އޭއެފްސީ ޗެލެންޖް ކަޕް:
ސަޕޯޓަރުންގެ މެސްކޮޓް ލޯންޗްކޮށްފި

މިއަދު ހަވީރުން ފެށިގެން ކުރިޔަށްދާ އޭއެފްސީ ޗެލެންޖުކަޕްގައި ދިވެހި ޓީމަށް ސަޕޯޓު ދީ މެޗްތަކުގެ ފޯރި އިތުރަށް ގަދަކުރުމަށް ދިވެހި ސަޕޯޓަރުންނާ އެކު ހަރަކާތްތެރިވާ މެސްކޮޓް މިއަދު ލޯންޗުކޮށްފި އެވެ.

މެސްކޮޓް ލޯންޗްކޮށްދެއްވުމަށް ފަހު މިނިސްޓަރު އޮފް ޔޫތު އެންޑް ސްޕޯޓްސް މަލީހު ޖަމާލް ވިދާޅުވީ އޭއެފްސީ ޗެލެންޖް ކަޕަށް މިފަދަ މެސްކޮޓެއް ތައްޔާރުކޮށް ސަޕޯޓަރުންނާ މުޅި މުބާރާތުގެ ފޯރި ގަދަކުރުމަކީ ކޮންމެހެން ކުރަން ޖެހޭ ކަމެއް ކަމަށެވެ.

މަލީހު ވިދާޅުވީ މިއަދު މުޅި ރާއްޖޭގައި ވެސް މިވަނީ އޭއެފްސީ ޗެލެންޖް ކަޕްގެ ފޯރި އިންތިހާއަށް ގަދަވެފައި ކަމަށާއި ސަޕޯޓަރުންގެ ފޯރިވެސް އެހެން ހުރިހާކަމެއް ދޫކޮށް ހަމައެކަނި މިކަމަށް ހުއްޓިފައިވާ ކަމަށެވެ. އެހެންކަމުން މަލީހު ވިދާޅުވީ ހުރިހާ ސަޕޯޓަރުން ވެސް ސަޕޯޓް ކުރާ އިރު އެއްވެސް ޓީމެއްގެ އަދި އެއްވެސް ކުޅުންތެރިއެއްގެ އަބުރަށް އުނިކަމެއް ނާންނަ ގޮތަށް ސަޕޯޓް ކުރުމަކީ ވަރަށް މުހިންމު ކަމެއް ކަމަށާއި އެހެން ޓީމުތަކަށް ފުރިހަމަ މެހެމާންދާރީ އަދާކުރަން ޖެހޭ ކަމަށެވެ.

"އަޅުގަނޑުގެ އިލްތިމާސަކީ ހުރިހާ ސަޕޯޓަރުން ވެސް އެއްވެސް ޓީމެއްގެ އަދި އެއްވެސް ކުޅުންތެރިއެއްގެ އަބުރަށް އުނިކަމެއް ނާންނަ ގޮތަށް ފެއާޕްލޭގެ ރީތި އުސޫލުން ސަޕޯޓް ކުރުމުގެ ކަންކަން ކުރިޔަށް ގެންދާށޭ. އެހެން ޓީމުތަކަށް އަޅުގަނޑުމެންގެ ފުރިހަމަ މެހެމާންދާރީ އަދާކުރަން ޖެހޭ." މަލީހު ވިދާޅުވި އެވެ.

މެސްކޮޓް ލޯންޗްކުރުމަށް ފަހު މިއަދު ހަވީރު 05:00 އާއި ހަމައަށް މާލޭގެ ބޮޑަތި މަގުތަކުގައި މެސްކޮޓް ދައްކާމުލަށް ހިނގާލުމެއް ކުރިޔަށްދާނެ އެވެ. އަދި އެ ހިނގާލުމުގައި ސަޕޯޓަރުންގެ ފޯރި އިތުރަށް ގަދަކުރުމަށް އޭއެފްސީ ޗެލެންޖްކަޕްގެ ތީމްލަވަ ބޭނުންކުރާނެ އެވެ.