ދިވެހިން އަނެއްކާ ވެސް ބަދަލަކަށް ބޭނުންވޭ: މައުމޫން

ދިވެހި ރައްޔިތުން އަނެއްކާ ވެސް ބަދަލަކަށް ބޭނުންވެފައިވާ ކަމަށާއި އެ ބަދަލު ގެނެވޭނީ ކުރިއަށް އޮތް ލޯކަލް ކައުންސިލް އިންތިހާބު ޑީއާރުޕީއަށް ކާމިޔާބު ކުރެވިގެން ކަމަށް ކުރީގެ ރައީސުލްޖުމްހޫރިއްޔާ އަދި ޑީއާރުޕީގެ ޒައީމް އަލްއުސްތާޒު މައުމޫން އަބްދުލް ގައްޔޫމް ވިދާޅުވެއްޖެ އެވެ.

ޑީއާރުޕީގެ ޓިކެޓްގައި މާލޭ ސިޓީ ކައުންސިލަށް ކުރިމަތިލި 11 ކެންޑީޑޭޓުންގެ ތެރެއިން އަށް ކެނޑީޑޭޓުންނާ އެކު، ވިލިމާލޭގައި މުހްޔިއްދީން ސްކޫލްގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ މިހާރު ރާއްޖޭގައި ކަންތައްތައް ހިގަމުންދަނީ ދިވެހި ރައްޔިތުން ރުހޭ ގޮތަކަށް ނޫން ކަމަށާއި ރާއްޖޭގެ އިގްތިސާދު ދަށަށް ގޮސް ގާނޫނުތަކަށް ހުރުމަތްތެރިކޮށް ހިތުން ނެތިގެން ގޮސްފައިވާ ކަމަށެވެ. އަދި ރާއްޖޭގައި މާރާމާރީ އިންތިހާއަށް އިތުރުވެ، އެތައްހާސް ބައެއްގެ ވަޒީފާ ގެއްލިފައިވާ ކަމަށް ރައީސް މައުމޫން ވިދާޅުވި އެވެ.

"މިވަގުތު އަޅުގަނޑުމެން މިވަނީ އަނެއްކާ ވެސް ބަދަލަކަށް ބޭނުންވެފައި. މިހާރު ކަންތައްތައް ހިނގަމުންދާ ގޮތަކީ ދިވެހި ރައްޔިތުންގެ ވަރަށް ގިނަ ބަޔަކު ހިތްމަޖެހޭ ގޮތެއް ނޫން. އަޅުގަނޑުމެންގެ އިގްތިސާދީ ހާލަތު މިވަނީ ވަރަށް ބޮޑަށް ދަށަށް ގޮސްފައި. ގާނޫނު އަސާސީ އާއި ގާނޫނުތަކަށް ހުރުމަތްކޮށް ހިތުން މިވަނީ މުޅިން ނެތިގެން ގޮސްފައި. މާރާމާރީ އާއި މި ބާވަތުގެ އަމަލްތައް މިވަނީ އިންތިހާއަށް އިތުރުވެފައި. އެތައް ހާސް ބަޔެއްގެ ވަޒީފާ ވަނީ ގެއްލިފައި. އެ މީހުންނަށް ލިބޭ އާންމުދަނީ ވަނީ ކުޑަކުރެވިފައި." ޑީއާރުޕީގެ ޒައީމް މައުމޫން ވިދާޅުވި އެވެ.
~
އެމަނިކުފާނު ވިދާޅުވީ ސަރުކާރުގެ މަގާމުތައް ދެނީ ވަކި ޕާޓިއެއްގެ މީހުންނަށް ކަމަށާއި ތަރައްގީގެ މަޝްރޫތަކުގެ މަސައްކަތްތައް ވެސް ހަވާލުކުރަނީ ވަކި ޕާޓީއަކަށް ނިސްބާތްވާ މީހުންނަށް ކަމަށެވެ.
މިހާރުގެ ސަރުކާރުން ދީނީ ކަންތައްތައް އިހުމާލުވެފައިވާ ކަމަށް ވިދާޅުވެ ޒައީމް މައުމޫން ވިދާޅުވީ އިސްލާމްދީނާ މެދު މި ސަރުކާރުން އަމަލް ކުރަމުންދަނީ ވަރަށް އިހާނެތިކޮށް ކަމަށެވެ. އެ ގޮތުން އިސްލާމީ ތައުމީލް އުގަންނައިދޭ ތަންތަނަށް ސަރުކާރުން ދުއްތުރާކޮށް، އިސްލާމީ ތައުލީމް ފޮހެލުމަށް މި ސަރުކާރުން މަސައްކަތް ކުރާ ކަމަށް މައުމޫން ތުހުމަތު ކުރެއްވި އެވެ.

"އިސްލާމް ދީނާ މެދު މިހާރު އަމަލް ކުރަމުންދަނީ ވަރަށް އިހާނެތިކޮށް. އިސްލާމީ ތައުލީމް އުގަންނައިދޭ ތަންތަނަށް ކުރަމުން އެދޭ އުދަގުތަކާއި ދުއްތުރާތައް އަޅުގަނޑު ނުދެއްނެވިޔަސް ތިބޭފުޅުންނަށް އެނގި ވަޑައިގަންނަވާނެ. އިސްލާމީ ތައުލީމް ފޮހެލުމަށް މަސައްކަތްތަކެއް އެ ބަކުރެވޭ."

މައުމޫން އިތުރަށް ވިދާޅުވީ ރާއްޖޭގެ ހާލަތު ބަދަލު ކުރެވޭނީ ދިވެހި ރައްޔިތުންނަށް ކަމަށާއި އެއީ އެމަނިކުފާނު ދަންނަވާ ވާހަކައެއް ނޫން ކަމަށާއި އެއީ މާތް ﷲގެ ބަސްފުޅުތަކުން ހާމަކޮށްދެއްވާފައިވާ ހަގީގަތެއް ކަމަށެވެ.
"މިއީ އަޅުގަނޑު ދަންނަވާ ވާހަކައެއް ނޫން. މިއީ މާތްﷲގެ ހިކުމަތްތެރި ބަލާވާތްތެރި ބަސްފުޅަކުން އަޅުގަނޑުމެންނަށް ހާމަކޮށްދެއްވާފައިވާ ވަރަށް ބޮޑު ހަގީގަތެއް."

ކީރިތި ގުރުއާނުގެ އަޔާތްތަކުން ދަލީލު ދައްކަވަމުން ރައީސް މައުމޫން ވިދާޅުވީ "ހަމަކަށަވަރުން ބަޔަކު މީހުންގެ ހާލަތު، އެބަޔަކު އަމިއްލަ އަށް ބަދަލުކޮށްފުމަށް ދާންދެން، ﷲ އެބައެއްގެ ހާލަތު ބަދަލުނުކުރައްވާނެ." ކަމަށެވެ.
ހާލަތު ބަދަލުކޮށް، ރައްޔިތުން އެދޭ ބަދަލެއް ގެނައުމަށްޓަކައި ކުރިއަށް އޮތް ލޯކަލް ކައުންސިލް އިންތިހާބުގައި ރަށު ކައުންސިލްތަކަށާއި އަތޮޅު ކައުންސިލްތަކަށާއި ސިޓީ ކައުންސިލްތަކަށް ޑީއާރުޕީގެ ފަރާތުން ކުރިމަތިލާފައިވާ ކެނޑިޑޭޓުންނަށް ވޯޓް ދެއްވުމަށް ރައީސް މައުމޫން ރައްޔިތުންގެ ކިބައިން އެދިވަޑައިގެންނެވި އެވެ.
ލޯކަލް ކައުންސިލް އިންތިހާބު ޑީއާރުޕީއަށް ކާމިޔާބުވެއްޖެ ނަމަ ރައްޔިތުންނަށް ހަމަޖެހުމާއި ބާއްޖެވެރިކަން ގެނެވޭނެ ކަމަށާއި ތަރައްގީގެ އާއުސްމިންތަކަށް ކުރިއަރައިދިއުމަށް އެއްވެސް ހުރަހެއް ކުރިމަތި ނުވާނެ ކަމަށް އެމަނިކުފާނު ވިދާޅުވި އެވެ.

ޑީއާރުޕީގެ ޒައީމް މައުމޫން ރޭ ވިލިމާލެއަށް ވަޑައިގަތުމުން އެމަނިކުފާނުގެ އިސްތިގުބާލުގައި ބޮޑުބެރާއި ސަގާފީ ފަރި ހަރަކާތްތައް ކުރިއަށް ގެންދިޔައިރު، މައުމޫން ހިންގަވާފައި މުހްޔިއްދީން ސްކޫލަށް ވަޑަގެނެވި އިރުވެސް އެ ހަރަކާތްތަކާ އެކު، މަލުގެ ގުލްދަސްތާތައް ވިލިމާލޭގެ ރައްޔިތުން މައުމޫނަށް އަރުވަމުންދިޔަ އެވެ.

ގިނަ އަދަދެއްގެ ބަޔަކު ހާޒިރުވި އެ ޖަލްސާގައި ޑީއަރުޕީގެ ނައިބު ލީޑަރުކަމުން ވަކިކޮށްފައިވާ އުމަރު ނަސީރުގެ ފެކްޝަންގެ ބޭފުޅުނާއި އެ ޕާޓީގެ މަޖިލިސް މެންބަރުން ބައިވެރިވެވަޑައިގެންނެވި އިރު، އެ ޕާޓީގެ ލީޑަރު އަހުމަދު ތަސްމީން އަލީގެ އަރިހުގައި އުޅުއްވާ ޑީއާރުޕީގެ ސެކަޓަރީ ޖެނަރަލް އަބްދުލްރަޝީދު ނާފިޒު ވެސް ބައިވެރިވެވަޑައިގެންނެވި އެވެ.