ގައުމީ ޓީމް ކޯޗުގެ މަގާމުން ވެލިޒާ ޕޮޕޯޕް އިސްތިއުފާ ދިން ކަމަށް އަޑުފެތުރެން ފަށައިފި އެވެ.
އޭނާ އިސްތިއުފާ ދީފައިވާ ކަމުގެ އަޑު ފެތުރިފައި ވަނީ އިންޑިއަން އޯޝަން އައިލެންޑް ގޭމްސްގައި ގައުމީ ޓީމް ހޯދި ދަށް ނަތީޖާތަކާ ގުޅިގެން އޭނާއަށް ބައެއް މީޑިއާތަކުގައި ފަޑުކިޔާފައި ވަނިކޮށެވެ.
ޕޮޕޯޕް އިސްތިއުފާ ދީފައިވާކަމުގެ ވާހަކަތައް ފެންމަތިވެފައިވާއިރު ސަން ދެއްވި އިންޓަވިއުގައި އެފްއޭއެމްގެ ޖެނަރަލް ސެކެޓްރީ ބައްސާމް ޢަދީލް ޖަލީލް ވިދާލުވީ ކޯޗް އިސްތިއުފާ ދީފައިވަކަމުގެ އެއްވެސް ހުށަހެޅުމެއް އެފްއޭއެމްއަށް މިހާތަނަށް ލިބިފައި ނުވާ ކަމަށާއި އަދި އެފްއޭއެމްއިން އޭނަ މަގާމުން ވަކިކޮށްފައި ވެސް ނުވާނެ ކަމަށެވެ.
"އަޅުގަނޑުވެސް ތިވާހަކަ މި އަޑު އިވުނީ ދެންމެ ޓީވީ ބަލަމުން ދަނިކޮށް. ނަމަވެސް އެފަދަ އެއްވެސް މައުލޫމާތެއް އެފްއޭއެމްއަށް ލިބިފައެއް ނުވޭ،" ބައްސާމް ވިދާޅުވި އެވެ.
އައިއޯއައިޖީގައި ސީޝެލްސް އަތުން މޮޅުވި މެޗަށް ފަހު މީޑިއާތަކާ ވާހަކަ ދައްކަމުން ޕޮޕޯޕް ބުނެފައި ވަނީ ގައުމީ ޓީމުގެ ކޯޗަށް އޮތީ ޒުވާން ކުޅުންތެރިންނަށް ފުރުސަތު ދީގެން ދިވެހި ފުޓްބޯޅަ ކުރިއެރުވުން ކަމަށާއި ނުވަތަ ހަފުތާއެއްގެ ތެރޭގައި އެއްބަސްވުން ބާތިލް ކުރުމަށްފަހު އެނބުރި ގައުމަށް ދިއުން ކަމަށެވެ.
ކޯޗް މިހެން ބުނެފައިވާއިރު ޒުވާން ކުޅުންތެރިންނަށް ފުރުސަތު ދިނުމަށް އެފްއޭއެމުން އެއްވެސް ހުރަހެއް ކުރިމަތިކޮށްފައިވާނެތޯ ސަންއިން ސުވާލު ކުރުމުން ބައްސާމް ވިދާޅުވީ މިއަދު އެފްއޭއެމް ހިންގަވަން ތިއްބެވި ފަރާތްތަކުން ވެސް އިސްކަން ދެނީ ޒުވާން ކުޅުންތެރިނަށް ޓީމުން ފުރުސަތު ދިނުމަށް ކަމަށާއި ގައުމީ ޓީމަށް ކުޅުންތެރިން އިހްތިޔާރު ކުރުން އޮންނާނީ މުޅިން ކޯޗްގެ އަތް މައްޗަށް ދޫކޮށްލާފައި ކަމަށެވެ.
"އަލުގަނޑުމެން ކީއްވެގެންތޯ ދެކޮޅު ހަނދަންވީ ޒުވާން ކުޅުންތެރިންނަށް ފުރުސަތު ނުދިނުމަށް މިހާރު އެފްއޭއެމް ހިންގަވަން ތިއްބެވި ބޭފުޅުން ވަރަށް ބޮޑު އިސްކަމެއް ދެއްވާ ޒުވާން ކުޅުންތެރިންނަށް. އަނެއްކާ ޓީމް ނެގުމުގެ ހުރިހަ އިހްތިޔާރެއް ކޯޗަށް ލިބިގެންވާނެ،" ބައްސާމް ވިދާޅުވިއެވެ.
ކޯޗް އިސްތިއުފާ ދީފައިވަ ކަމުގެ އަޑު ފެތުރިފައިވާއިރު އޭނާގެ ކޯޗްކަމުގެ ދަށުން ގައުމީ ޓީމް މިހާތަނަށް ކުޅެފައިވަ ނީ އެންމެ ފަސް މެޗެވެ. އެ ފަސް މެޗްގެ ތެރެއިން މޮޅުވެފައި ވަނީ އެންމެ މެޗަކުންނެވެ.
އެ ފަސް މެޗްގައި ރާއްޖެ ކޮޅަށް 11 ލަނޑު ވަދެފައިވާއިރު، ރާއްޖެއަށް ޖެހިފައި ވަނީ ތިން ލަނޑެވެ.