ނިމިދިޔަ 2015 ވަނަ އަހަރުގެ ފަހުކޮޅު، އެންމެ ފާހަގަ ކޮށްލެވުނު އެއް ކަމަކީ، މުޅި ދުނިޔޭގެ ރީތީގެ ރާނީ ހޮވުމަށް ބާއްވާ މިސް ޔުނިވާސް ޕޭޖެންޓްގައި، ޕްރެޒެންޓަރުގެ އިހުމާލުން ނުބައި ރީތީގެ ރާނީއެއްގެ ބޮލުގައި ތާޖު އެޅުވި ހާދިސާ އެވެ. މުޅި ދުނިޔޭގެ ލޯތަކުގެ ކުރިމަތީގައި ދުނިޔޭގެ ރީތީގެ ރާނީގެ ތާޖު އެޅުވިގެން ދިއުމާއި އެކު، މާ ގިނަ ވަގުތުތަކެއް ނުވެ ހަމަ އެންމެންގެ ކުރިމަތީގައި އެ ރާނީގެ ކިބައިން ތާޖު މަހުރޫމު ވެގެން ގޮސް، އެހެން ރީތީގެ ރާނީއެއްގެ ބޮލުގައި އެ އެޅުވިގެން ދިޔަ އެވެ.
މިސް ޔުނިވާސް 2015 ޕޭޖެންޓްގެ ޕްރެޒެންޓަރު ސްޓީވް ހާވީއަށް އޮޅިގެން، މިސް ޔުނިވާސްއަކީ ކޮލަމްބިއާގެ ރީތީގެ ރާނީ އަރިއަދްނާ ގިތިއަރޭޒް ކަމަށް އިޢުލާނު ކުރެވުމުން، އަރިއަދްނާގެ ބޮލުގައި ތާޖު އެޅުވުނެވެ. އެހެން ނަމަވެސް އޭގެ ކުޑަ ވަގުތުކޮޅެއް ފަހުން ހާވީ ވަނީ އޭނާގެ ކުށް އިޢުލާނު ކޮށް، މިސް ޔުނިވާސްގެ ތާޖު، 2015 ވަނަ އަހަރުގެ މުބާރާތުގެ ހައްޤުވެރި ފަރާތް ކަމުގައިވާ ފިލިޕީންސްގެ ރީތީގެ ރާނީ ޕިއާ ވާރޓްސްބަކްއަށް ދީފަ އެވެ.
ސްޓީވް ހާވީގެ އެ ލަދުވެތި "މިސްޓޭކް"ގެ ސަބަބުން އެންމެ ލަދުގަންނަން ޖެހުނީ މިސް ކޮލަމްބިއާ އަރިއަދްނާ ގިތިއަރެޒް އެވެ. މިސް ޔުނިވާސް މުބާރާތަށް ފަހު އަރިއަދްނާ އޭނާގެ އިންސްޓަގްރާމަށް ފޮޓޯއެއް ލައި، އަސަރުގަދަ ކެޕްޝަނެއް ލިޔެފައި ވެއެވެ.
ނަމަވެސް، އެ ލަދުވެތި ކުށަށް މައާފަށް އެދިލުމާއި އެކު، ސްޓީވް ހާވީގެ ހިތް ފުރިފައެއް ނުވެ އެވެ. ޑިސެމްބަރު މަހު ދިމާވި އެ "ކަންތައް ގަނޑަށް ފަހު"، ފުރަތަމަ ފަހަރަށް މީޑިޔާގައި ވާހަކަ ދައްކަމުން ސްޓީވް ހާވީ ބުނީ، އޭނާގެ ކުށުން އެންމެ ބޮޑަށް އަސަރު ކުރާނީ މިސް ކޮލަމްބިއާއަށް ކަމަށެވެ.
"އަހަރެންނަށް ވާހަކަ ދައްކާލަން ފުރުސަތު ނުލިބެނީ އޭނާއާ އެކަނި. އަހަރެން މިސް ފިލިޕީންސްއާ ވާހަކަ ދެއްކިން. މިސް ޔުނިވާސްގެ މީހުންނާ ވާހަކަ ދެއްކިން. ބެކްސްޓޭޖްގައި ތިބި މީހުންނާ ވާހަކަ ދެއްކިން. އަދި އެ ޝޯގެ ޑައިރެކްޓަރާ ވެސް ވާހަކަ ދެއްކިން. އެކަމަކު މިސް ކޮލަމްބިއާއާ ވާހަކަ ނުދެއްކުނު. އަހަރެން އޭނާއަށް ގުޅަން މަސައްކަތް ކުރިން. އެކަމަކު އޭނާގެ ފަރާތުން އިޖާބައެއް ނުލިބޭ،" ސްޓީވް ހާވީ ބުންޏެވެ.
ސްޓީވް ހާވީ މިހެން ބުނި ނަމަވެސް، ސްޕެނިޝް ޗެނަލެއް ކަމުގައިވާ ޔުނިވިޜަންއާ ވާހަކަ ދައްކަމުން، މިސް ކޮލަމްބިއާ އަރިއަދްނާ ގިތިއަރޭޒް ވަނީ، އެ ހާލަތުގައި ހުރިހާ ފަރާތަކުންވެސް ކަންތައް ކުރި ގޮތާ މެދު ހިތްހަމަ ނުޖެހުން ފާޅު ކޮށްފަ އެވެ.
"ހަތަރު މިނިޓު ތެރޭގައި، މީހެއްގެ ހުވަފެންތައް ނަގައި ކޮތަޅަކަށް ލައި، ކުނީގެ ގޮތުގައި އެއްލައިލީ. މިކަން އެހެން ގޮތަކަށް ވެސް އެމީހުންނަށް ކުރެވެން އޮތް. އަހަރެންނަށް ހީވަނީ، އެމީހުންނަށް ފެނުނު ގޮތުގައި، ހުވަފެނެއް ހަޤީޤަތަކަށް ހެދުމަށް މުޅި އުމުރު ދުވަހު މަސައްކަތް ކުރި އަންހެން ކުއްޖާގެ އިހްސާސްތައް އެމީހުންނަށް ދެނެގަންނަން ނޭނގެނީހެން،" އަރިއަދްނާ ބުންޏެވެ.
އެހެން ނަމަވެސް އަރިއަދްނާ މިހާރު ހުރީ ހަމަހިމޭނުންނެވެ. އޭނާ ބުނީ، މިސް ޔުނިވާސްގެ ތާޖު އޭނާގެ ބޮލުގައި އިން ހަތަރު މިނިޓަކީ އޭނާގެ ހަޔާތުގައި ވެސް އައި އެންމެ އުފާވެރި ވަގުތުކޮޅު ކަމަށެވެ.
"އަހަރެން މިސް ޔުނިވާސްއަށް ވީ ހަތަރު މިނިޓަށް. އެއީ ތާރީޚުގައި ލިޔެވިގެން ދާނެ ކަމެއް. އެއް އަހަރު ދުވަހަށް މިސް ޔުނިވާސްއަށް ވުމަށް ވުރެ މާ ފާހަގަ ކޮށްލެވޭނެ ކަމެއް އެއީ،" އަރިއަދްނާ ބުންޏެވެ.