ސަން އެފްއެމް އެވޯޑްސް 2010:
އަހަރުގެ މަގުބޫލު ޝަހުސިއްޔަތަކަށް ޑީއާރްޕީގެ ލީޑަރު ތަސްމީން

ސަން އެފްއެމް އިން ހޮވި 2010 ވަނަ އަހަރުގެ އެންމެ މަގުބޫލު ޝަހުސިއްޔަތަކަށް ޑީއާރްޕީގެ ލީޑާ އަހުމަދު ތަސްމީން އަލީ ހޮވިވަޑައިގެންފި އެވެ.

މިރޭ ދަރުބާރުގޭގައި އޮތް ސަންއެފްއެމް އެވޯޑް 2010ގެ ރަސްމިއްޔާތުގައި އަހަރުގެ އެންމެ މަގުބޫލު ޝަހުސިއްޔަތުގެ ފަހުރުވެރި އެވޯޑް ތަސްމީނާ ހަވާލުކޮށްދެއްވީ ސަންއެފްއެމްގެ ޗެއާމަން، އަހްމަދު ސިޔާމް މުހައްމަދެވެ.

މިރޭގެ ރަސްމިއްޔާތުގައި އަހަރުގެ އެންމެ މަގުބޫލު ޝަހުސިއްޔަތުގެ އެވޯޑާއެކު ޖުމްލަ ހަ ދާއިރާއިން ނުވަ ޝަހުސިއްޔަތުން ވަނީ ހޮވައިފަ އެވެ.

އެގޮތުން 2010 ވަނަ އަހަރުގެ އެންމެ މަގުބޫލު އިޖުތިމާއީ ޝަހުސިއްޔަތަކަށް ހޮވިވަޑައިގަތީ ގާސިމް އިބްރާހިމެވެ. އަހަރުގެ އެންމެ މަގުބޫލު ވިޔަފާރި ޝަހުސިއްޔަތުގެ އެވޯޑް ގެންދެވީ ޓެޕްކޯން އަލިމަނިކެވެ.

މިރޭ ބޭއްވި ރަސްމިއްޔާތުގައި އެންމެ މަގުބޫލު ކުޅިވަރު ޝަހުސިއްޔަތު (ފިރިހެން)ގެ ތަށި އަލީ އަޝްފާގު އުފުލައިލިއިރު އެންމެ މަގުބޫލު އަންހެން ކުޅިވަރު ޝަހުސިއްޔަތަކަށް ހޮވިފައިވަނީ އެ ކެޓަގަރީން 2009 ވަނަ އަހަރު ވެސް އެއް ވަނަ ހޯދި އައިޝަތު ނާޒިމާ އެވެ.

އެންމެ މަގުބޫލް އެކްޓްރެސްއަކަށް މަރިޔަމް އަފީފާ ހޮވުނިއިރު، އެންމެ މަގުބޫލު އެކްޓަރަކަށް ހޮވުނީ މުހައްމަދު އަބްދުﷲ (މުހައްމާ) އެވެ. އަދި އެންމެ މަގުބޫލު އަންހެން ލަވަކިޔުންތެރިޔަކަށް އުނޫޝާ ހޮވިފައިވެ އެވެ. އަހަރުގެ އެންމެ މަގުބޫލު ފިރިހެން ލަވަކިޔުންތެރިޔާގެ އެވޯޑް އުފުލައިލީ އަބްދުﷲ ޝައްފާނު އެވެ.

އެ ރަސްމިއްޔާތުގައި ސަންއެފްއެމްގެ ބިޒްނަސް ރިލޭޝަންޝިޕް އެވޯޑް ނުވަ ފަރާތަކަށް ވެސް ދީފައިވެ އެވެ.

މުނިފޫހިފިލުވައިދިނުމުގެ ތަފާތު ހަރަކާތްތަކާއެކު ކުރިއަށްދިޔަ އެ ހަފްލާގައި ނައިބު ރައީސް ޑރ. މުހައްމަދު ވަހީދު ހަސަން މަނިކު ބައިވެރިވެވަޑައިގެން ބައެއް އެވޯޑްތައް ބައްސަވައިދެއްވި އެވެ.
ސަން އެފްއެމް އެވޯޑްސް އަކީ ރާއްޖޭގެ ހިދުމަތުގެ ދާއިރާގެ އަގު ވަޒަން ކުރުމާއި، ހިދުމަތްތެރިންނަށް ހިތްވަރު ދިނުމާއި ފުރިހަމަ ހިދުމަތުގެ ވެއްޓެއް ގާއިމު ކުރުމުގައި މީޑިއާ ސްޓޭޝަނެއްގެ ގޮތުން ސަން އެފްއެމްގެ މައްޗަށް ލާޒިމު ކުރާ އިޖުތިމާއީ މަސްއޫލިއްޔަތުގެ ދަށުން 2009 ވަނަ އަހަރު ސަން މީޑިއާ ގްރޫޕުގެ ޗެއާމަން އަހުމަދު ސިޔާމް މުހައްމަދު ފައްޓަވައި ދެއްވާފައިވާ ވަރަށް ހާއްސަ ޕްރޮގްރާމެކެވެ.


---

23:00 ސަންއެފްއެމް އެވޯޑްސްގެ ފަޙުރުވެރި މަގުބޫލު ޝަހުސިއްޔަތުގެ މަގާމު އަހުމަދު ތަސްމީނު ޢަލީ އަށް ލިބިވަޑައިގެންފި

23:24 ސަންއެފްއެމް އެވޯޑްސްގެ އެންމެ މަގުބޫލު އިޖުތިމާޢީ ޝަޙުސިއްޔަތަކަށް ގާސިމް އިބްރާހީމް

23:17 އެންމެ މަގުބޫލު ވިޔަފާރި ޝަހުސިއްޔަތަކަށް ޓެޕްކޯން ޢަލިމަނިކު ހޮވިއްޖެ

23:08 މަޝްހޫރު ލަވަ "ގޯޅި ގޯޅި ކަންމަތިން" މި ލަވަޔަށް ސްރީލަންކާގެ ހުނަރު ވެރި ފަންނާނުން ތަކެއްގެ ނަށަމުން އެބަދޭ

23:05 އެންމެ މަގުބޫލު ކުޅުވަރު ޝަހުސިއްޔަތު (ފިރިހެން) އަށް ހޮވިފައިވަނީ އަލީ އަޝްފާޤް

23:03 އެންމެ މަގުބޫލު ކުޅުވަރު ޝަހުސިއްޔަތު (އަންހެން) އަށް ހޮވިފައިވަނީ ޢާއިޝަތު ނާްޒިމާ

22:54 ސަން އެފް އެމް ގެ އެންމެ މަގުބޫލު މުވައްޒަފަކަށް ހޮވިފައިވަނީ ސަން އެފް އެމް ގެ ޕްރޮގްރާމްސް ކޯޑިނޭޓަރު ސާއިދު އަޙުމަދު

22:50 ސަން އެފް އެމް ގެ އެންމެ މަގުބޫލު އަންހެން ލަވަކިޔުން ތެރިޔާ މަރިޔަމް އުނޫޝާގެ އަޑުން ވާހަނދާނަކުން 1 ގެ 'ފެދު އުނިމާ ކޯޅިމާ'

22:45 އެންމެ މަގުބޫލް އެކްޓްރެސް މަރިޔަމް އަފީފާ އަދި އެންމެ މަގުބޫލު އެކްޓަރަކަށް މުޙައްމަދު އަބްދުﷲ (މުހައްމާ)

22:38 އެންމެ މަގުބޫލު އަންހެން ލަވަކިޔުންތެރިޔަކަށް އުނޫޝާ ހޮވިއްޖެ ، އަދި އެންމެ މަގުބޫލު ފިރިހެން ލަވަކިޔުން ތެރިޔާ އަށް ޢަބްދުﷲ ޝައްފާނު ހޮވިއްޖެ

22:25 މިހާރު އެވޯޑް ދޭން ތައްޔާރު ވަނީ . އެންމެ ފުރަތަމަ ދޭނީ އެންމެ މަގުބޫލު އަންހެން ލަވަކިޔުންތެރިޔާގެ އެވޯޑް

22:18 އަނެއްކާވެސް ޖާދޫގެ ޝޯ ކުރިޔަށް އެބަދޭ. ސްރީލަންކާގައި ޖާދު ހެދުމުގައި 28 ފަހަރު ޗެމްޕިއަންކަން ހޯދާފައިވާ އެޑްވަޑްގެ ޖާދޫއަށް ވަރަށް ބޮޑު ސަމާލު ކަމެއް މި ޝޯގައި ދަނީ ލިބެމުން

http://sun.mv/albums/l_831.jpg

22:11 ދާދި ދެންމެއަކު ބިޒްނަސް ރިލޭޝަން ޝިޕް އެވޯޑްތައް ދީފި. ލިބުނީ ވަތަނިއްޔާ، އެމްޑަބްލިޔު އެސްސީ ، ދިރާގު، ސޮނީ، ޕޭން އޯޝަން، އައިލެންޑް ބެވަރެޖްސް، އެލައިޑް، ކައުންޓްލައިން އަދި ބީއެޗްއެމް ޓްރޭޑާސް

21:55 މިހާރު ކުރިޔަށްދަނީ އަލިފާނާއެކު ކުރިޔަށްދާ ހާއްސަ ނެށުމެއް

21:55 މިވަގުތު ކުރިޔަށްދަނީ ސްރީލަންކާގެ މަޝްހޫރު ސެންސޭ ގްރޫޕްގެ ހާއްސަ މުނިފޫހި ފިލުވުމުގެ އައިޓަމެއް. ލަންކާގެ މި ޓީމުން އަދި ޝޯގެ ވަކި ހިސާބެއްގައި އަލިފާނުގެ ކުޅިވަރުތައް ވެސް ކުޅޭނެ

21:49 މިހާރު ހޮވަމުންދަނީ އެންމެ މަގުބޫލު އެހުންތެރިން، އެންމެ މަގުބޫލު އެހުންތެރޭގައި ހިމެނެނީ، ހއ. ފިއްލަދޫ ، މަރިޔަމް ޒޫނާ (ޒެޑޭ) މުހައްމަދު ވަހީދު، މާލެ، އަލީ ހުސައިން، ހދ. ނޮޅިވަރަމް ފަރު

21:46 ދާދި ދެންމެއަކު ސަން އެފްއެމްގެ އެންމެ މަގުބޫލް ތިން ޕްރޮގްރާމް ހޮވައިފި. އެންްމެ މަގުބޫލު ފަސް ޕްރޮފްރާމަކީ އިލްމީ ހަޒާނާ، ބާން ޓެކްސީ ކްލަބް، އާފެށުން، ބޮނޑިތާން، ރައްޔިތުންގެ ނޫސް

21:23 ދަރުބާރުގެ ގެއަށް ވަރަށް ގިނަ އަދަދެއްގެ އެކި ދާއިރާގެ މަޝަހޫރު މީހުންނާއި ސިޔާސީ ލީޑަރުންނާއި ވިޔަފާރިވެރިން ވަޑައިގެން އެބަތިއްބެވި

21:11 ސަން އެފްއެމް އެވޯޑްސްގެ ރަސްމިސްޔާތު ފަށައިފި. މިވަގުތު ކުރިޔަށް ދަނީ ސްރީލަންކާގެ މަޝްހޫރު ޖާދޫގަރު އެޑްވަޑުގެ ޖާދޫގެ ހުނަރުތައް ދައްކުވައިދޭ ޝޯއެއް.

ފާއިތުވި އަހަރު އެކިދާއިރާތަކުން ފާހަގަކޮށްލެވުނު އަހަރުގެ ޝަހުސިއްޔަތުންނަށް ސަން އެފްއެމް އިން ދޭ އެވޯޑް، "ސަން އެފްއެމް އެވޯޑްސް 2010"ގެ އިނާމު ދިނުމުގެ ރަސްމިއްޔާތު ކުޑަކުޑައިރުކޮޅެއްގެ ތެރޭގައި ދަރުބާރުގޭގައި ފަށާނެ އެވެ. މި ރަސްމިއްޔާތު އަޅުގަނޑުމެން ވަގުތުން ވެބްކާސްޓްކުރާއިރު ވީޓީވީން ވަގުތުން ބްރޯޑްކާސްޓްކުރުމަށް ވަނީ ހަމަޖެހިފަ އެވެ.

އެކިދާއިރާތަކުން އެވޯޑަށް ވާދަ ކުރާ ގަދަ ތިނެއްގެ ގޮތުގައި 27 ފަރާތެއްގެ ނަން އިއުލާނު ކޮށްފައިވާއިރު ސަންއެފްއެމް އެވޯޑްސް 2010 ގައި ހަ ދާއިރާއަކުން ނުވަ ޝަހުސިއްޔަތެއް މިރޭ ހޮވާނެ އެވެ. މި ފަހަރުގެ އެވޯޑް ތައް ދިނުމުގައި މާކްސް ދީފައި ވަނީ، އެހުންތެރިންގެ ވޯޓަށް 50 ޕަސެންޓް އަދި ފަނޑިޔާރުންގެ މާކްސްއަށް 50 ޕަސެންޓް ކަމަށް ސަން އެފްއެމް އެވޯޑްސް ކޮމެޓީން ވަނީ ވިދާޅުވެފަ އެވެ.

ސަން އެފްއެމް އެވޯޑްސް އަކީ ރާއްޖޭގެ ހިދުމަތުގެ ދާއިރާގެ އަގު ވަޒަން ކުރުމާއި، ހިދުމަތްތެރިންނަށް ހިތްވަރު ދިނުމާއި ފުރިހަމަ ހިދުމަތުގެ ވެއްޓެއް ގާއިމު ކުރުމުގައި މީޑިއާ ސްޓޭޝަނެއްގެ ގޮތުން ސަން އެފްއެމްގެ މައްޗަށް ލާޒިމު ކުރާ އިޖުތިމާއީ މަސްއޫލިއްޔަތުގެ ދަށުން 2009 ވަނަ އަހަރު ސަން މީޑިއާ ގްރޫޕުގެ ޗެއާމަން އަހުމަދު ސިޔާމް މުހައްމަދު ފައްޓަވައި ދެއްވާފައިވާ ހާއްސަ ޕްރޮގްރާމެކެވެ.

ދެހާސް ދިހަ ވަނަ އަހަރުގެ އެންމެ މަގުބޫލު ޝަޚުސިއްޔަތަށް ދޭ އެވޯޑަށް ވާދަ ކުރާ ތިން ބޭފުޅުންނަކީ މިހާރުގެ ރައީސުލްޖުމްހޫރިއްޔާ މުހައްމަދު ނަޝީދާއި ކުރީގެ ރައީސް އަލްއުސްތާޒް މައުމޫންއަބްދުލް ގައްޔޫމާއި ޑީއާރްޕީގެ ލީޑަރު އަހުމަދު ތަސްމީން އަލީ އެވެ.

ސަން އެފްއެމް އެވޯޑްސް 2009 ގެ އަހަރުގެ އެންމެ މަގުބޫލު ޝަހުސިއްޔަތަކަށް ހޮވާފައި ވަނީ ކުރީގެ ރައީސް އަލްއުސްތާޒް މައުމޫނު އަބްދުލް ގައްޔޫމެވެ.