ބައިނަލްއަގްވާމީ އެންމެ ބޮޑު ޓެނިސް މުބާރާތް ޑާވިސް ކަޕްގައި ރާއްޖެއިން ވާދަކުރުމަށް ވިސްނަމުންދާކަމަށް ޓެނިސް އެސޯސިއޭޝަންގެ ސެކްރެޓަރީ ޔޫސުފް ރިޒާ ވިދާޅުވެއްޖެއެވެ.
ޔޫސުފް ވިދާޅުވީ، ޑޭވިސް ކަޕްގައި ވާދަކުރުމަށް އެސޯސިއޭޝަނުން ފުރިހަމަ ކުރަންޖެހޭ ކަންތައްތަކެއް އެބަހުރި ކަމަށެވެ.
އެގޮތުން އިންޓަނޭޝަނަލް ޓެނިސް ފެޑެރޭޝަންގެ ދާއިމީ މެންބަރަކަށް ރާއްޖޭގެ ޓެނިސް އެސޯސިއޭޝަން ވުން ހިމެނޭ ކަމަށް ޔޫސްފް ވިދާޅުވިއެވެ.
ޔޫސުފް ވިދާޅުވީ، ދާއިމީ މެންބަރެއްގެ ގޮތުގައި ހަމަޖެހުމަށްފަހު އަހަރީ ފީގެ ގޮތުގައި ރާއްޖެއިން ފުދޭވަރެއްގެ ބޮޑު އަދަދެއް އަހަރީ ފީގެ ގޮތުގައި ދައްކަން ޖެހޭނެކަމަށެވެ.
އޭނާ ވިދާޅުވީ، އެހެން ނަމަވެސް ޑޭވިސް ކަޕްގައި ވާދަކުރުމުގެ ވިސްނުންތަކެއް ޓެނިސް އެސޯސިއޭޝަނުން ގެންގުޅޭކަމަށާއި އެންމެ އަވަހަށް ބާއްވާ އެގްޒެކެޓިވް ކޮމިޓީގެ ބައްދަލުވުމަށް އެކަން ހުށަހަޅާނެ ކަމަށެވެ.
ބައްދަލުވުން ބޭއްވޭނީ ކިހާތަނެއްގައިތޯ ސުވަލުކުރުމުން ޔޫސްފް ވިދާޅުވީ މިވަގުތު ޓެނިސް އެސޯސިއޭޝަންގެ ރައީސް އަހްމަދު ނަޒީރު ރާއްޖޭއިން ބޭރަށް ވަޑައިގެން އުޅުއްވާތީ އެގްޒެކެޓިވް ކޮމިޓީގެ ބައްދަލުވުން ނުބޭއްވުނު ނަމަވެސް ރާއީސް އެނބުރި މާލެ ވަޑައިގެންނެވިހާ އަވަހަކަށް ބައްދަލުވުން ބާއްވާނެ ކަމަށެވެ.