ފ. މަގޫދޫން ވަދާ ގޮސް އުޅުނު ދެމީހަކަށް ކަނޑު ހަރުފައެއް ފެނިއްޖެ އެވެ.
އެ ކަނޑު ހަރުފަ ފެނުނު ފަރާތްކަމަށްވާ މުހައްމަދު ރަފީއު "ސަން" އަށް މައުލޫމާތު ދެމުން ބުނީ، އިއްޔެރޭ ފަތިހު ވަދާ ގޮސް އުޅެނިކޮށް އެ ހަރުފަ ފެނިފައިވަނީ ގާތްގަނޑަކަށް ހެނދުނު 6:00 ކަންހާއިރު ކަމަށެވެ.
ރަފީއު ބުނީ، ވަދާގޮސް އުޅެނިކޮށް އެ ހަރުފަ ފެނިފައިވަނީ މަސް ބާނަން ގެންގުޅުނު ނަނުގައި އޮޅިފައި އޮއްވައި ކަމަށާއި ހަރުފަ ފެނުމާއެކު އޭތި ނަގައި ޓައްޕަކަށްލައި މަތި ޖެހުމަށްފަހު އެރަށަށް ގެންގޮސްފައިވާ ކަމަށެވެ.
"ގާތްގަނޑަކަށް ހެނދުނު ހައެއް ޖަހާކަންހާއިރު އެ ފެނު ހަރުފަ ފެނިފައިވަނީ. އޭތި އޮތީ ނަނުގައި އޮޅިފައި. ބުޅީގައި އެޅިފައެއް ނޫން އޮތީ،" ރަފީއު ބުންޏެވެ.
އެ ހަރުފަ ރަށަށް ގެނައުމަށްފަހު އެރަށު ޕޮލިސްޓޭޝަނާ އޭތި ހަވާލު ކޮށްފައިވާ ކަމަށްވެސް ރަފީއު ބުންޏެވެ.
މަގޫދޫ ބަޔަކަށް އިއްޔެ ފެނިފައިވަނީ ކަނޑު ހަރުފައެއް ކަމަށް އެރަށު ފުލުހުން ވަނީ ކަށަވަރު ކޮށްދީފައެވެ.
މަގޫދޫ ޕޮލިސްޓޭޝަނުން މައުލޫމާތު ދެއްވަމުން ޕޮލިސް ލާންސް ކޯޕްރަލް އިބްރާހިމް ނަދީމު ވިދާޅުވީ، އެ ހަރުފަ ފުލުހުންގެ ބެލުމުގެ ދަށަށް ގެނެސް، ފެން އަޅާފައި ހުރި ޓައްޕަކަށްލައި މަތި ޖަހާފައި ބަހައްޓާފައިވާ ކަމަށެވެ. އަދި ފަހުން ބެލިއިރު އެ ހަރުފަ އޮތީ މަރުވެފައި ކަމަށްވެސް އޭނާ ވިދާޅުވިއެވެ.
ނަދީމު ވިދާޅުވީ، މިހާރު އެ ހަރުފަ ނައްތާލާފައިވާ ކަމަށެވެ.