އާ ކޯޗާއެކު އަމިއްލަ ދަނޑުގައި ޔުނައިޓެޑަށް ހިތި ފެށުމެއް

މެންޗެސްޓާ ޔުނައިޓެޑްގެ އާ ކޯޗް ލުއިސް ވެންހާލްގެ އިރުޝާދުގެ ދަށުން މެންޗެސްޓާ ޔުނައިޓެޑްގެ އަމިއްލަ ދަނޑު"އޯލްޑް ޓްރޮފޯޑް" ގައި ސްވެންސީ ސިޓީއާ ދެކޮޅަށް ކުޅުނު އިނގިރޭސި ޕްރިމިއާ ލީގުގެ ފުރަތަމަ މެޗުން 2-1 ލަނޑުން ހިތި ގޮތަކަށް ޔުނައިޓެޑް ބަލިވެއްޖެ އެވެ.

ޖުމްލަ ހަތް ރީދޫ ކާޑު ފެނިގެން ދިޔަ މެޗުގެ ފުރަތަމަ ލަނޑު ޖަހައި މެޗުގެ ލީޑް ނެގީ ސްވަންސީ އެވެ. އެ ލަނޑު މެޗުގެ 28 ވަނަ މިނެޓުގައި ސްވަންސީއަށް ކާމިޔާބު ކޮށްދިނީ ކޮރެޔާ ރިޕަބްލިކްގެ ޒުވާން މިޑްފީލްޑަރު ސޮންގް ޔޮންގް ކޫ އެވެ.

ދެ ޓީމުގެ ފަރާތުންވެސް ބަލާހިތްވާ ކަހަލަ ފޯރިގަދަ ކުޅުމެއް ފެނިގެން ދިޔަ މެޗުގެ ފުރަތަމަ ހާފްގެ ކުޅުން ނިމުނީ 1-0 ލަނޑުން ސްވަންސީ ކުރީގައި އޮވެގެންނެވެ. ނަމަވެސް މެޗުގެ ދެ ވަނަ ހާފް ފެށިގެން މާގިނައިރު ތަކެއް ނުވަނީ ޔުނައިޓެޑުން ވަނީ ލަނޑެއް ޖަހައި މެޗް ބަލަން ދަނޑަށް ވަދެތިބި އެޓީމުގެ ސަޕޯޓަރުންގެ ހިތައް ފިނިކަމެއް ގެނެސް މެޗުގެ ނަތީޖާ، ހަމަހަމަ ކޮށްފައެވެ. އެ ލަނޑު ޔުނައިޓެޑަށް ކާމިޔާބު ކޮށްދިނީ އެޓީމުގެ ފޯވާޑް އަދި ކެޕްޓަން ވޭން ރޫނީ އެވެ.

ޔުނައިޓެޑުން ލަނޑުޖަހައި މެޗުގެ ނަތީޖާ ހަމަކުރިތާ މާގިނައިރު ތަކެއް ނުވަނީސް، މެޗުގެ ލީޑް ނެގުމަށް ޔުނައިޓެޑަށް ރަނުގެ ފުރުސަތެއް ލިބުނެވެ. ރޫނީ ފޮނުވާލި ބޯޅަ އަމާޒް ވީ ގޯލުގެ އަރިމަތީ ދަނޑިއަށެވެ.

ކުޅި ބަލަން 75000 އަށް ވުރެ ގިނަ މީޙުން ދަނޑަށް ވަތް، މެޗުގައި ޔުނައިޓެޑުގެ ސަޕޯޓަރުން ސިއްސުވާލީ މެޗުގެ 72 ވަނަ މިނެޓުގައި ސްވަންސީން އިތުރު ލަނޑެއް ޖަހައި ދެ ވަނަ ފަހަރަށް މެޗުގެ ލީޑް ނެގުމުންނެވެ. ލީގުގެ ފުރަތަމަ ތިން ޕޮއިންޓް ސްވެންސީއަށް ކާމިޔާބު ކޮށްދިން އެ ލަނޑު ޖަހައިދިނީ އައިސް ލެންޑުގެ ޒުވާން މިޑްފީލްޑަރު ގިލްފީ އެވެ.

މިއަދުގެ މެޗުން ޔުނައިޓެޑް 2-1 ލަނޑުން ބަލިވިއިރު، މިދިޔަ ސީޒަންގައި ޔުނައިޓެޑް ވަނީ 4-0 ލަނޑުން ސްވަންސީ ބަލިކޮށްފައެވެ.