މައުމޫން ފެކްޝަންގެ މުޒާހަރާގައި އާންމުންނާއި ފުލުހުންނަށް އަނިޔާވެއްޖެ

ގާނޫނު އަސާސީ އާއި ގާނޫނުތަކާ ހިލާފަށް ސަރުކާރުންކުރާ ކަންތައްތަކާ ދެކޮޅަށް ޑީއާރުޕީގެ މައުމޫ ފެކްޝަނުން މިރޭ ކުރި މުޒާހަރާގައި އާއްމުންނަށާއި ފުލުހުންނަށް އަނިޔާވެއްޖެ އެވެ.

މުޒާހަރާ ފަށާފައި ވަނީ މައުމޫން ފެކްޝަން އިސްވެ އޮވެ އިދިކޮޅު ޕާޓީތައް ބައިވެރިކޮށްގެން އާޓިފިޝަލް ބީޗްގައި ބޭއްވި ޖަލްސާއަކަށް ފަހު އެވެ. ޖަލްސާ 11:00 ޖަހާކަންހާއިރު މުޒާހަރާއަކަށް ބަދަލުވީ، ޑީއާރުޕީގެ ޒައީމު މައުމޫނު އަބްދުލްގައްޔޫމު އުޅުއްވާ މ. އަލިވާގޭ ދޮށަށް އެމްޑީޕީގެ އެކްޓިވިސްޓުންތަކެއް އެއްވެ އަޑުގަދަކުރަމުންދާ ކަމުގެ މައުލޫމާތުތައް ލިބުމުންނެވެ.

ކުރިންވެސް ހަމަޖެހިފައިވާގޮތަށް، ރައީސް ނަޝީދުގެ އިސްތިއުފާއަށް ގޮވަމުން މުޒާހަރާގެ ބައިވެރިން މަޖީދީމަގުން މިސްރާބުޖެހީ ޖުމްހޫރީ މައިދާނަށް ދިއުމަށެވެ.

އުމަރު ނަސީރާއި ޑީއާރުޕީގެ ޑިޕިއުޓީ ލީޑަރު އަދި ރައްޔިތުންގެ މަޖިލީހުގެ ގެމަނަފުށީ ދާއިރާގެ އިލްހާމް އަހްމަދާއި ވިލިމާފަންނު ދާއިރާގެ އަހުމަދު ނިހާނާއި ގަލޮޅު ދެކުނު ދާއިރާގެ އަހްމަދު މަހްލޫފާއި ނިލަންދޫ ދާއިރާގެ އަހްމަދު މުހުސިނާއި ކުރެންދޫ ދާއިރާގެ އަހްމަދު މޫސަ އާއި ވައިކަރަދޫ ދާއިރާގެ އަލީ އާރިފު އިސްކޮށް ތިއްބެވި މުޒާހަރާ ފެށުނީއްސުރެ ކުލަ ހެދުމުގައިތިބި ފުލުން ގެންދިޔައީ މުޒާހަރާގެ ބައިވެރިންގެ ހަރަކާތްތައް ބަލަމުންނެވެ.

މުޒާހަރާގެ ބައިވެރިން ދެ ސަރަހައްދަކުން ފުލުހުންގެ ސަފުތައް ރޫޅައިލުމަށްފަހު އެތެރެއަށް ވަނެވެ. އެގޮތުން އަލިކިލެގެފާނު މަގަށް ވަދެ މުލީއާގެއާ ދިމާއަށް މިސްރާބުޖެހީ، އެމަގު ބަންދުކޮށްގެން ތިބި ފުލުހުންގެ ސަފު ފަޅާލުމަށް ފަހު އެވެ. ނަމަވެސް ފަހަތުގައި އޮތް ރަޔަޓް ގިޔަރުގައިތިބި ފުލުހުންގެ އިތުރު ސަފެއް، މުޒާހަރާގެ ބައިވެރިން މުލީއާގެއާ ކައިރިވުމަށް ވަނީ ހުރަސްއަޅާފަ އެވެ. ފުލުހުން ހުރަސް އެޅުމުން މުޒާހަރާގެ ބައިވެރިން ގޮވަމުން ދިޔައީ އެމީހުންގެ ބޭނުމަކީ ރައީސް ނަޝީދަށް އެމީހުންގެ އަޑު އިއްވާފައި ޖުމްހޫރީ މައިދާނަށް ދިއުން ކަމަށެވެ. އަދި މުޒާހަރާ ކުރުމަކީ ގާނޫނު އަސާސީން އެމީހުންނަށް ލިބިގެންވާ ހައްގަކަށްވާތީ އެކަމަށް ފުލުހުން ހުރަސް ނޭޅުމަށެވެ.

ނަމަވެސް އެ ސަރަހައްދުން ކުރިއަށްޖެހުމަށް ފުލުހުން ފުރުސަތު ނުދިނުމުން ފަހަތަށްޖެހި މުޒާހަރާގެ ބައިވެރިން ދެން މިސްރާބުޖެހީ، ލިލީމަގަށް ނުކުތުމަށެވެ. އެގޮތުން ޑޭޒީމަގުން ލިލީމަގަށް ނުކުތީވެސް އެމަގު ބަންދު ކޮށްގެން ތިބި ފުލުހުންގެ ސަފު ރޫޅައިލުމަށްފަހުގަ އެވެ. އެހާދިސާގައި ބައެއް ފުލުހުންނަށް އަނިޔާވުމުގެ އިތުރުން މުޒާހަރާގެ ބައިވެރިއެއްގެ ފަޔަށް އަނިޔާވެ ހިނގައި ނުގަނެވިގެން މަގުގެ އެއްފަރާތުގައި ވެސް އިނެވެ. މުޅި މުޒާހަރާގައި އެންމެ ބޮޑު އަނިޔާއެއްވީ އާއްމުންނަށެވެ.

މުޒާހަރާގެ ބައިވެރިން ލިލީމަގުން ޗާދަނީމަގަށް ދާންކުރި މަސައްކަތަށް ވެސް ފުލުހުން ހުރަސްއެޅި އެވެ. އެ ހާދިސާގައި މުޒާހަރާގެ ބައިވެރިއެއްގެ ބޯ ވަރަށް ބޮޑަށް ފަޅައިގެންދިޔަ އެވެ. ނަމަވެސް މުޒާހަރާގެ ތެރޭގައި އައި ހަމަނުޖެހުމުހެ އެއްވެސް ވަގުތެއްގައި އާމުންނާ ފުލުހުންނާ ދެމެދު ކުރިމަތިލުމަކަށް ނުދެއެވެ. މީހުންނަށް އެކިވަރުގެ އަނިޔާވެފައިވަނީ، ފުލުހުންގެ ސަފުތައް ރޫޅައިލަން މުޒާހަރާގެ ބައިވެރިން ކުރި މަސައްކަތުގައި އެއްބަޔަކު އަނެއް ބަޔަކަށް ކޮށްޕުމުގެ ސަބަބުންނެވެ. މައުމޫން ފެކްޝަންގެ މުޒާހަރާ ނިންމާލީ މައުމޫން ދިރިއުޅުއްވާ އަލިވާގޭދޮށަށެވެ.