ކޮލެޖު އިމްތިހާން ކައިރިވެފައިވާތީ ރާއްޖޭގެ އެންމެ މޮޅު އެއް ޓީޓީ ކުޅުންތެރިޔާ އާމިނަތު ޝިއުރާ ނުހިމަނައި ގައުމީ ޓޭބަލް ޓެނިސް ޓީމް އޭޝިއަން ޗެމްޕިއަންޝިޕަށް ދާން ތައްޔާރުވެއްޖެވެ.
މިމަހު 26 ން އަންނަ މަހު ތިނަކަށް ތައިލެންޑްގައި ކުރިއަށް ދާ މުބާރާތުގައި ވާދަކުރުމަށް ޓީޓީ ޓީމް ތައިލެންޑަން ފުރުމަށް ހަމަޖެހިފައިވަނީ މާދަމާއެވެ.
ޝިއުރާ ޓީމުގައި ނުހިމެނުނު ނަމަވެސް އެ ޓީމްގައި އަންހެން ހަތަރު ކުޅުންތެރިން ހިމެނެއެވެ. އަދި ފިރިހެން ހިމެނެނީ ތިން ކުޅުންތެރިންނެވެ.
ފިރިހެން ޓީމުގައިވެސް ހަތަރު ކުޅުންތެރިންނަށް އަމާޒުކޮށްގެން މުބާރަތަށް ފަރިތަ ކުރަމުން ދިޔަ ނަމަވެސް ޓީމު އެކުލަވާލިއިރު ތިން ކުޅުންތެރިން ހިމަމާފައި ވަނީ ރާއްޖޭގެ ތިން ވަނަ އަށް އެންމެ މޮޅު ކުޅުންތެރިންޔާ މައިޒަރު އާދަމް ޒާހިރަށް އަނިޔާވުމުންނެވެ.
މިމުބާރާތުގައި ރާއްޖޭގެ އަންހެން ޓީމު ވާދަކުރަން ޖެހޭނީ މުބާރަތް ބާއްވާ ގައުމު ތައިލެންޑާއި އުޒުބްކިސްތާނާއި ސައުދީ އަރަބިއާ ހިމެނޭ ގުރޫޕްގައެވެ.
ފިރިހެން ޓީމު ލައްވައިލީ މަކާއޯއާއި ވިއެޓްނާމްއާއި ސީރިޔާއާއާ އެއް ގުރޫޕެއްގައެވެ.
މިއަހަރުގެ އޭޝިއަން ޗެމްޕިއަންޝިޕުން އަންނަ އަހަރު މެލޭޝިއާ ބާއްވާ ވޯލްޑް ޗެމްޕިއަންޝިޕަށް ކޮލިފައިވާގޮތަށް ގަވާއިދަށް ވަނީ ބަދަލު ގެނެސްފައެވެ.
ކުރިން ވޯލްޑް ޗެމްޕިއަންޝިޕްގައި އިންޓަނޭޝަނަލް ޓޭބަލް ޓެނިސް ފެޑްރޭޝަންގެ ކޮންމެ މެންބަރަކަށްވެސް ވާދަކުރުމުގެ ފުރުސަތު އޮވެއެވެ.
އޭޝިއަން ޗެމްޕިއަންޝިޕްގައި ވާދަކުރާ އަންހެން ޓީޓީ ޓީމް
- މުއިނާ މުޙައްމަދު
- ފާތިމަތު ޖުމާނާ ނިމާލް
- އަޢިޝަތު ރަފާ
- މަރްޔަމް ޝަފީޤް
އޭޝިއަން ޗެމްޕިއަންޝިޕްގައި ވާދަކުރާ ފިރިހެން ޓީޓީ ޓީމް
- މޫސާ މުންސިފް އަޙްމަދު
- މުޙައްމަދު ޒީސްތު ނަސީމު
- އިބްރާހިމް ޝިއުރީ