ނޭކުރެންދޫ އެކްސިޑެންޓްގައި އަނިޔާވި ޒުވާނާ މާލެ ގެނެސް އައިސީޔޫގައި ފަރުވާދޭން ފަށައިފި

ހދ. ނޭކުރެންދޫގައި ހިނގި ނުރައްކާތެރި އެކްސިޑެންޓްގައި އަނިޔާވި ޒުވާނާ މާލެ ގެނެސް، އައިޖީއެމްޗްގެ އައިސީއޫގައި ފަރުވާދޭން ފަށައިފި އެވެ.

މިދިޔަ ބުރާސްފަތި ދުވަހުގެ މެންދުރު ފަހު ނޭކުރެންދޫގައި ސައިކަލަކާއި ޕިކަޕެއް ޖެހި ހިނގި ނުރައްކާތެރި އެކްސިޑެންޓްގައި ބޮލަށާއި ހަށިގަނޑުގެ އެކި ތަންތަން ޒަހަމްވެފައިވާ އެ ރަށު ބިލަމަގުމާގެ، ހަސަން އަބްދުލް ލަތީފު، 23، ހދ. ކުޅުދުއްފުށީ ރީޖަނަލް ހޮސްޕިޓަލުން ފަރުވާދިމުމަށް ފަހު އިމެޖެންސީގައި މާލެ ގެނެއީ އިއްޔެ ހެނދުނު އެވެ.

ހަސަންގެ އާއިލާ އިން ވާހަކަ ދެއްކި މީހަކު މިއަދު ބުނީ، އެކްސިޑެންގައި ޕިކަޕާއި ސައިކަލް ޖެހުނު ބާރު މިނުގައި އޭނާ ވިއްސައިގެން ގޮސް ޕިކަޕްގެ ދަށަށް ދިއުމުގެ ސަބަބުން ބޮލުގެ ނާށިގަނޑުގައި ރެނދުލާފައިވާ ކަމަށެވެ. އަދި ހަސަންގެ ހަށިގަނޑުގެ އެކި ހިސާބުތަކުގައި ބޮޑެތި ޒަހަހަމާއި އަނިޔާ ލިބިފައިވާ ކަމަށް ޑޮކްޓަރާ ހަވާލާދީ އާއިލާ އިން ބުންޏެވެ.

"ބޮލުގެ ނިއްކުރި އާއި ފައިން މަށާއިގެން ގޮސްފައި ވަނީ. އަދި ބޮލުގެ ކަނާތް ފަރާތުގެ ލޮލުގެ މަތިން ނާށިގަނޑުގައި ރެނދުލާފައިވާ ކަމަށް ޑޮކްޓަރުން ބުނަނީ." އާއިލާ އިން ވާހަކަ ދެއްކި މީހަކު ބުންޏެވެ.

އޭނާ ބުނީ ހަސަން މާލެ ގެނެސް އައިޖީއެމްއެޗު ހޮސްޕިޓަލުން ފަރުވާދޭން ފެށުމުން އޭނާގެ ހާލު ކޮންމެވެސް ވަރަކަށް ރަގަނޅު ވަމުން އަންނަ ކަމަށެވެ.

ގައުމީ ޔުނިވާސިޓީން ސެކަންޓަރީ ޓީޗިން ކޯހެއް ފުރިހަމަ ކުރުމަށް ފަހު ރަށަށް ދިޔަތާ ހަފްތާއެއް ނުވަނީސް އެކްސިޑެންޓެއްގައި ޒަހަމްވެ އައިޖީއެމްއެޗްގެ އައިސީޔޫ އިން ފަރުވާ ހޯދަމުންދާ ހަސަންގެ އެކްސިޑެންޓް ތަހުގީގު ކުރަމުން އަންނަ ކަމަށް ފުލުހުން ބުނެ އެވެ.