ޒައީމް މައުމޫން އާލާސްކަންފުޅެއްގައި އޮންނެވި ކަމަށް ބުނެ ޔުމްނާގެ ފޯނު ނަމްބަރު ބޭނުން ކޮށްގެން ދޮގު މެސެޖު ފަތުރަމުންދާ ކަމަށް ޒެޑްފެކްޝަނުން ބުނެފި

ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫނު އަބްދުލްގައްޔޫމު ވަރަށް ބޮޑު އާލާސް ކަންފުޅެއްގައި އޮންނެވި ކަމަށް ބުނެ ޒެޑް ޑީއާރްޕީގެ ސެކްރެޓަރީ ޖެނެރަލް އަދި ޒައީމު މައުމޫނުގެ ދަރިކަނބަލުން ޔުމްނާ މައުމޫނުގެ އަމިއްލަފުޅު ފޯނު ނަންބަރު ބޭނުންކޮގެން ފޮނުވަމުންދާ މެސެޖްތަކަކީ ސޮފްޓްވެއާއެއް ބޭނުންކޮށްގެން ބަޔަކު ފަތުރަމުންދާ ހަގީގަތާ ހިލާފު ދޮގު މެސެޖްތަކެއް ކަމަށް ޑީއާރްޕީގެ ޒެޑް ފެކްޝަނުން ބުނެފި އެވެ.

އެ އެސްއެމްއެސްތަކާ ބެހޭ މައުލޫމާތު ދެއްވަމުން ޑީއާރްޕީގެ މީޑިޔާ ޑައިރެކްޓަރު އަހްމަދު ނިހާނު ހުސެއިން މަނިކު ވިދާޅުވީ، އެފަދަ މެސެޖްތައް ފޮނުވާ ބަޔަކު ކުރަމުން އެ ދަނީ ވަރަށް ފިނޑި ތާކުންތާކު ނުޖެހޭ އަމަލުތަކެއް ކަމަށެވެ. އަދި އެ އަމަލު ކުށްވެރިކުރައްވައި ނިހާނު ވިދާޅުވީ އެކަމުން ހާސިލް ކުރެވޭނެ އެއްވެސް ކަމެއް ނޯންނާނެ ކަމަށެވެ.

"އައިފޯނު ގެންގުޅުއްވާ ބޭފުޅުންނަށް އެނގިވަޑައިގަންނަވާނެ ޓަޗް އެސްއެމްގެ ނަމުގައި އައި އެޕްލިކޭޝަން ތެރޭން ޑައުންލޯޑް ކުރެވެން އޮންނާނެ ކުޑަވަރެއްގެ ސޮފްޓްވެއާއެއް. އެ ސޮފްޓްވެއާ މެދުވެރިކޮށް ކޮންމެ މީހެއްގެ ފޯނު ނަމްބަރު ބޭނުންކޮށްގެން ވެސް އަނެއް މީހަކަށް އެސްއެމްއެސްއެއް ފޮނުވައި ލުމަކީ ވަރަށް އާދައިގެ ކުޑަކުޑަކަމެއް،" ނިހާނު ވިދާޅުވި އެވެ.

ނިހާނު ވިދާޅުވީ ޒައީމް މައުމޫން ހުންނެވީ ހެޔޮ ހާލުކޮޅުގައި ކަމަށެވެ. އަދި އެބަޔަކު އެފަދަ އެސްއެމްއެސްތައް ފެތުރުމުގެ ބޭނުމަކީ، އަދިވެސް ރާއްޖޭގައި ސިޔާސީ ގޮތުން ވިއްކެން އޮތް އެންމެ އަގު ބޮޑު މުދަލަކީ ޒައީމު މައުމޫނު ކަމަށްވާތީ ސިޔާސީ މަގުސަދެއް ހާސިލް ކުރުމަށް ކަމަށެވެ.

"އަދިވެސް ދިވެހި ރާއްޖޭގައި ސިޔާސީ ގޮތުން ވިއްކެންއޮތް އެންމެ އަބޮޑު މުދަލަކީ ޒައީމު މައުމޫނު. އެކަން އެނގޭނެ، ރައީސް ނަޝީދު ކުޅި ބަދަލު ކުރައްވަނީ ޒައީމު މައުމޫނުގެ ކޮންމެ ފިޔަވަޅަކަށް ބައްލަވައިގެން." ނިހާނު ވިދާޅުވި އެވެ.