ސަން އެފްއެމް އެވޯޑްސް 2010:
އެވޯޑަށް ވާދަ ކުރާ ގަދަ ފަހެއް އިޢުލާނު ކޮށްފި

ސަން އެފްއެމް އެވޯޑްސް 2010ގެ ގަދަ ފަހެއް މިރޭ އިއުލާނު ކޮށްފި އެވެ. ސަން އެފްއެމް އެވޯޑް ކޮމެޓީން މިރޭ ކުރި އިޢުލާނުގައިވާ ގޮތުން 2010 ވަނަ އަހަރުގެ ސަން އެފް އެމް އެވޯޑްސް ގައި ހިމެނޭ ހަ ދާއިރާގެ ނުވަ އެވޯޑުގެ ގަދަ ފަހެއްގެ ގޮތުގައި 45 ފަރާތެއް ވަނީ ހޮވިފަ އެވެ.

އެ ގޮތުން 2010 ވަނަ އަހަރުގެ އެންމެ މަގުބޫލު ޝަޚުސިއްޔަތަށް ދޭ އެވޯޑަށް ވާދަ ކުރާ ފަސް ބޭފުޅުންނަކީ މިހާރުގެ ރައީސުލް ޖުމްހޫރިއްޔާ މުހައްމަދު ނަޝީދާއި ކުރީގެ ރައީސް އަލް އުސްތާޒް މައުމޫން ޢަބްދުލް ގައްޔޫމާއި ޑީއާރްޕީގެ ލީޑަރު އަހުމަދު ތަސްމީން ޢަލީ އާއި ޕީއޭގެ ލީޑަރު ޢަބްދުﷲ ޔާމީނާއި މާލޭ ސިޓީގެ މޭޔަރު ސަރަނގު އާދަމް މަނިކެވެ.

ސަން އެފް އެމް އެވޯޑްސް 2010 ގައި އަލަށް ދިނުމަށް ހަމަޖައްސާފައިވާ އަހަރުގެ އެންމެ މަގުބޫލު އިޖުތިމާއީ ޝަޚުސިއްޔަތު އެވޯޑުގެ ގަދަ ފަހަކަށް ހޮވުނީ ގާސިމް އިބްރާހީމް އާއި މުހައްމަދު ވަހީދުއްދީން އާއި ސަލްމާ ފިކުރީ އާއި ޓްރާންސްޕޭރެންސީ މޯލްޑިވްސްގެ މުހައްމަދު އައިމަން އާއި ޑރ. އަހުމަދު ރާޒީ އެވެ.

ސަން އެފްއެމް އެވޯޑްސްގެ އަހަރުގެ އެންމެ މަގުބޫލު ވިޔަފާރި ޝަޚުސިއްޔަތު އެވޯޑަށް ވާދަ ކުރާ ގަދަ ފަހަކީ އިބްރާހީމް އާމިރު (ސަލްސާ އާމިރު) އާއި ޑރ. ޢަބްދުﷲ ޒާހިރު (އައިކެއަރ ޒާހިރު) އާއި ޝާއިރާ ސަލީމް (ޝެރީ ޝާއިރާ) އާއި އަލިމަނިކު (ޓެޕްކޯން އައްޔަ) އަދި އަހުމަދު ޝަރީފް ( ސައިރިކްސް ޝަރީފް) އެވެ.

ސަންއެފްއެމް އެވޯޑްސް އަށް މިއަހަރު އަލަށް ތައާރަފު ކުރި ދާއިރާ ތަކުގެ ތެރޭގައި ހިމެނޭ އަހަރުގެ އެންމެ މަގުބޫލު އެކްޓަރު އެވޯޑަށް ވާދަ ކުރާ ގަދަ ފަހަކީ އަލީ ސީޒަން އާއި ޔޫސުފް ޝަފީއު (ޔޫއްޕެ) އާއި މުހައްމަދު ޢަބްދުﷲ (މުހައްމާ) އާއި މުހައްމަދު މަނިކު އަދި އަހުމަދު އަޒްނީލް (އަޒޭ) އެވެ.

ސަންއެފްއެމް އެވޯޑްސް އަށް މިއަހަރު އަލަށް ތައާރަފު ކުރި ދާއިރާ ތަކުގެ ތެރޭގައި ހިމެނޭ އަހަރުގެ އެންމެ މަގުބޫލު އެކްޓްރެސް އެވޯޑަށް ވާދަ ކުރާ ގަދަ ފަހަކީ ސަން އެފްއެމް އެވޯޑްސް 2009 ގެ އަހަރުގެ އެންމެ މަގުބޫލު މުނިފޫހި ފިލުވައިދިނުމުގެ ޝަޚުސިއްޔަތު އެވޯޑް (އަންހެން) ލިބުނު މަރިޔަމް އަފީފާގެ އިތުރުން ޝީލާ ނަޖީބާއި ނިއުމާ މުހައްމަދާއި އާމިރާ އިސްމާއީލު އަދި އާއިޝަތު ރިޝްމީ އެވެ.

ސަންއެފްއެމް އެވޯޑްސް އަށް މިއަހަރު އަލަށް ތައާރަފު ކުރި ދާއިރާ ތަކުގެ ތެރޭގައި ހިމެނޭ އަހަރުގެ އެންމެ މަގުބޫލު ފިރިހެން ލަވަކިޔުންތެރިޔާގެ އެވޯޑަށް ވާދަ ކުރާ ގަދަ ފަހަކީ ޢަބްދުﷲ ޝައްފާނު އާއި މުހައްމަދު ޢަބްދުލް ޣަނީ (ތޭރަވާ) އާއި އިބްރާހީމް ޢަލީ (ކުޑަ އިއްބެ) އާއި މުހައްމަދު ޝަމްޢޫނު އަދި އަހުމަދު އިބްރާހީމް (އައްމަޑޭ) އެވެ.

ސަންއެފްއެމް އެވޯޑްސް އަށް މިއަހަރު އަލަށް ތައާރަފު ކުރި ދާއިރާ ތަކުގެ ތެރޭގައި ހިމެނޭ އަހަރުގެ އެންމެ މަގުބޫލު އަންހެން ލަވަކިޔުންތެރިޔާގެ އެވޯޑަށް ވާދަ ކުރާ ގަދަ ފަހަކީ މާއިން ރަޝީދާއި މަރިޔަމް ނަދާ އިނާޒާއި ޝިފާ ތައުފީގާއި މަރިޔަމް އުނޫޝާ އަދި މަރިޔަމް އަޝްފާ އެވެ.

ސަން އެފްއެމް އެވޯޑްސް 2010 ގެ އެންމެ މަގުބޫލު ފިރިހެން ކުޅިވަރު ޝަޚުސިއްޔަތު އެވޯޑަށް ވާދަ ކުރާ ގަދަ ފަހަކީ ސަން އެފްއެމް އެވޯޑްސް 2009ގެ އެންމެ މަގުބޫލު ކުޅިވަރު ޝަޚުސިއްޔަތު (ފިރިހެން) ހާސިލު ކުރި އިބްރާހީމް ނިޒާރުގެ އިތުރުން އަލީ އަޝްފާގާއި އިބްރާހީމް ފަޒީލާއި އިމްރާން މުހައްމަދާއި އަދި އަދި މޫސާ ކަލީމެވެ.

ސަން އެފްއެމް އެވޯޑްސް 2010 ގެ އެންމެ މަގުބޫލު އަންހެން ކުޅިވަރު ޝަޚުސިއްޔަތު އެވޯޑަށް ވާދަ ކުރާ ގަދަ ފަހަކީ ސަން އެފްއެމް އެވޯޑްސް 2009ގެ އެންމެ މަގުބޫލު ކުޅިވަރު ޝަޚުސިއްޔަތު (އަންހެން) ހާސިލު ކުރި އާއިޝަތު ނާޒިމާގެ އިތުރުން މުއީނާ މުހައްމަދާއި މަރިޔަމް ޝީނީޒް އާއި ފަދުވާ ޒާހިރު އަދި މަރިޔަމް ސުހާނާ އެވެ.

ސަން އެފް އެމް އެވޯޑްސް 2010ގެ ގަދަ ފަހަކަށް ހޮވުނު ފަރާތްތަކުގެ ތެރެއިން ކޮންމެ ކެޓެގަރީ އަކުން ވެސް ގަދަ ތިނެއް ހޮވުމަށް ވޯޓު ދިނުމުގެ ފުރުސަތު މިރޭ ވަނީ ހުޅުވައިލައިފަ އެވެ. މި ފުރުސަތު ބަންދު ވާނީ މި މަހުގެ 25 ވަނަ ދުވަހުގެ ރޭ 12:00ގަ އެވެ.

މި ދިޔަ އަހަރު ކުރިޔަށް ގެންދިޔަ ސަން އެފްއެމް އެވޯޑްސް ގައި އަހަރުގެ ޝަޚުސިއްޔަތުން ހޮވާފައި ވަނީ 100 ޕަސެންޓް އާންމުންގެ އެސްއެމްއެސް ވޯޓުންނެވެ. އެހެން ނަމަވެސް މި އަހަރު އެ ވޯޑުގެ ގަވައިދަށް ވަނީ ބައެއް ކަހަލަ ބަދަލުތައް ގެނެސްފަ އެވެ. އެ ގޮތުން އާންމުންގެ ވޯޓަށް 50 ޕަސެންޓް އަދި ފަނޑިޔާރުންގެ ވޯޓަށް 50 ޕަސެންޓް ލިބޭ ގޮތަށް ވަނީ ހަމަޖައްސައިފަ އެވެ.

މިދިޔަ އަހަރުގެ ބޭއްވި ސަން އެފްއެމް އެވޯޑްސް 2009 ގައި އެކި ދާއިރާ ތަކުން އެވޯޑް ހާސިލު ކުރެއްވި ފަރާތްތަކަށް ފައިސާގެ އިނާމެއް ދީފައެއް ނުވެ އެވެ. އެހެން ނަމަވެސް މި ފަހަރުގެ އެ ވޯޑުގައި ފައިސާގެ އިނާމުގެ ގޮތުގައި އެއް ލައްކަ ރުފިޔާ ވަނީ ހިމަނައިފަ އެވެ. އެ ގޮތުން ސަން އެފްއެމް އެވޯޑްސް 2010 ގެ އަހަރުގެ އެންމެ މަގުބޫލު ޝަޚުސިއްޔަތަށް ސަން އެފްއެމް އެވޯޑާ އެކު ދިނުމަށް ހަމަޖައްސާފައި ވަނީ ވިހިހާސް ރުފިޔާގެ ގެ ފައިސާގެ އިނާމެވެ. އަހަރުގެ އެހެންޝަޚުސިއްޔަތުންނަށް ހޮވޭ ފަރާތްތަކަށް އެވޯޑާ އެކު ދިނުމަށް ހަމަޖައްސާފައި ވަނީ ދިހަ ހާސް ރުފިޔާގެ ފައިސާގެ އިނާމެވެ.

ސަން އެފްއެމް އެވޯޑްސްގެ ފަނޑިޔާރުންގެ ޕެނަލުގައި މި ފަހަރު ހިމެނިވަޑައިގަންނަވާ ބޭފުޅުންނަކީ މޯލްޑިވްސް ޖާނަލިސްޓް އެސޯސިއޭޝަންގެ ރައީސް އަހުމަދު ޒާހިރު (ހިރިގާ) އާއި ސަން އެފްއެމްގެ ޕްރޮގްރާމްސް ކޮންސަލްޓެންޓް ފަރެސް މުހައްމަދު އާމިރާއި ވީޓިވީގެ ހެޑް އޮފް ނިޔުސް އެންޑް ކަރަންޓް އެފެއަޒް އިމާދު ލަތީފާއި ވޮލީ ބޯޅަ އެސޯސިއޭޝަންގެ ނައިބު ރައީސް އިލްޔާސް އަހުމަދާއި ދިޓީވީގެ ޑިރެކްޓަރު މަސްއޫދު އަލީ އާއި ފުޓުބޯޅައިގެ ތަޖުރިބާކާރު އިސްމާޢީލް ޒަރިޔަންދު އަދި މިނިސްޓްރީ އޮފް ހޯމް އެފެއަޒްގެ ޑެޕިޔުޓީ ޑިރެކްޓަރު ޖެނެރަލް އަހުމަދު ޝިޔާމެވެ.

ސަން އެފްއެމް އެވޯޑްސް އަކީ ރާއްޖޭގެ ޚިދުމަތުގެ ދާއިރާގެ އަގު ވަޒަން ކުރުމާއި، ޚިދުމަތްތެރިންނަށް ހިތްވަރު ދިނުމާއި ފުރިހަމަ ޚިދުމަތުގެ ވެއްޓެއް ގާއިމު ކުރުމުގައި މީޑިއާ ސްޓޭޝަނެއްގެ ގޮތުން ސަން އެފްއެމްގެ މައްޗަށް ލާޒިމު ކުރާ އިޖުތިމާއީ މަސްއޫލިއްޔަތުގެ ދަށުން 2009 ވަނަ އަހަރު ސަން މީޑިއާ ގްރޫޕުގެ ޗެއާމަން އަހުމަދު ސިޔާމް މުހައްމަދު ފައްޓަވައި ދެއްވާފައިވާ ވަރަށް ޚާއްސަ ޕްރޮގްރާމެކެވެ.

ސަން އެފްއެމް އެވޯޑްސް އަކީ ރާއްޖޭގައި މިހާރު ދެވޭ އެންމެ ޝަރަފުވެރި އެއް އެވޯޑެވެ. މި އެވޯޑަކީ ރައްޔިތުންގެ ބަސް އެންމެ ފުޅާ ދާއިރާއެއްގައި ހިމެނިގެން ދެވޭ އެވޯޑް ވެސްމެ އެވެ. މިދިޔަ އަހަރުގެ ސަން އެފްއެމް އެވޯޑް ނައިޓަކީ ރާއްޖޭގައި މިދިޔަ އަހަރު ބޭއްވި އެންމެ ކުލަ ގަދަ އެފަދަ އެއް ހަފުލާ އެވެ. މި އަހަރުގެ ސަން އެފްއެމް އެވޯޑް ނައިޓު ވެސް ވަރަށް ކުލަ ގަދަ ގޮތެއްގައި ފާހަގަ ކުރުމަށް ތައްޔާރު ވަމުން އަންނަ ކަމަށް އެވޯޑްސް ކޮމެޓީގެ މުގައްރިރު ފަރެސް މުހައްމަދު އާމިރު ވިދާޅުވެ އެވެ.

ސަން އެފްއެމް އެވޯޑުގެ ގަދަ ފަހަކަށް ހޮވިފައިވާ ފަރާތްތަކުގެ ތެރެއިން ގަދަ ތިނަކަށް ހޮވުމަށް ޢާންމުން ވޯޓު ދޭ އިރު ކޮންމެ ދުވަހަކު ވެސް ކުރީ ދުވަހާ ހަމަޔަށް އޮންނަ ވަގުތީ ނަތީޖާ ސަން އެފްއެމް އިންނާއި ސަން އޮންލައިން މެދުވެރިކޮށް އެނގޭނެ އިންތިޒާމު ހަމަޖައްސަވާނެ ކަމުގައި އެވޯޑު ކޮމެޓީގެ މުގައްރިރު ފަރެސް އާމިރު މިރޭ ވަނީ ވިދާޅުވެފަ އެވެ. އެ ގޮތުން މި ނަތީޖާތައް އާންމު ކުރާނީ ލިބޭ އެސްއެމް އެސްގެ ސީދާ އަދަދުގެ ބަދަލުގައި ޕަސެންޓޭޖުން ކަމަށް އޭނާ ވިދާޅުވި އެވެ. މީގެ އިތުުރުން ގަދަ ފަހަކަށް ހޮވިފައިވާ ފަރާތްތަކަށް ވޯޓު ދޭނެ ގޮތް ވެސް ސަން އޮންލައިނާއި ސަން އެފްއެމް މެދުވެރިކޮށް އެނގޭނެ ކަމަށް އޭނާ ވިދާޅުވި އެވެ.