ވެންގާ އަހަރެންނަށް އިތުބާރު ކުރޭ: އޮޒިލް

އާސެނަލްގެ މެނޭޖަރު އާސެން ވެންގާގެ އިތުބާރު އަބަދުވެސް ލިބޭ ކަމަށް އެޓީމަށް ކުޅެމުން އަންނަ ޖަރުމަނުގެ ކުޅުންތެރިއާ މެސިއުޓް އޮޒިލް ބުނެފި އެވެ.

މިދިޔަ މަހު ލިބުނު އަނިޔާ އަކާ ގުޅިގެން މިހާރު ކުޅުމާ ދުރުގަ ހުރި އޮޒިލް ބުނީ، މެނޭޖަރުގެ އިތުބާރު އަބަދުވެސް އޭނާއަށް އޮންނަ ކަމަށާއި އެކަމުގެ ސަބަބުން އޭނާގެ ކުޅުމަށް ރަނގަޅު އަސަރެއް ކުރާ ކަމަށެވެ. އަދި ވެންގާ އޭނާއަށް ކުރާ އިތުބާރު ދެމެހެއްޓޭތޯ އަބަދުވެސް މަސަތްކަތް ކުރާ ކަމަށާއި އަނިޔާ އިން އެނބުރި އައިސް ރަނގަޅު ފެންވަރެއްގައި ކުޅެވޭނެ ކަމާމެދު ޝައްކު ނުކުރާ ކަމަށް ވެސް އޮޒިލް ބުންޏެވެ.

" ވެންގާ އަހަރެންނަށް އިތުބާރު ކުރޭ. އެކަމުގެ ސަބަބުން އަހަރެންގެ ކޮންފިޑެންސް ލެވެލް އިތުރުވެ ކުޅުން ރަނގަޅު ވެގެންދޭ. ވެންގާ އަހަރެންނަށް ކުރާ އިތުބާރު ދެމެހެއްޓޭތޯ އަބަދުވެސް މަސަތްކަތް ކުރަން. އަންނަ އަހަރު ކުރީކޮޅު ހިސާބު އަލުން އަނބުރާ ޓީމްގެ ފަރިތަކުރުން ތަކުގައި ބައިވެރިވެވޭނެހެން ހީވަނީ. އަނިޔާއިން ރަނގަޅުވެ އެނބުރި ގޮސް ރަނގަޅު ކުޅުމެއް ދެއްކޭނެކަމުގެ ޔަގީންކަން އެބައޮތް، " އޮޒިލް ބުންޏެވެ.

އުމުރުން 27 އަހަރުގެ އޮޒިލް ބުނީ، އާސެނަލްގައި އޭނާ ހޭދަކުރަމުންދަނީ އުފާވެރި ދުވަސްތަކެއް ކަމަށާއި މީޑީއާގައި ކިތަންމެ ވަރަކަށް ފާޑު ކިއުންތައް އޭނާއަށް އަމާޒުވި ކަމުގައިވިޔަސް އެކަމާ އަޅައި ނުލާނެ ކަމަށެވެ. އަދި އާސެނަލް އަށް ކުޅެނީ އަބަދުވެސް ކާމިޔާބަށް އެދިގެން ކަމަށާއި މިސީޒަންގައި ރަނގަޅު ކާމިޔާބެއް ހޯދޭނެ ކަމަށެވެ.

މިދިޔަ ސީޒަންގައި ރެކޯޑް ފީ އަކަށް ސްޕެއިންގެ ރެއާލް މެޑްރިޑުން އާސެނަލް އަށް ބަދަލުވުމަށްފަހު އޮޒިލް އަށްވަނީ އާސެނަލްގެ ސަޕޯޓަރުން އުއްމީދު ކުރިވަރަށް ފެންވަރު ނުދެއްކިފަ އެވެ.