މިއަހަރު ވެސް މައުމޫން ފައުންޑޭޝަނުން 28 ސްކޮލަޝިޕްގެ ފުރުސަތު ހުޅުވާލާފައިވާ ކަަމަށް އެ ފައުންޑޭޝަނުން ބުނެފި އެވެ.
ޒުވާނުންނަށް މަތީ ތައުލީމުގެ އިތުރު ފުރުސަތުތައް ހޯދާދިނުމުގެ ގޮތުން ދޭ މި ސްކޮލާޝިޕްތަކުގެ ދަށުން ކިޔެވުމުގެ ފުރުސަތު އޮންނާނީ އިންޑިއާގެ ބެންގަލޫރުގެ ގާޑަން ސިޓީކޮލެޖުންނެވެ. މި ކޯސްތަކަކީ ތިން އަހަރުގެ ކޯސްތަކެކެވެ.
ސްކޮލަޝިޕް ހުޅުވާލާފައިވާ ދާއިރާތަކަކީ ބެޗްލާ އޮފް ބިޒްނަސް އެޑްމިނިސްޓްރޭޝަން، ބެޗްލާ އޮފް ކޮމާސް، ޓުއަރިޒަމް، ހިސްޓްރީ، ޖާނަލިޒަމް، ބެޗްލާ އޮފް ކޮމްޕިއުޓާ އެޕްލިކޭޝަން، ޖާނަލިޒަމް، ސައިކޮލަޖީ، އިންގްލިޝް، ފެޝަން އެންޑް އެޕެރަލް ޑިޒަން، ބަޔޯޓެކްނޮލަޖީ، ބަޔޯކެމިސްޓްރީ އަދި ޖެނިޓިކްސް އެވެ.
ސްކޮލަޝިޕްތަކަށް ކުރިމަތިލުމުގެ ޝަރުތުތަކުގެ ތެރޭގައި އޯލެވަލް ހަތަރު ފާހާއި އޭލެވަލް ތިން ފާސް ނުވަތަ އޯލެވަލް ފަސް ފާހާއި އޭލެވެލް ދެ ފާސް ލިބިފައިވުން ހިމެނެ އެވެ. އޭގެ އިތުރުން އިނގިރޭސިން ޖީސީއީ އޯލެވަލް އިން ދަށްވެގެން ސީ ފާސް ލިބިފައިވުން ނުވަތަ އެއާ އެއްފެންވަރުގެ ފާހެއް އިނގިރޭސިން ލިބިފައިވުން ހިމެނެ އެވެ.
އޭގެ އިތުރުން ސްކޮލަޝިޕަށް ކުރިމަތިލާފަރާތަކީ 28 އަހަރުން ދަށުގެ ޒުވާނަކަށް ވެސް ވާންޖެހެ އެވެ. ސްކޮލަޝިޕަށް ކުރިމަތިލުމުގެ ސުންގަޑި އަކީ އަންނަ ބުރާސްފަތި ދުވަހުގެ 1:00 ގެ ކުރިން ނެވެ. ކޯހަށް ހޮވޭ ފަރާތްތަށް އަންނަ ހަފްތާގެ ހޯމަ ދުވަހު އިއުލާންކުރާނެ ކަމަށް ވެސް މައުމޫންފައުންޑޭޝަނުން ބުނެ އެވެ.