ޑީއާރުޕީގެ އެތެރޭގައި މިހާރު އުފެދިފައިވާ ބައިބައިވުންތަކުގެ ތެރޭގައި ޕާޓީގެ ޒައީމް މައުމޫން އަބްދުލް ގައްޔޫމުގެ ހުންނެވި ކަމަށާއި އެމަނިކުފާނު މަސައްކަތް ކުރައްވަނީ ޕާޓީއަށް އެންމެ ފައިދާ ހުރި ގޮތަށް ނޫން ކަމަށް ޕާޓީގެ ލީޑަރު ތަސްމީން އަލީ ރޭ ވިދާޅުވެއްޖެ އެވެ.
ވީޓީވީގެ "ބޮޑު ފެންޑާ" ޕުރޮގްރާމްގައި ވާހަކަފުޅުދައްކަވަމުން ތަސްމީން ރޭ ވިދާޅުވީ އޭނާ އާ ދެކޮޅަށް މަސައްކަތްކޮށް ނުރުހުންފާޅުކުރަނީ ޑީއާރުޕީގެ އެންމެ ފަހުގެ ކޮންގުރެސްގައި ވެސް މައުމޫނަށް ތާއީދު ކުރެއްވި ބޭފުޅުންނާއި އަދި މައުމޫނުގެ އެންމެ އަރިސް ބޭފުޅުންކަމަށެވެ. އެހެންވެ ޕާޓީގެ ތެރޭގައި މިހާރު އުފެދިފައިވާ ބައިބައިވުންތަކުގައި މައުމޫންގެ ދައުރެއްނެތް ކަމަށް ގަބޫލުކުރެވެން ނެތް ކަމަށް ތަސްމީން ވިދާޅުވި އެވެ.
"އެހެންނަމަވެސް އެއީ ތިރީސް އެތައް އަހަރަކު ރާއްޖެއަށް ހިދުމަތް ކޮށްދެއްވާފައި އަދި ރާއްޖެއަށް އެތައް ހިދުމަތް ތަކެއްކުރައްވާފައި އެންމެ މުހިންމު ދައުރެއް އަދާކުރެއްވި ބޭފުޅަކަށް ދޭ ގަދަރެއްގެ ގޮތުން އެރުވި ކަމެއް [ޕާޓީގެ ޒައީމުކަމަކީ]. މިހާރު މިފެންނަނީ އަޅުގަނޑުމެންގެ ޕާޓީގެ އެތެރޭގެ ޕޮލިޓިކްސް ތެރޭގައި އަޅުގަނޑުމެންގެ ތެރޭގައި ހުންނެވި ބައިބައި ވުންތަކުގެ ތެރޭގައި ހުންނެވި ތަން. އެއީ ޕާޓީއަށް ހަރުދަނާކަން ލިބިގެން ދާނެ ގޮތެއްކަމަށް އަޅުގަނޑު ގަބޫލެއްނުކުރަން،" ތަސްމީން ވިދާޅުވި އެވެ.
ފާޅުކަން ބޮޑުގޮތެއްގައި ފުރަތަމަ ފަހަރަށް ޒައީމް މައުމޫނަށް ފާޑުވިދާޅުވަމުން ތަސްމީން ވިދާޅުވީ މައުމޫނުގެ ތަޖުރިބާގެ އަލީގައި ލަފާފުޅެއް ދެއްވިޔަސް ޕާޓީގެ ލީޑަރެއްގެ ހައިސިއްޔަތުން އެއަށް އަމަލުކުރާނީ ތަސްމީނަށް އެކަމަށް އަމަލުކުރަން ފެންނަ ނަމަ ކަމަށެވެ.
"އެއީ އަޅުގަނޑުގެ ޒިންމާއެއްވެސް ނޫން. އަޅުގަނޑުގެ ޒިންމާއަކަށް މިއަދުވާނީ ޕާޓީ އާއި ގައުމަށް ފައިދާ ހުރިގޮތަށް ކަންތައްތައް ނިންމުން،" ތަސްމީން ވިދާޅުވި އެވެ.
އޭނާ ވިދާޅުވީ މައުމޫން މިއަދު އަމަލުކުރައްވަމުން ގެންދަވަނީ ޕާޓީގެ އަސާސީ ގަވާއިދާ ހިލާފަށް ކަމަށާއި މައުމޫނަށް ޕާޓީގެ ޒައީމް ކަން އެރުވީ ޕާޓީގެ އިންޓާނަލް ޕޮލިޓިކްސްގެ ތެރޭގައި ހުންނެވުމަށް ނޫން ކަމަށެވެ.
މައުމޫން ކޮއްކޯފުޅު އަދި ޕީއޭގެ ލީޑަރު އަބްދުﷲ ޔާމީން އަންނަ ރިޔާސީ އިންތިހާބުގައި ކުރިމަތިލައްވާނެކަން އިއުލާން ކުރައްވާފައިވާ އިރު ދެން މައުމޫން ތަސްމީނަށް ތާއީދު ކުރައްވާނެ ކަމަށް ގަބޫލު ކުރައްވަންތޯ ދެންނެވުމުން ތަސްމީން ވިދާޅުވީ މައުމޫނަކީ ޑީއާރުޕީގެ މެމްބަރަކަށް ވާތީ ޕާޓީގެ ކެންޑިޑޭޓަށް ތާއީދު ކުރައްވާނެ ކަމަށް ގަބޫލު ކުރައްވާ ކަމަށެވެ.
އަންނަ ރިޔާސީ އިންތިހާބުގައި މައުމޫން ތަސްމީނަށް ތާއީދު ކުރައްވަން ނިންމަވާފައި ނުވާނަމަ އެކަން މައުމޫން ކުރިން އެންގެވުމަކީ މުހިންމު ކަމެއް ކަމަށް ދެކޭ ކަމަށް ތަސްމީން ވިދާޅުވި އެވެ.
ޕީއޭ އާއި ޑީއާރުޕީ އާއި ދެމެދުގައިވާ ކޯލިޝަނާ ބެހޭ ގޮތުން ވާހަކަ ދައްކަވަމުން ތަސްމީން ވިދާޅުވީ ޕީއޭ ކޯލިޝަންއާ އެކު މަސައްކަތް ނުކުރެވިގެން އުޅެނީ އަންނަ ރިޔާސީ އިންތިހާބުގައި ޑީއާރުޕީ އާއި އެއްސަފުގައި ޕީއޭންވެސް ވާދަކުރައްވާނެ ކަން އިއުލާން ކޮށް އެކަމަށް މަސައްކަތް ކުރަމުން އަންނާތީ ކަމަށެވެ.
ތަސްމީން މައުމޫނަށް ހޫނު ބަހުގެ ހަމަލާތަށް ދެއްވިއިރު ރޭ މައުމޫން ފެކްޝަނުން އާޓިފިޝަލް ބިޗުގައި ބޭއްވި ބައްދަލުވުމުގައި ވަނީ ތަސްމީން ސަރުކާރު ޖަވާބުދާރީ ކުރުވުމަށް މަސައްކަތް ނުކުރާ ކަމަށާއި ޕާޓީގެ ރިޔާސީ ކެންޑިޑޭޓް ހޮވަންޖެހޭނީ ޕްރައިމަރީ އަކަށް ގޮސްގެން ކަމަށް ބުނެ މައުމޫން ފެކްޝަނުން ވާހަކަ ދައްކާފައެވެ.
ޑީއާރުޕީގެ ޑެޕިއުޓީ ލީޑަރެއްގެ ގޮތުގައި ހުންނެވި އުމަރު ނަސީރު އެ ޕާޓީން ވަކިކުރި ހިސާބުން ޕާޓީ ދެބަޔަކަށް ބެހި ޒައީމް މައުމޫނާއި ޕާޓީގެ ލީޑަރު ތަސްމީން އާއި ދެމެދު ވަނީ ނުތަނަވަސް ކަމެއް އުފެދިފަ އެވެ. އެގޮތުން އެންމެ ފަހުން ބޭއްވި ލޯކަލް ކައުންސިލް އިންތިހާބުގައި ވެސް ތަސްމީން އާއި މައުމޫން ކެމްޕޭން ކުރެއްވީ ވަކިވަކިންނެވެ.
ޑީއާރުޕީގެ ނައިބު ލީޑަރު އިބްރާހީމް ޝަރީފު، 'މައުމޫން އަށްޑުއަށް އަރައިފިއްޔާ ތަޅައި ބާލާނެ' ކަމަށް ބުނެ ވިދާޅުވެ ދެއްކެވި ކަމަށް ބުނާ ވާހަކަތަކެއް ލީކްވުމާ ގުޅިގެން މައުމޫން ވިދާޅުވެފައި ވަނީ އިބްރާހީމް ޝަރީފުގެ އެ އަމަލު ޕާޓީން ކުށްވެރި ނުކުރާހާ ހިނދަކު ތަސްމީނާ އެއްބައްދަލުވުމެއްގައި ބައިވެރިވެވަޑައިނުގަންނަވާނެ ކަމަށެވެ.
date_range
ބުދަ 15 ޖެނުއަރީ 2025