އީދު މުބާރަކް: ރާއްޖޭގެ އެކި ކަންކޮޅުތަކުން އީދު ކުޅިވަރު

މިއަދު ހަވީރު 4:30 އިން 6:00 އަށް މާލޭގައި ޢީދު ކުޅިވަރުތައް ކުރިއަށް ގެންގޮސްފައި ވާއިރު، މާދަމާ ހަވީރު އެ ކުޅިވަރުތައް ކުރިއަށް ގެންދާނީ ހުޅުމާލޭގައި ކަމަށް ޔޫތު މިނިސްޓްރީގެ ޑެޕިއުޓީ މިނިސްޓަރު ނާއިފް ޝައުކަތު ވިދާޅުވި.

ދިޔަމިގިލީ ކައުންސިލުން ބުނީ، މިފަހަރުގެ ފިޠުރު ޢީދުގައިވެސް އެރަށުގައި ގިނަ ހަރަކާތްތަކެއް ކުރިއަށް ގެންދާނޭކަމަށް. އެގޮތުން ޒުވާނުން ތިންމުގޯލި ކުޅުމާއި، މިއަދު ހަވީރު ކުޑަކުދީންގެ ކުޅިވަރުތައް ކުރިއަށް ގެންދާނޭކަމަށް. އަދި، ހަމަ މިއަދު ކައުންސިލުން އިންތިޒާމްކޮށްގެން ބާއްވާ ޚާއްސަ ފުޓްބޯޅަ މުބާރާތެއް ވެސް ކުރިއަށް ގެންދާނޭ ކަމަށް.

ދިޔަމިގިލިން ހޮވާލެވޭ ޖުމުލަ 9 ޓީމެއް ވާދަކުރާ "ސައީދުބެ ކަޕް 2016" ފުޓްސަލް މުބާރާތަކީ، ދިޔަމިގިލީގެ ތަރައްގީއާއި ކުޅިވަރާއި، ދީނީ އަދި އިޖްތިމާއީ ހަރަކާތްތަކުގައި ފާހަގަކޮށްލެވޭ ފަރާތެއްކަމަށްވާ އަލް މަރްޙޫމް އަބްދުﷲ ސައީދު (ސައީދުބެ)ގެ ހަނދާނުގައި މިއަހަރުން ފެށިގެން ކޮންމެ އަހަރަކުވެސް ބާއްވަން ހަމަޖެހިފައިވާ މުބާރާތެއް ކަމަށް އެ ކައުންސިލުން މައުލޫމާތުދޭ.

ދިރާގުން މިއަދު ވަނީ، މާލޭގެ 5 ސަރަހައްދެއްގެ އިތުރުން، ދިރާގުގެ ރީޖަނަލް އޮޕަރޭޝަން ސެންޓަރުތައް ގާއިމްކޮށްފައިވާ 8 އަތޮޅެއްގައި އީދުގެ އުފާ ފާހަގަކުރުމުގެ ގޮތުން ކުޑަކުދިން ޖަމާވާ އެކި ސަރަހައްދުތަކުގައި އީދު ނަމާދުގެ ފަހުގައި ހަދިޔާ ބަހާފައި. އަދި މިއަދު ހަވީރުވެސް ބައެއް ސަރަހައްދުތަކުގައި މި ހަރަކާތް ކުރިޔަށް ގެންދާނެ ކަމަށް ދިރާގުން މައުލޫމާތުދޭ.

ތިޔަބޭފުޅުން ދިރިއުޅުއްވާ ސަރަހައްދުތަކުގައި ކުރިއަށްދާ ޢީދުގެ ހަރަކާތްތަކާ ގުޅޭ ޚަބަރާއި ފޮޓޯތައް، ވައިބަރ މެދުވެރިކޮށް ސަން އޮންލައިންގެ ހޮޓްލައިން، 9992747 / 9982747 އަށް ފޮނުއްވާ. އަދި ސަން އޮންލައިންގެ ފޭސްބުކް ޕޭޖަށް ފޮނުއްވުމުން ވެސް އަޅުގަނޑުމެން އެ މައުލޫމާތާއި ފޮޓޯތައް މި ބްލޮގްގައި ހިމަނައިދޭނަން.

މިއަދު ރާއްޖޭގެ ހުރިހާ ރަށެއްގައިވެސް ފިތުރު އީދު ފަށާފައި މިވަނީ ޢީދު ނަމާދުން. އެގޮތުން މާލޭގައި، އިސްލާމީ މަރުކަޒުގައި ކުރެވުނު މިއަދުގެ އީދުނަމާދަށް ފަހު، ރައީސުލްޖުމްހޫރިއްޔާ އަބްދުﷲ ޔާމީން މިހާރު ގެންދަވަނީ އިސްލާމީ މަރުކަޒުގައި ރައްޔިތުންނާ އީދު ސަލާމްކުރައްވަމުން.

• މިއަދު އިސްލާމީ މަރުކަޒުގައި ކުރެވުނު ޢިދުނަމާދުގެ ބައެއް މަންޒަރުތައް:

ޔޫތު މިނިސްޓްރީގެ ޑެޕިއުޓީ މިނިސްޓަރު ނާއިފް ޝައުކަތު ސަންއަށް ވިދާޅުވީ، އެ މިނިސްޓްރީން އިސްނަގައިގެން މާލެ، ވިލިމާލެ، އަދި ހުޅުމާލޭ ޒުވާނުންނާއި ހުޅުމާލޭ ޑިވެލޮޕްމަންޓް ކޯޕަރޭޝަން (އެޗްޑީސީ)އާ ގުޅިގެން މިފަހަރުގެ ފިޠުރު ޢީދު މާލެއާޢި ހުޅުމާލޭގައި ވަރަށް ކުލަގަދަކޮށް ފާހަގަކުރުމަށް ތައްޔާރުވެފައި ވާ ކަމަށް.

މާލެއާއި ހުޅުމާލޭގައި މިފަހަރުގެ ފިޠުރު ޢީދު ވަރަށް ކުލަގަދަކޮށް ފާހަގަކުރަން ޔޫތު މިނިސްޓްރީން ތައްޔާރުވެއްޖެ.

ޢީދާ ގުޅޭ ޚަބަރާއި ފޮޓޯތައް، ވައިބަރ މެދުވެރިކޮށް ސަން އޮންލައިންގެ ހޮޓްލައިން، 9992747 / 9982747 އަށް ފޮނުއްވާ. އަދި ސަން އޮންލައިންގެ ފޭސްބުކް ޕޭޖަށް ފޮނުއްވުމުން ވެސް އަޅުގަނޑުމެން އެ މައުލޫމާތާއި ފޮޓޯތައް މި ބްލޮގްގައި ހިމަނައިދޭނަން.

ފިޠުރު ޢީދުގެ ތަހުނިޔާއާ މުބާރަކުބާދީ ދިވެހި ރައްޔިތުންނަށާއި ރައްޔިތުންގެ މަޖިލީހުގެ މެމްބަރުންނަށް އަރިސްކުރުމުގެ ގޮތުން ރައްޔިތުން މަޖިލީހުގެ ރައީސް އަބްދުﷲ މަސީހު މުހައްމަދު ނެރުއްވި ހިތާބެއްގައި ވިދާޅުވެފައި ވަނީ ރަމަޟާން މަސް ނިމި އަޅުގަނޑުމެންނާ ބައްދަލުކުރާ ފިތުރު އީދަކީ އުފާ ފާޅުކޮށް، އާއިލީ ގުޅުންތަކާއި އިޖުތިމާއީ ގުޅުންތައް ވަރުގަދަ ކުރުމަށް ލިބޭ އުފާވެރި ފުރުސަތެއް ކަމަށް. އަދި ފިޠުރު ޢީދަކީ އުހުއްވަތްތެރިކަމުގެ ލޯބި އާލާ ކުރުމަށް ވެސް ލިބިގެން ދިޔަ ފުރުސަތެއް ކަމަށް.

ފިޠުރުޢީދުގެ އުފާ އަޅުގަނޑުމެން މި ފާހަގަކުރަނީ، ބަރަކާތްތެރި ރަމަޟާންމަހުގެ ރޯދަ ހިފުމުގެ ހެޔޮ ތައުފީޤު މާތްﷲ އަޅުގަނޑުމެންނަށް ދެއްވި ކަމަށްޓަކައި އެކަލާނގެ ޙަޟުރަތުގައި ޙަމްދާއި ޝުކުރު ދަންނަވަމުންކަމަށް ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ ހުރިހާ ރައްޔިތުންގެ އަޒުމަކަށް ވާންވާނީ މި ފެށޭ އާ އަހަރަކީވެސް އަޅުގަނޑުމެން ސީދާ މަގުގަ ކުރިއަށް ދެވޭ އަހަރަކަށްވުން ކަމަށް.

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިރޭ ވަނީ، ބަރަކާތްތެރި ފިޠުރު ޢީދުގެ މުނާސަބަތުގައި ޤައުމާ މުޚާތަބް ކުރައްވާ ވާހަކަފުޅު ދައްކަވާފައި.