ކައުންސިލް އިންތިހާބު ޑީއާރުޕީ ކާމިޔާބު ކުރުމަކީ އިސްލާމް ދީން ލާޒިމް ކުރާ ކަމެއް: ޒައީމް މައުމޫން

ކުރިއަށް އޮތް ލޯކަލް ކައުންސިލްތަކުގެ އިންތިހާބު ޑީއާރުޕީން ކާމިޔާބު ކުރުމަކީ އިސްލާމް ދީން އަޅުގަނޑުމެންގެ މައްޗަށް ލާޒިމް ކުރާ ކަމެއް ކަމަށް ކުރީގެ ރައީސް އަދި ޑީއާރްޕީގެ ޒައީމް މައުމޫން އަބްދުލް ޤައްޔޫމް މިރޭ ވިދާޅުވެއްޖެ އެވެ.

ލޯކަލް ކައުންސިލް އިންތިހާބުގެ ކެމްޕެއިނާއި ޑީއާރްޕީގެ އެތެރޭގައި އުފެދިފައިވާ ހިޔާލުތަފާތުވުން ހައްލު ކުރުމަށް ކ. ގުރައިދޫގައި ބޭއްވި ހާއްސަ ޖަލްސާއެއްގައި ޑީއާރުޕީން ކައުންސިލް އިންތިހާބު ކާމިޔާބު ކުރުމުގެ މުހިންމުކަން ފާހަގަ ކުރައްވަމުން މައުމޫން ވިދާޅުވީ އިސްލާމް ދީނާއި އަގީދާ ރައްކާތެރި ކުރެވޭނީ ޑީއާރްޕީއަށް ކައުންސިލް އިންތިހާބު ކާމިޔާބު ކުރެވިގެން ކަމަށެވެ. އަދި ރާއްޖޭގެ ސަލާމަތާއި އަމަންއަމާންކަން ދެމެހެއްޓޭނީ ވެސް ކައުންސިލް އިންތިހާބު ޑީއާރްޕީން ހޯދައިގެން ކަމަށް އެމަނިކުފާނު ވިދާޅުވި އެވެ.

"ކައުންސިލްތަކުގެ އިންތިހާބު އަޅުގަނޑުމެން ކާމިޔާބު ކުރުމަކީ ވަރަށް މުހިންމު ކަމެއް. އޭރުން އަޅުގަނޑުމެން ބޭނުންވާ އުސޫލުތަކާ ހަމަތަކާ އެއްގޮތްވާ ގޮތުގެ މަތީން ރާއްޖޭގެ ކަންތައްތައް ހިނގަމުންދާނީ. އޭރުން އަޅުގަނޑުމެންނަށް، އަޅުގަނޑުމެންގެ މާތް ދީނާއި އަގީދާ ރައްކާތެރި ކުރެވޭނީ. އޭރުން އަޅުގަނޑުމެންނަށް ރާއްޖޭގެ ރައްޔިތުންނަކީ އެކުވެރި އެއްބައިވަންތަ ބައެއްގެ ގޮތުގައި ދެމެހެއްޓޭނީ. އޭރުން ރާއްޖޭގެ ސަލާމަތާއި އަމަންއަމާންކަން ހިފެހެއްޓޭނީ،" މައުމޫން ވިދާޅުވި އެވެ. އެހެންވީމަ މި އިންތިހާބު ކާމިޔާބު ކުރުމަކީ އަޅުގަނޑުމެންގެ މައްޗަށް އަޅުގަނޑުމެންގެ ގައުމު، އަޅުގަނޑުމެންގެ ދީން ލާޒިމް ކުރާ ކަމެއް."
~
މައުމޫން ވިދާޅުވީ ކޮންމެ ބައެއްގެ ތެރޭގައި ވެސް ހިޔާލު ތަފާތުވުން އުފެދޭނެ ކަމަށެވެ. ނަމަވެސް އޭގެ މާނައަކީ އެ ބައެއްގެ ތެރޭގައި ބައިބައިވުން އުފެދުން ނޫން ކަމަށް ވެސް އެމަނިކުފާނު ވިދާޅުވި އެވެ. އަދި ވިދާޅުވީ އެމަނިކުފާނު މިވަގުތު އެންމެ ބޮޑު އިސްކަމެއް ދެއްވާނީ ޕާޓީ ތެރޭގައި އޮތް ހިޔާލުތަފާތުން ވީހާވެސް ސުލްހަވެރިކަމާއެކު ހައްލު ކުރުމަށް ކަމަށެވެ.

"ކޮންމެ އިންސާނީ ޖަމާއަތެއްގެ ތެރޭގައި ވެސް ހިޔާލުތަފާތުވުން އުފެދޭނެ. އެއީ ހަމަ ތޮބީއީ ކަމެއް. އެންމެންނަކަށް އަބަދަކު އެއް ވިސްނުމެއް ނުގެންގުޅެވޭނެ. މިއީ އަޅުގަނޑުމެން ގަބޫލު ކުރަންޖެހޭނެ ހަގީގަތެއް. އެހެން ނަމަވެސް އޭގެ މާނައަކީ އެ ޖަމާއަތެއްގެ ތެރޭގައި ބައިބައިވުން އުފެދެންވީއަކީ ނޫނޭ،" މައުމޫން ވިދާޅުވި އެވެ.

އެމަނިކުފާނު ވިދާޅުވީ އެމަނިކުފާނު ބައެއް ޖަލްސާތަކުގައި ބައިވެރިވެވަޑައިގަންނަވާތީ މިފަހަކަށް އައިސް ބައެއް ފަރާތްތަކުން ސުވާލު އުފއްދަމުންދާ ކަމަށެވެ. އެކަމަކު ޑީއާރުޕީގެ ސިޔާސީ ޒައާމަތުން ދުރަށް ދިޔަ ނަމަވެސް ޑީއާރުޕީގެ މެންބަރެއްގެ ގޮތުގައި ހުންނަވައި ޕާޓީގެ ހެވާ ލާބައަށް މަސައްކަތް ކުރައްވާނެ ކަމަށް އެމަނިކުފާނު ވައުދުވެވަޑައިގެންފައި އޮންނާނެ ކަމަށް މައުމޫން ވިދާޅުވި އެވެ. އެހެންކަމުން މިހާރު ކުރައްވަން ގެންދަވާ މަސައްކަތަކީ އެ ވައުދު ފުއްދެވުން ކަމަށް މައުމޫން ވިދާޅުވި އެވެ.