ކާށިދޫ ދާއިރާގެ ސްކޫލްތަކުގައި ކިޔަވައިދެމުންދާ ޓީޗަރުންގެ ތެރެއިން ޑިޕްލޮމާ ފެންވަރަށް ކިޔަވަން ބޭނުންވާ ޓީޗަރުންގެ ކޯސް ފީގެ ދެބައިކުޅަ އެއްބައި ދެއްވުމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ފައިސަލް ނަސީމް ނިންމައިފި އެވެ.
ފައިސަލް ހިންގަވަމުން ގެންދަވާ، ފައިސަލް ފައުންޑޭޝަނުން ބުނީ، ރާއްޖޭގެ ގައުމީ ޔުނިވާސިޓީން ޑިޕްލޮމާ ފެންވަރަށް ކިޔަވަން ބޭނުންވާ ކ. ކާށިދޫ އަދި ކ. ގާފަރުގެ ސްކޫލްތަކުގެ ޓީޗަރުންގެ ކޯސް ފީގެ 50 ޕަސެންޓް ދެއްވުމަށް ނިންމާފައި ވަނީ ސަރުކާރުން ގެންނަ ބަދަލެއްގެ ސަބަބުން އެއްވެސް ޓީޗަރެއްގެ ވަޒީފާ ގެއްލެން ބޭނުންނުވާތީ ކަމަށެވެ.
ރާއްޖޭގެ ސްކޫލުތަކުގައި ޑިޕްލޮމާ ފެންވަރު ނެތް 1236 ޓީޗަރުން ކިޔަވައިދެމުންދާއިރު، އެޑިއުކޭޝަން މިނިސްޓްރީން އެކުލަވާލާފައިވާ މުދައްރިސުންގެ އޮނިގަނޑުގެ ދަށުން، މިއަހަރުގެ ނިޔަލަށް ދަށް ވެގެން ޑިޕްލޮމާ ފެންވަރަށް ތައުލީމް ހާސިލްނުކުރާ ޓީޗަރުން ވަޒީފާ އިން ވަކިކުރެވޭނެ އެވެ.
ނަމަވެސް، މިހާރު ސިސްޓަމުގައި ތިބި ޑިޕްލޮމާ ފެންވަރަށްވުރެއް ދަށް ފެންވަރުގެ ޓީޗަރުންނަށް ވަޒީފާގައި ތިބެގެން ކިޔެވޭނެ މަގު ފަހިކޮށްދިނުމަށްޓަކާ އެޑިއުކޭޝަން މިނިސްޓްރީން ވަނީ ހާއްސަ ޕްރޮގްރާމެއް ފަށާފަ އެވެ.
އެ ޕްރޮގްރާމްގެ ދަށުން ސެޓްފިކެޓް ފެންވަރުގެ ޓީޗަރުން ޑިޕްލޮމާ ފެންވަރަށް ކިޔެވުމުގެ ފުރުސަތު ގައުމީ ޔުނިވާސިޓީ މެދުވެރިކޮށް ހުޅުވާލާފައިވާއިރު، އެ ކޯހުގެ ފީއަކީ 4770 ރުފިޔާ އެވެ.
"އަޅުނގަޑުމެން ބޭނުމެއް ނުވޭ ސަރުކާރުން، އަޅާ ކުއްލި ފިޔަވަޅެއްގެ ސަބަބުން އެއްވެސް ޓީޗަރެއްގެ ވަޒީފާ ގެއްލޭކަށް، އަޅުނގަޑުމެން ވީ ވަރަކުން ކާށިދޫ އަދި ގާދަރުގެ ހުރިހާ ޓީޗަރުންނަށް އިތުރު ތަމްރީނު ހޯދައިދީ އެމިހުންނަށް ވަޒީފާ ގެރެންޓީ ކޮށްދިިނުމަށް އެހީތެރިވެދޭނަން،" ފައިސަލް ފައުންޑޭޝަންގެ ޗެއާމަން ފައިސަލް ވިދާޅުވެފައިވެ އެވެ.
ކ. ކާށިދޫ ދާއިރާއަށާއި ހާއްސަ އެހީއަށް ބޭނުންވާ ކުދިންނަށް ގިނަ ހިދުމަތްތަކެއް ކޮށްދެމުންދާ މެމްބަރު ފައިސަލް ވިދާޅުވީ، ކުރިއަށް އޮތް ފަސް އަހަރުގެ ތެރޭގައި އެ ދެ ރަށުގެ ޓީޗަރުންނަށް ރަނގާޅު ކުރިއެރުމެއް ލިބިގެންދާނެ ކަމަށެވެ.
date_range
ބުރާސްފަތި 16 ޖެނުއަރީ 2025