ޕެންޝަން އެޑްމިނިސްޓްރޭޝަން އޮފީހުން އިސްނަގައިގެން ބޭއްވި މޯލްޑިވްސް ފައިނޭންސް ފޯރަމް 2016 ގައި، ރާއްޖޭގެ މާލީ ދާއިރާގެ ތަރައްގީގެ ގިނަ މަޝްވަރާތަކެއް ކުރިޔަށް ގެންގޮސްފި އެވެ.
ކުރުނބާ މޯލްޑިވްސް ރިސޯޓުގައި މިއަދު ކުރިޔަށް ގެންދިއަ މި ފޯރަމުގައި، ރާއްޖޭގެ ފައިނޭންޝަލް ސެކްޓަރުގެ ތަރައްގީއަށް ކުރެވޭނެ އެކިއެކި ކަންކަމާ، އެ ސެކްޓަރުގައި ދިމާވާ މައްސަލަތަކާ، އެކަންކަމުގެ ހައްލާ ގުޅޭގޮތުން މަޝްވަރާ ކުރެވިގެން ދިޔަ އެވެ.
މި އަހަރުގެ ފޯރަމް ކުރިޔަށް ގެންދެވުނީ، މާލީ ދާއިރާގެ ރީފޯމާއި އެ ދާއިރާ ޒަމާނީ ކުރުމުގެ މައުޟޫއުއަށް އަލި އަޅުވާލައިގެންނެވެ.
މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ސީއީއޯ މުހައްމަދު ހުސައިން މަނިކު ވިދާޅުވީ، ޕެންޝަން ފަންޑުގައި ފަސް ބިލިޔަނަށް ވުރެ ގިނަ ރުފިޔާ އެބަ ހުރި ކަމަށާ، ފައިނޭންޝަލް ސެކްޓަރު ތަރައްގީ ކުރުމުގެ މުހިންމުކަން، ފަންޑުގެ ސައިޒުން ވެސް އެނގޭ ކަމަށެވެ.
މަނިކު ވިދާޅުވީ، ފައިނޭންޝަލް ސެކްޓަރުގެ މައްސަލަތަކެއް ޕެންޝަން އޮފީހާ، އެމްއެމްއޭގެ އިތުރުން ކެޕިޓަލް މާކެޓް ޑިވެލޮޕްމެންޓް އޮތޯރިޓީން ވެސް އައިޑެންޓިފައި ކޮށްފައިވާ ކަމަށާ، އެކަންކަން އިސްލާހު ކުރުމަށް މަސައްކަތް ކުރެވޭނެ ކަމަށެވެ.
ފައިނޭންސް ފޯރަމްގައި، މާލީ ދާއިރާގައި ހަރަކާތްތެރިވާ ސަރުކާރުގެ، އަދި އަމިއްލަ ފަރާތްތަކުގެ ކުންފުނިތަކުން ބައިވެރިވެފައިވާ އިރު، ބޭރުގެ ބައެއް މާހިރުން ވެސް ވަނީ ބައިވެރިވެފަ އެވެ.