ހަ ރަށެއްގައި މިސްކިތް އަޅަން އަލިފުޅު ތުއްތު ފައުންޑޭޝަނުން ބަޔަކާ ހަވާލުކޮށްފި

ފަސް އަތޮޅެއްގެ ހަ ރަށެއްގައި މިސްކިތް އިމާރާތްކުރުމުގެ މަސައްކަތް އަލިފުޅު ތުއްތު ފައުންޑޭޝަނުން މިއަދު ކުންފުނިތަކަކާ ހަވާލުކޮށްފި އެވެ.

އިސްލާމިކް މިނިސްޓްރީއާ ގުޅިގެން އަލިފުޅު ތުއްތު ފައުންޑޭޝަނުން ހިންގާ މަޝްރޫއުގައި މިސްކިތްތައް އިމާރާތް ކުރަނީ ހއ. ތަކަންދުއާއި ށ. ކަނޑިތީމާއި އެއަތޮޅު ނަރުދުއާއި ރ. ހުޅުދުއްފާރާއި މ.މުލަކާއި ލ. މާމެންދޫގައެވެ. އެ މިސްކިތްތަކުގެ މަސައްކަތް ކޮންޓްރެކްޓަރުންނާ މިއަދު ހަވާލުކުރީ ސެންޓްރަލް ޒޯން ހޮޓަލުގައި އެކަމަށް ޓަކައި މިއަދު ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި އަލިފުޅު ތުއްތު ފައުންޑޭޝަނުގެ އިސް ބޭފުޅުންނާއި އިސްލާމިކް މިނިސްޓަރު ޑރ. އަޙުމަދު ޒިޔާދު ބާޤިރާއި މިސްކިތްތައް އިމާރާތްކުރާ ރަށްތަކުގެ ރަށު ކައުންސިލްތަކުގެ އިސް ބޭފުޅުން ބައިވެރިވެވަޑައިގެންނެވި އެވެ.

އަލިފުޅު ތުއްތު ފައުންޑޭޝަނުން ބުނީ އެ ފައުންޑޭޝަނުން އިމާރާތް ކުރާނީ ހއ. ތަކަންދޫގައި 300 މީހުންގެ ޖާގައިގެ މިސްކިތެއް، ކަނޑިތީމުގައި މީހުންގެ ޖާގައިގެ މިސްކިތެއް، ނަރުދޫގައި 300 މީހުންގެ ޖާގައިގެ މިސްކިތެއް، މުލަކުގައި 700 މީހުންގެ ޖާގައިގެ މިސްކިތެއް، ހުޅުދުއްފާރުގައި 500 މީހުންގެ ޖާގައިގެ މިސްކިތެއް އަދި މާމެންދޫގައި 300 މީހުންގެ ޖާގައިގެ މިސްކިތެއް ކަމަށެވެ.

މިސްކިތްތަކުގެ މަސައްކަތުގެ އިތުރުން ހއ. ހޯރަފުށީ ރަށްވެހިގެ އިމާރާތްކުރުމުގެ މަސައްކަތް ވެސް މިއަދުގެ ރަސްމިއްޔާތުގައި އަލިފުޅު ތުއްތު ފައުންޑޭޝަނުން ކޮންޓްރެކްޓަރަކާ ހަވާލުކުރި އެވެ.

ރަސްމިއްޔާތުގައި ވާހަކަފުޅު ދައްކަވަމުން އިސްލާމިކް މިނިސްޓަރު ޑރ. އަޙުމަދު ޒިޔާދު ބާޤިރު ވިދާޅުވީ، މިއީ އަލިފުޅު ތުއްތު ފައުންޑޭޝަނުން ސަރުކާރާ ގުޅިގެން މިފަދަ މަޝްރޫއެއް ހިންގާ ފުރަތަމަ ފަހަރު ކަމަށާއި ކުރިއަށް އޮތް ތަނުގައި ވެސް މިފަދަ ކަންކަމުގައި އިސްލާމިކް މިނިސްޓްރީއާ ރަނގަޅު ގުޅުމެއް ބާއްވާނެ ކަމަށް އުއްމީދުކުރައްވާ ކަމަށެވެ.

މިސްކިތްތައް އިމާރާތްކުރާ ރަށްތަކުގެ ކައުންސިލްތަކުގެ ވެރިންނާ މުހާތަބު ކުރައްވައި މިނިސްޓަރު ވިދާޅުވީ، މިސްކިތްތައް ސާފުތާހިރުކޮށް ބަލަހައްޓައި، ރާއްޖޭގައި ކުރިއްސުރެ އޮންނަ އެކުވެރިކަން މިސްކިތްތަކުގެ ތެރޭގައި ދެމެހެއްޓުމަކީ މުހިއްމު ކަމެއް ކަމަށެވެ.