ގާސިމް ވާހަކަފުޅު ދައްކަވަނީ ޝަރުއީ އިލްމުގެ ބަދަލުގައި ސިޔާސީ ގޮތުން: ޕީޖީ

ކުރީގެ ރައީސް މުހައްމަދު ނަޝީދުގެ މައްޗަށް އުފުލާފައިވާ ދައުވާ އަބުރާ ގެންދިއުމަށް ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމް ގޮވާލައްވާފައި ވަނީ ގާނޫނީ އަދި ޝަރުއީ އިލްމުގެ އަލީގައި ކަންކަން ހިނގަންޖެހޭނެ ގޮތުގެ ބަދަލުގައި ސިޔާސީ ގޮތުން ކަމަށް ޕްރޮސެކިއުޓާ ޖެނަރަލް (ޕީޖީ)ގެ އޮފީހުން ބުނެފި އެވެ.

ޕީޖީ އޮފީހުން މިއަދު ނެރުނު ބަޔާނުގައި ބުނެފައި ވަނީ ގާނޫނު އަސާސީގެ ރޫހާ ހިލާފަށް ގާސިމް އިބްރާހިމް ވާހަކަފު ދެއްކެވި ކަމަށާއި އެމަނިކުފާނާމެދު އަޅާނެ ފިޔަވަޅަކާމެދު ވިސްނަމުންދާ ކަމަށް ޕީޖީ މުހުތާޒު މުހުސިން ވިދާޅުވި ކަމަށް ބުނެ، މީޑިއާއަކުން ހަބަރު ގެނެސްދީފައި ވަނީ އާންމު ރައްޔިތުންނަށް އޮޅޭ ގޮތަށް ކަމަށެވެ.

އެ ބަޔާނުގައި ބުނެފައި ވަނީ ތައުލީމީ ގޮތުން މީހެއްގެ ގާބިލް ކަމާމެދު ޕީޖީ މުހުތާޒުއެއްވެސް އެއްޗެއް ވިދާޅުވެފައި ނުވާނެ ކަމަށާއި މީހެއްގެ ތައުލީމީ ގާބިލްކަމާމެދު އެއްޗެއް ވިދާޅުވުމަކީ ޕީޖީގެ މަސްއޫލިއްޔަތުގެ ތެރޭގައި ހިމެނޭ ކަމެއް ނޫން ކަމަށެވެ.

"ގާނޫނު އަސާސީގެ 27 ވަނަ މާއްދާއިން ހިޔާލުފާޅުކުރުމުގެ މިނިވަންކަން ލިބިދީފައި ވަނީ ޑިމޮކްރަޓިކް ހަމަތަކުގެ މަތިން މުޖުތަމައުގެ ރައްކާތެރިކަމާއި ހަމަޖެހުމަށް ބުރޫ ނާރާ ގޮތަށް އެ މީހަކަށް ފެންނަ ހިޔާލެއް ފާޅުކޮށް ވާހަކަދެއްކުމުގެ އުސޫލުގެ މަތިންނެވެ. އަދުލު އިންސާފާއި ޖިނާއީ އަދުލުގެ ނިޒާމް ފުނޑުފުނޑުވެ، ގައުމާއި އަދި ރައްޔިތުންގެ ހަމަޖެހުން ގެއްލިގެންދިޔަ ކަމުގައި ވިޔަސް އެ މީހަކަށް ފެންނަ ހިޔާލެއް ފާޅުކޮށް ބޭނުންވާ ވާހަކައެއް ދެއްކުމުގެ ރޫހުގައެއް ނޫނެވެ،" ޕީޖީ އޮފީހުން ނެރުނު ބަޔާނުގައި ބުނެފައިވެ އެވެ.

ރައީސް ނަޝީދުގެ މައްޗަށް އުފުލާފައިވާ ދައުވާއަކީ ޝަރުއީ މަރުހަލާގައި ކުރިއަށްދާ ކަމަށްވާއިރު، ޝަރުއީ މަޖިލިސްތަކުގެ ހުކުމްތަކާމެދު ނުތަނަވަސްކަން އުފެދި ޝަރުއީ އިތުބާރު ގެއްލިދާނެ ގޮތަކަށް ވާހަކަދެއްކުމަކީ ކުރެވިގެންވާނެ ކަމެއް ނޫން ކަމަށް ވެސް ޕީޖީ އޮފީހުގެ ބަޔާނުގައި ބުނެފައިވެ އެވެ.

ގާނޫނު ނެގެހެއްޓުމަކީ ޕީޖީގެ މަސްއޫލިއްތަތެއް ކަމަށް ފާހަގަކޮށް އެ ބަޔާނުގައި ބުނެފައި ވަނީ ގާނޫނު ނަގަހައްޓައި ދެމެހެއްޓުމަށް ބައްލަވަންޖެހޭ ކަންކަން ބައްލައި ފިޔަވަޅު އަޅުއްވަންޖެހޭތީ، އެ މަސައްކަތް ކުރައްވަމުން ގެންދަވާނެ ކަމަށެވެ.

"މި ފުރުސަތުގައި ހުރިހާ ފަރާތަކުން ވެސް، ގާނޫނީ އިމުގެ ތެރޭގައި ހަރަކާތްތެރިވުމަށް ވެސް އިލްތިމަސް ކުރަމެވެ،" ބަޔާނުގައި ބުނެފައިވެ އެވެ.

ޖުމްހޫރީ ޕާޓީގެ މައި ޖަހަގަ، ހ. ކުނޫޒުގައި މީޑިއާ ބައްދަލު ކުރައްވައި ގާސިމް ވިދާޅުވީ ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ހައްޔަރުކުރި މައްސަލާގައި ކުރީގެ ރައީސް މުހައްމަދު ނަޝީދުގެ މައްޗަށް ހިންގާ ޝަރީއަތަކީ "ޒާތީ މައްސަލައެއް" ކަމަށެވެ.