މަސައްކަތެއް ނެތިގެން މަޖިލީހުގެ މާދަމާގެ ޖަލްސާ ވެސް ނުބާއްވަން ނިންމައިފި

ރައްޔިތުން މަޖިލީހުގެ ޖަލްސާ އަށް ތަވާލުކުރާނެ މަސައްކަތެއް ނެތިގެން މާދަމާގެ ޖަލްސާ ވެސް ނުބާއްވަން ނިންމައިފި އެވެ.

ރައްޔިތުން މަޖިލީހުގެ ޖަލްސާ ބާއްވައިގެން ކުރާނެ ވަކި މަސައްކަތެއް ނެތިގެން މިދިޔަ ހަފްތާގެ ބުދަ ދުވަހު ވެސް ޖަލްސާއެއް ނުބާވްއަ އެވެ. މިދިޔަ ހަފްތާގައި އަންގާރަ ދުވަހު މަޖިލީހުގެ ޖަލްސާ ނިންމަވާލައްވަމުން އެ ދުވަހު ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް ރީކޯ މޫސާ މަނިކު ވިދާޅުވީ ޖަލްސާ އަށް އެޖެންޑާ ކުރާނެ މަސައްކަތެއް ނެތިގެން ޖަލްސާ ބުދަ ދުވަހު ނޯންނާނެ ކަމަށެވެ. އަދި ޖަލްސާ ބާއްވާނެ ދުވަހެއް ފަހުން އަންގަވާނެ ކަމަށެވެ.

މަޖިލީހުގެ އަމީން އާންމު "ސަން" އަށް މިރޭ ވިދާޅުވީ މަޖިލީހުގެ ޖަލްސާ މާދަމާ ވެސް ނުބާއްވަން ނިންމާފައި ވަނީ އެންމެ ފަހުން މަޖިލީހު ޖަލްސާ ނިންމަވާލެއްވަމުން ރިޔާސަތުން އަންގަވާފައިވާ ގޮތަށް އެޖެންޑާކުރާނެ ކަމެއް ނެތުމުން ކަމަށެވެ.

"އެންމެ ފަހުން މަޖިލީހުގެ ޖަލްސާ ބޭއްވި ދުވަހު ރިޔާސަތުން ވިދާޅުވެފައި ވަނީ ޖަލްސާ ދެން ބާއްވާނެ ދުވަހެއް އަންގާލާނެ ކަމަށް. މާދަމާ ވެސް ޖަލްސާ ނުބާއްވާ ގޮތަށް ހަމަޖައްސާފައި ވަނީ،"

ރައްޔިތުން މަޖިލީހުގެ ކޮމެޓީތަކުގެ މަސައްކަތްތައް ނިންމުމުގައި ކޮމެޓީގެ މުގައްރިރުން ހާއްސަ އިސްކަމެއް ދެއްވުމަށް މަޖިލީހުން ބޭއްވި އެންމެ ފަހު ޖަލްސާގައި ނައިބު ރައީސް މޫސަ ވަނީ އެދިވަޑައިގެންފަ އެވެ.

މަޖިލީހުގެ ގަވައިދުގައިވާ ގޮތުގެ މަތީން ކޮންމެ ހަފްތާ އަކު ތިން ދުވަހު މަޖިލީހުގެ ޖަލްސާތައް ބާއްވަން ޖެހެ އެވެ. މަޖިލީހުގެ އާންމު ޖަލްސާތައް ބާއްވަމުން ދަނީ ކޮންމެ ހަފްތާއެއްގެ ހޯމަ، އަންގާރަ، ބުދަ ދުވަހު އެވެ.

މަޖިލިސް މެމްބަރުންނަށް މުސާރަ އާއި އެލަވަންސްގެ ގޮތުގައި މަހަކު 82،500 ރުފިޔާ ލިބިވަޑައިގަންނަވަ އެވެ. މަޖިލިސް މެމްބަރުންގެ އަސާސީ މުސާރައަކީ 42،500 ރުފިޔާ އެވެ. ލިވިން އެލަވަންސްގެ ގޮތުގައި މެމްބަރުންނަށް 20،000 ރުފިޔާ ލިބިވަޑައިގަންނަވާ އިރު، ކޮމެޓީ އެލަވަންސްގެ ގޮތުގައި ވެސް 20،000 ރުފިޔާ ލިބިވަޑައިގަންނަވާނެ އެވެ.

ރައްޔިތުންގެ މަޖިލީހުގެ މެމްބަރުން ނަންގަވާ މުސާރައަކީ އެބޭފުޅުންގެ ޚިދުމަތާ ނުބައްދަލު އެއްޗެއް ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވެސް ވަނީ މިދިޔަ ފެބްރުއަރީ މަހު ވިދާޅުވެފަ އެވެ.