ ކަންބޮޑުވުން ފާޅުކޮށްފަ އެވެ.
ނިކަރާގުއާގައި އޮތް ހުދުމުހުތާރު ވެރިކަމެއް އިންގިލާބަކުން ވައްޓާލުމަށް ފަހު 1979 ވަނަ އަހަރު ވެރިކަމަށް ވަޑައިގެންނެވި އޯޓޭގާ ވަނީ އޭގެ ފަހުން ދެ ދައުރަށް ރައީސްކަން ކުރައްވާފަ އެވެ. (ބީބީސީ)