ހަނގުރާމަވެރި ހަތިޔާރު ގެންގުޅުމުގެ ކުށުގައި 11 އަހަރަށް ޖަލަށް ލާފައިވާ ކުރީގެ ޑިފެންސް މިނިސްޓަރު ކާނަލް ރިޓަޔާޑް މުޙައްމަދު ނާޒިމު ޖަލަށް ލާފައި ވަނީ އިންސާފުން ނޫން ކަމަށް ބުނެ އެމައްސަލަ، ޔޫއެން ވޯކިން ގްރޫޕް އޮން އާބިޓްރަރީ ޑިޓެންޝަން އަށް ހުށަހަޅައިފި އެވެ.
އެމްނެސްޓީ އިންޓަނޭޝަނަލް އިން ކާނަލް ނާޒިމުގެ މައްސަލަ ޔޫއެން ވޯކިން ގްރޫޕަށް ހުށަހަޅާފައިވާ ކަމަށް އެމްނެސްޓީގެ ސައުތު އޭޝިއާ ސްޕެޝަލިސްޓް އައްބާސް ފާއިޒު މިއަދު ކުރި ޓުވީޓެއްގައި ވަނީ ބުނެފަ އެވެ.
ނާޒިމުގެ މައްސަލަ އެމްނެސްޓީ އިންޓަނޭޝަނަލް އަށް މިދިޔަ އަހަރު ހުށަހެޅީ އޭނާގެ އާއިލާއިންނެވެ. އެ މައްސަލަ ބަލައި ދިރާސާ ކުރަމުން އަންނަ ކަމަށް އެމްނެސްޓީ އިން އޭރު ވަނީ ބުނެފަ އެވެ. އެ މައްސަލަ އެމްނެސްޓީއަށް ހުށަހެޅުމަށް ފަހު އާއިލާއިން ބުނެފައި ވަނީ އެކަން އެގޮތަށް ކުރީ ރާއްޖޭގެ ޝަރުއީ ނިޒާމުގެ ތެރެއިން ނާޒިމަށް އިންސާފު ލިބޭނެ ކަމަށް ގަބޫލުނުކުރެވޭތީ ކަމަށެވެ.
ނާޒިމުގެ މައްޗަށް އިއްވި 11 އަހަރުގެ ޖަލު ހުކުމް މިހާރު ވަނީ ހައިކޯޓްގައި އިސްތިއުނާފްކޮށްފަ އެވެ.