ޓީވީއެމުން ގެނެސްދިން "އެހަނދާނުގައި ޝޯ" ދެ އަހަރަށް ފަހު މިއަހަރު އަލުން ބެލުންތެރިންނާ ހަމައަށް ގެނެސްދޭ ގޮތަށް ހަމަޖައްސައިފި އެވެ.
"އެހަނދާނުގައި ޝޯ" ގެ ޕްރޮޑިއުޝަރު އައިޝަތު ޝަފްއާ ޝާހިދު މިއަދު 'ސަން' އަށް ބުނީ އެހަނދާނުގެ ޝޯ ދެ އަހަރުގެ ބްރޭކަކަށް ފަހު އަލުން ބެލުންތެރިންނާ ހަމައަށް ގެނެސްދޭނީ އެންމެ ފުރަތަމަވެސް އެ ޝޯ ބެލުންތެރިންނާ ހަމައަށް ގެނެސްދިން ގޮތަށް ކަމަށެވެ.
"އާއްމުން ބޭނުންވަނީ އެ ޝޯ އެންމެ ފުރަތަމަ ގެނެސްދިން ސްޓައިލަށް ގެނެސްދޭން. އެހެންވެ އެގޮތަށް މިފަހަރުގެ ޝޯ ގެނެސްދިނުމަށް ހަމަޖެހިފައިވަނީ. މިފަހަރުގެ ޝޯގައި އެ ހަނދާނަށް މުޅިން އާ ތަރިންނާއި 90 ގެ އަހަރުތަކުން ފެށިގެން މަޝްހޫރު ބައެއް ތަރިންގެ އިތުރުން އެހަނދާނުގެ ކުރީގެ ބައިވެރިންގެ ލަވަތައް ވެސް ހިމެނޭނެ،" ޝަފްއާ ބުންޏެވެ.
އެހަނދާނުގެ މިއަހަރުގެ ޝޯގައި 28 ލަވައެއް ހިމަނާފައިވާއިރު 50 އަކަށް ލަވަކިޔުންތެރިން ފެނިގެންދާނެ އެވެ. އަދި މިހާރު ކުރިއަށްދަނީ ލަވަކިޔުންތެރިން ސެލެކްޓްކުރުމާއި ލަވަތައް ސެލެކްޓް ކުރުމުގެ މަސައްކަތް ކަމަށް ޝަފްއާ ބުންޏެވެ.
އެހަނދާނުގައި ޝޯއަކީ ކުރީގެ މަޝްހޫރު ބައެއް ލަވަކިޔުންތެރިންނާއި ލަވަތައް ބެލުންތެރިންނާ ހަމައަށް ގެނެސްދީ ހަނދާންތަކެއް އާ ކޮށްދިން ވަރަށް ގިނަ ބައެއްގެ ތަރުހީބު ލިބިފައިވާ ޝޯއެކެވެ.