ލޫކާ މޮޑްރިޗް އަށް އަނިޔާވެ ކުޅުމާ ދުރަށްދާން ޖެހިއްޖެ

ސްޕެއިންގެ ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ ފުޓްބޯޅަ ތަރި ލޫކާ މޮޑްރިޗް އަށް އަނިޔާވެ ތިން މަސްދުވަހަށް ކުޅުމާ ދުރަށްދާން ޖެހިއްޖެ އެވެ.

މެޑްރިޑްގެ ޕްލޭ މޭކަރު މޮޑްރިޗް ކުޅުމާ ދުރަށްދާން ޖެހުނީ އެންމެ ފަހުން ޔޫރޯ ކޮލިފަޔާސްގައި އިޓަލީ އާ ވާދަކުރި މެޗުގައި އޭނާގެ ފައިގެ ފަލަ މަސްގަނޑަށް ލިބުނު އަނިޔާ އަކާ ގުޅިގެންނެވެ. މެޗުގައި އޭނާ އަށް ލިބުނު އަނިޔާގެ ސަބަބުން ފުރަތަމަ ހާފުގެ ކުރީކޮޅު އޭނާ ވަނީ ބަދަލުކޮށްފަ އެވެ.

ކުރިން އިނގިރޭސިވިލާތުގެ ޓޮޓެންހަމް އަށްވެސް ކުޅުނު މިޑްފީލްޑަރަށް އަނިޔާވުމުގެ ސަބަބުން ރެއާލްގެ ކޯޗު ކާލޯ އެންޗެލޯޓީ އަށް ވަނީ ނުތަނަވަސްކަމަކާ ކުރިމަތިލާން ޖެހިފަ އެވެ. މޮޑްރިޗް ވަނީ މިސީޒަންގައި ރެއާލް މެޑްރިޑްގެ މެދުތެރޭގައި މޮޅު ދައްކައި އެޓީމުން މި ސީޒަންގައި ކާމިޔާބުކޮށްފައިވާ ގިނަ ގޯލްތައް އެސިސްޓް ކޮށްދީފަ އެވެ.

ރެއާލް މެޑްރިޑުގެ ޓީމުން މޮޑްރިޗް ބާކީ ވުމާ ގުޅިގެން ޓީމުގައި އޭނާ ނެތްތަން ފޫބައްދާނެ ކަމަށް ބެލެވެނީ ޖަރުމަނުގެ ކުޅުންތެރިއާ ސެމީ ކެޑީރާ އެވެ. ނިމިގެންދިޔަ ހޫނު މޫސުމުގެ ޓްރާންސްފާގައި ރެއާލް މެޑްރިޑުން ޖޭމްސް ރޮޑްރިގޭޒް އާއި ޓޯނީ ކްރޫސް ފަދަ މޮޅެތި ކުޅުންތެރިންގެ ސޮއި އަތުލުމާ ގުޅިގެން ކެޑިރާ އަށް މެޑްރިޑުގެ ފުރަތަމަ އެގާރައިން ޖާގަ ލިބުން ވަނީ މަދުވެފަ އެވެ.

މި ފަހަރުގެ ޖެނުއަރީ ޓްރާންސްފާގައި ކެޑީރާ އާސެނަލް އަށް ބަދަލުވާން އުޅޭ ކަމުގެ ވާހަކަތައް މީގެ ކުރިން ވަނީ ފެންމަތިވެފަ އެވެ. ނަމަވެސް މޮޑްރިޗް އަށް އަނިޔާވެ ކެޑީރާގެ ބޭނުން ޖެހިފައިވުމުން ޖެނުއަރީ ޓްރާންސްފާގައި އެންޗެލޯޓީ ކެޑިރާ ވިއްކާލާނެ ކަމާމެދު ވަނީ ސުވާލު އުފެދިފަ އެވެ.