ޖޭއެސްސީގެ އާންމު މެމްބަރު ކަމުގެ ގޮނޑިއަށް ކުރިމަތިލާން މަޖިލީހުން ހުޅުވާލައިފި

އާންމުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ)އަށް ރައްޔިތުންގެ މަޖިލީހުން ކަނޑައަޅާ މެމްބަރު ކަމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.

އެ މަގާމަށް ކުރިމަތިލާ މީހުންގެ ޝަރުތަކީ ހައްދެއް ކަނޑައަޅާފައިވާ ކުށެއް، ހިޔާނާތުގެ ކުށެއް، ނުވަތަ ރިޝްވަތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުމާއި ސިޔާސީ މަގާމެއް ފުރަމުންދާ މީހަކު ކަމުގައި ނުވުމާއި ސިޔާސީ ޕާޓީއެއްގެ މެމްބަރަކަށް ނުވުމާއި ބުއްދި ސަލާމަތުން ހުރި 25 އަހަރުވެފައިވާ މީހަކަށް ވާންޖެހޭނެ އެވެ.

މަޖިލީހުގެ އިދާރާއިން މިއަދު ކުރި އިއުލާންގައި ބުނެފައި ވަނީ އެ މަގާމަށް ޝައުގުވެރިވާ ފަރާތްތަކުން މިއަދުން ފެށިގެން މި މަހުގެ 13 ވަނަ ދުވަހުގެ މެންދުރު 12:00 ކުރިން މަޖިލީހަށް ސިޓީ ހުށަހެޅުއްވަން ޖެހޭނެ ކަމަށެވެ. އެ ސިޓީއާއެކު ތައުލީމީ ސެޓްފިކެޓްތަކުގެ ކޮޕީއާއެކު އެ މީހެއްގެ ވަނަވަރާއި މަސައްކަތުގެ ތަޖުރިބާގެ މައުލޫމާތު ހިމެނޭ ލިޔުން މަޖިލީހުގެ އިދާރާއަށް ހުށަހަޅަންވާނެ ކަމަށް އިއުލާންގައިވެ އެވެ.

ޖޭއެސްސީގައި މިހާރު އާންމު މެމްބަރެއްގެ ގޮތުގައި އިންނަވަނީ ޝެއިހް ޝުއައިބު އަބްދުލް ރަހުމާނެވެ.

ޖޭއެސްސީގެ އާންމު މެމްބަރު ކަމުގެ ގޮނޑިއަށް ކުރިމަތިލާން މީހުންގެ ނަންތައް ދިރާސާ ކުރާނީ މިނިވަން މުއައްސަސާތަކުގެ ކޮމެޓީންނެވެ. އެ ކޮމެޓީގެ މުގައްރިރަކީ ފުނަދޫ ދާއިރާގެ މެމްބަރު އަލީ ސަލީމެވެ. ނައިބު މުގައްރިރަކީ ކެނދިކުޅުދޫ ދާއިރާގެ މެމްބަރު އަލީ މައުރޫފެވެ.