ހާއްސަ އިނާމުގެ ގިންތިތަކުގެ ތެރެއިން ސަރުކާރުން ކަނޑައަޅާ ފެންވަރަކަށް މަސައްކަތެއް ކުރުން ނުވަތަ އެއްޗެއް އުފެއްދުމުގެ ގިންތިން، މަތީ ދަރަޖަ ހޯދާ ފަރާތްތަކަށް ރައީސް ދެއްވާ އިނާމަށް ކުރިމަތިލުމުގެ ފުރުސަތު އިކޮނޮމިކް މިނިސްޓްރީން ހުޅުއްވާލައިފި އެވެ.
އެ މިނިސްޓްރީ އިން ކުރި އިއުލާނުގައި ބުނެފައި ވަނީ އެ ގިންތިން މި އަހަރު އިނާމު ދިނުމަށް ހަމަޖެހިފައިވާ ދާއިރާތަކުގެ ތެރޭގައި، ނެތެމުންދާ ދިވެހި މަސައްކަތްތެރިކަން ދިރުވައި އާލާކުރުމުގެ ދާއިރާ ހިމެނޭ ކަމަށެވެ.
އެ ދާއިރާ އިން އިނާމު ދޭނެ ފަރާތެއް ކަނޑައެޅުމަށް ނާށި ބޭނުންކޮށްގެން ތަކެތި އުފެއްދުމުގެ މުބާރާތެއް ބޭއްވުމަށް ނިންމައި، ވަކި ވަކި ފަރުދުންނަށް އެ މުބާރާތުގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފަ އެވެ.
އިކޮނޮމިކް މިނިސްޓްރީ އިން ބުނީ އިނާމު ދެވޭނީ އެ މުބާރާތުގައި މަދުވެގެން ފަސް ފަރާތަކުން ބައިވެރިވެ ތަކެތި ހުށަހެޅުމުންނެވެ. އަދި ބައިވެރިކުރާ ތަކެއްޗަކީ ރާއްޖޭގައި އުފައްދާފައިވާ އަދި މުބާރާތަށް ކުރިމަތިލުމުގެ ފުރުސަތު ހުޅުވާލި ފަހުން ތައްޔާރުކޮށްފައިވާ ތަކެތި ކަމުގައި ވާންޖެހޭނެ ކަމަށް ވެސް އިއުލާނުގައިވެ އެވެ.
މުބާރާތުގައި ބައިވެރިކުރާ ތަކެތި ތައްޔާރުކުރުމަށް ކޮށްފައިވާ މަސައްކަތުގެ ފަށުވިކަމާއި، ޑިޒައިންގެ ފުރިހަމަކަމާއި ހިޔާލުގެ މުއްސަނދިކަމާއި، މީހާގެ ހުނަރު ބޭނުންކޮށްގެން އުފެއްދުން އުފައްދާފައިވާ މިންވަރު ބެލުމަށް ވަނީ ހަމަޖެހިފަ އެވެ.
އޭގެ އިތުރުން އުފެއްދުމުގައި ތަރިކަ އާއި އާދަކާދަ އަދި ސަގާފީ ސިފަ އެކުލެވިގެންވާ މިންވަރާއި އުފެއްދުން މާކެޓު ކުރުމުގައި ވިސްނާފައިވާ މިންވަރާއި އުފެއްދުން ޕެކުކުރުމާއި ގެންގުޅުމާއި ބޭނުންކުރުމުގައި ހުރި ފަސޭހަކަން ބެލުމަށް ފަހު އެއް ވަނަ، ދެވަނަ އަދި ތިން ވަނަ ހޮވުމަށް ވަނީ ނިންމާފަ އެވެ.
ނާށި ބޭނުންކޮށްގެން ތަކެތި އުފައްދާ މުބާރަތުގައި ބައިވެރިވުމަށް، އެކަމަށް އެދޭ ފޯމު އަދި މުބާރާތުގައި ބައިވެރިކުރާ ތަކެއްޗާ އެކު މި އަހަރުގެ ސެޕްޓެމްބަރު މަހުގެ 29 ވަނަ ދުވަހުގެ ކުރިން މިނިސްޓްރީ އަށް ހުށަހަޅަން ޖެހެ އެވެ.