ޖަލުގައި އަނިޔާކޮށްފައިވާ ކަމަށް ބުނާ މައްސަލަ:
ތަހުގީގަށް މައުމޫން ހާޒިރުކުރަން ފުލުހުން ބޭނުންވާނަމަ ސަރުކާރުން އެ މަގުފަހިކޮށްދޭނެ: ޒުހައިރު

ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫން އަބްދުލް ގައްޔޫމްގެ ވެރިކަމުގެ ދުވަސްވަރު ޖަލުގައި އަނިޔާކޮށްފައިވާ ކަމަށް ތުހުމަތުކުރެވޭ ގައިދީންތަކެއްގެ މައްސަލައާ ގުޅިގެން، ފުލުހުން ކުރިއަށް ގެންދާ ތަހްޤީޤަށް ރައީސް މައުމޫން ހާޒިރުކުރުމަށް ފުލުހުން ބޭނުންވެއްޖެ ހާލަތެއްގައި އެކަމަކަށް ސަރުކާރުން މަގުފަހިކޮށްދޭނެ ކަމަށާއި ނަމަވެސް އެކަމާ ސަރުކާރާ އެއްވެސް ގުޅުމެއް ނޯންނާނެ ކަމަށް ރައީސުލްޖުމްހޫރިއްޔާގެ ޕްރެސް ސެކެޓްރީ މުހައްމަދު ޒުހެއިރު ވިދާޅުވެއްޖެ އެވެ.

ޒުހެއިރު މިހެން ވިދާޅުވީ ޖަލުގައި ހައްޔަރުކޮށްފައިވާ މީހުންނަށް އަނިޔާ ކުރިކަމުގެ ތުހުމަތުތައްކޮށް ކުރީގެ ޕްރިންޒަންސް ޑިވިޒަންގެ އިސްވެރިޔާ އިސްތަފާ އިބުރާހިމް މަނިކު ހައްޔަރުކޮށްފައި ވަނީ ސަރުކާރާ ދެކޮޅަށް ހިނގާ ހަރަކާތްތަކުން މީހުންގެ ސަމާލުކަން އެހެން ދިމާއަކަށް އަނބުރާލައި ކުޑަވަގުތުކޮޅަކަށް ނަމެވެސް ޑީއާރްޕީގެ ޒައީމް މައުމޫން ހައްޔަރު ކުރުމުގެ ބޭނުމުގައި ކަމަށް ޑީއާރްޕީގެ ޒައީމް ފެކްޝަނުން އިއްޔެ ބުނެފައި ވަނިކޮށެވެ.

ޒުހެއިރު ވިދާޅުވީ ކުރީގެ ސަރުކާރުގައި ގައިދީންތަކަކަށް ޖަލުގައި އަނިޔާކޮށްފައިވާ މައްސަލައާ ގުޅިގެން ފުލުހުން މިހާރު ކުރިއަށް ގެންދާ ތަހުޤީޤަކީ ވަކި ވަކި ބޭފުޅަކު ހައްޔަރުކުރުމަށް ނުވަތަ ވަކި ބަޔަކު ހައްޔަރު ކުރުމުގެ ބޭނުމުގައި ކުރިއަށް ގެންދާ ތަހްޤީޤެއް ނޫން ކަމަށާއި އެ ވާހަކަތައް އެގޮތަށް ދައްކަވާ ބޭފުޅުން އެވާހަކަ ދައްކަވަނީ ސިޔާސީ ބޭނުމެއްގައި ކަމަށެވެ.
"ރިޔާސީ ކޮމިޝަނުން ތަހުޤީޤްކުރަމުންދާ އަބްދުﷲ އަނީސް (އަތްބަޅޭ) ގެ މައްސަލައާއި، މާލެ ތެރޭގައި ހިނގަމުންދާ ސިޔާސީ ހަލަބޮލިކަމާ ގުޅިގެން ރައީސް މައުމޫނާ ދޭތެރޭގައި މާލެ ތެރޭގައި ހަމަނުޖެހުން ހިންގަވާކަމުގެ ތުހުމަތުކުރެވެމުންދާ ދުވަސްކޮޅާއި، ސިޔާސީ އެހެންވެސް ހަލަބޮލި ކަމުގެ ދުވަސްކޮޅާ ދިމާވުން އެއީ އިއްތިފާގެއް،" ޒުހައިރު ވިދާޅުވި އެވެ. "މިތަހުޤީޤަކީ ސަރުކާރުގެ އެއްވެސް ޒާތީ ކަމެއް އޮވެގެން ނުވަތަ ސަރުކާރުގެ އިސްބައެއް ބޭފުޅުންކޮޅެއް ކޯފާ އިސްކުރައްވާ ބޭފުޅަކު ހައްޔަރުކުރުމަށް ކުރާ ކަމެއް ނޫން. މިއީ އާއްމު ފަރުދުންތަކަކަށް ލިބެމުންދިޔަ ހާނީކައަކާ ގުޅިގެން ރިޔާސީ ކޮމިޝަނުން ބަލަމުންދިޔަ ކަންތައްތަކެއްގެ ތެރެއިން ހޯދުނު ކަމަކާ ގުޅިގެން ފުލުހުން ކުރިއަށް ގެންދާ ކަމެއް. ސިޔާސީ ވެރިއަކު މިތަހުޤީޤަށް ހާޒިރުކުރަންޖެހިއްޖެ ނަމަވެސް ސިޔާސީ ވާދަވެރިންނަށް ދޭންޖެހޭ ހިމާޔަތް މިސަރުކާރުން ދޭނެ،" ޒުހެއިރު ވިދާޅުވި އެވެ.

ފުލުހުން މިހާރު ކުރިއަށްގެންދާ ތަހުގީގަކީ އަތްބަޅޭގެ މައްސަލައިގެ ތަހްގީގާ ގުޅޭ ފައިލެއް ގެއްލިގެން، އެފައިލް ހޯދުމުގެ މަސައްކަތް ކުރަމުން ދަނިކޮށް ކުރިން ގެއްލިފައިވާ އިތުރު ލިޔުންތަކަކާއި ފޮޓޯތަކެއް ފެނުމާ ގުޅިގެން ކުރިއަށް ގެންދާ ތަހްޤީޤެއް ކަމަށް ޒުހެއިރު ވިދާޅުވި އެވެ.

" ގެއްލުނު އެފައިލް ހޯދަމުން ދަނިކޮށް ފެނުނު އިތުރު ލިޔެކިޔުންތަކުގެ ތެރޭގައި އަދަބު ދިނުމާ ބެހޭ ލިޔުންތަކާ އަދަބުދީފައިވާ މީހުންގެ ފޮޓޯއާއި އެފަދަ އެއްތައް ލިޔެކިޔުމެއް ފެނިފައިވޭ، އެހެންވެ އެތަކެއްޗާ ބެހޭ އެންމެ ގިނަ ޖަވާބު އެނގިވަޑައިގެންނަވާ އެއްބޭފުޅެއް ކަމުގައި އިސްތަފާ ވެވަޑައިގެންނަވާނެ،" ޕްރެސް ސެކެޓްރީ ވިދާޅުވި އެވެ.
މިހާރު ފުލުހުންގެ ބެލުމުގެ ދަށުގައި ހުންނެވި އިސްތަފާ ހައްޔަރުކުރުމާ ގުޅިގެން ޑީއާރްޕީ ޒެޑް ފެކްޝަނުން އިއްޔެ ނެރެފައިވާ ނޫސްބަޔާނުގައި ބުނެފައިވަނީ ޖަލުގައި ހައްޔަރުކޮށްފައިވާ މީހުންނަށް އަނިޔާ ކުރިކަމުގެ ތުހުމަތުގައި ކުރީގެ ސަރުކާރުގެ ބައެއް އިސް ފަރާތްތަކުގެ މައްޗަށް ތަހުގީގު ކުރުމުގެ ނަމުގައި ރިޔާސީ ކޮމިޝަނާއި ފުލުހުން މެދުވެރިކޮށް އެމްޑީޕީގެ ސަރުކާރުން ފެށި މަސައްކަތަކީ އެމްޑީޕީ ސަރުކާރާމެދު އާންމުން މާޔޫސްވެ ހިތްހަމަ ނުޖެހިގެން މުޒާހަރާ ކުރަމުންދާތީ އެކަންކަމުން ރައްޔިތުންގެ ސަމާލުކަން އެހެން ދިމާއަކަށް އަނބުރާލުމަށް ކުރާ މަސައްކަތެއް ކަމަށާއި އެކަށް ރައްޔިތުން ސަމާލުވުމަށް ޕާޓީން ގޮވާލާ ކަމަށެވެ. އަދި ޕާޓީގެ ޒައީމް މައުމޫންގެ ދިފާއުގައި ކުރަންޖެހުނު ކޮންމެ ކަމެއް ކުރުމުގައި ފަސް ނުޖެހޭނެ ކަމަށްވެސް ބުނެފައިވެ އެވެ.