ދުނިޔޭގެ ފުޓްބޯޅައިގެ މައި އިދާރާ "ފީފާ"ގެ ރައީސް ކަމުގައި އެންމެ ދިގު މުއްދަތަކަށް ހުރެވޭނީ ހަތަރު އަހަރުގެ ތިން ދައުރު ނުވަތަ 12 އަހަރަށް ކަމަށް ނިންމައިފި އެވެ.
ފީފާގެ ރައީސް ކަމުގެ މަގާމުގައި ހުރެވޭނެ މުއްދަތެއް ކުރިން ކަނޑައަޅާފައެއް ނުވެ އެވެ. ނަމަވެސް ކޮރަޕްޝަންގެ ތުހުމަތުތަކާ ހެދި ފުޓްބޯޅައިގެ ހަރަކާތްތަކުން ސަސްޕެންޑްކޮށްފައިވާ ފީފާގެ ކުރީގެ ރައީސް ސެފް ބްލެޓާ ވަނީ 18 އަހަރު ވަންދެން ފީފާގެ ރައީސް ކަން ކުރައްވާފަ އެވެ.
ފީފާގެ ރައީސްކަން ކުރެވޭނެ މުއްދަތު ކަނޑައަޅައި ފީފާއަށް ބޮޑެތި ބަދަލުތަކެއް ގެނައުމަށް ނިންމާފައި ވަނީ ސްވިޒަލޭންޑްގެ ޒިޔުރިކްގައި މިހާރު ކުރިއަށްދާ ކޮންގްރެސްގަ އެވެ. ފީފާއަށް ގެނައުމަށް ހުށަހެޅި އިސްލާހީ ޕެކޭޖަށް، ވޯޓުގައި ބައިވެރިވި 207 ގައުމުގެ ތެރެއިން 179 ގައުމަކުން ވަނީ ތާއީދުކޮށްފަ އެވެ.
އިސްލާހީ ޕެކޭޖްގައި ދެން ހިމެނެނީ ފީފާގެ އެގްޒެކެޓިވް ކޮމިޓީގައި އަންހެން މެންބަރުންގެ ދައުރު އިތުރު ކުރުމަށާއި ފޫޓްބޯޅައިގައި އަންހެނުންނަށް ފަހި މާހައުލެއް އުފެއްދުމަށެވެ.
މި މާއްދާ ފާސްވުމުން ފީފާގެ އެކްސްކޯއަށް ކޮންމެ ކޮންފެޑްރޭޝަނަކުން އަންހެން މެންބަރަކު އިންތިޚާބު ކުރަންޖެހޭނެ އެވެ.
ފީފާގެ އެތޭރޭގެ ކޮރަޕްޝަން ހުއްޓުވުމަށްޓަކައި ފިނޭންސް ކޮމިޓީ އާއި ޑިވްލަޕްމެންޓް ކޮމިޓީގެ އިތުރުން ގަވަނެންސް ކޮމިޓީގައި މަދުވެގެން އިންޑަޕެންޑެންޓް ކޮމިޓީގެ މެންބަރަކު ހުރުމަށް ވެސް ވަނީ ފާސްކޮށްފަ އެވެ.
ފީފާގެ އިންޓަގްރިޓީ ހިފެހެއްޓުމަށް އިންޑިޕެންޑެންޓް ފީފާ ރިވިއު ކޮމިޓީއެއް ވެސް އުފެއްދުމަށް ވަނީ ފާސްކޮށްފަ އެވެ.
އެ އިސްލާހީ ޕެކޭޖްގައި ފީފާގެ އެތެރެއަށް ކޮރަޕްޝަން ނުވެއްދުމަށް ގިނަ ފިޔަވަޅުތަކެއް އެޅުމަށް ކޮންގްރެސްގައި ވަނީ ފާސްކޮށްފަ އެވެ.
އިސްލާހީ ޕެކޭޖަކީ ފީފާގެ ތާރީޚްގައި ވޭތުވެދިޔަ 111 އަހަރު ތެރޭގައި ފާސް ކުރިން އެންމެ ބޮޑު އިސްލާހީ ޕެކޭޖެވެ. އެ އިސްލާހުތަކަކީ ފީފާ ރިފޯމް ކުރުމަށް ހާވާލުވި ކޮމީޓީން ވޭތު ވެދިޔަ ހަ މަސް ތެރޭގައި އެކުލަވާލީ އިސްލާހުތަކެކެވެ.