ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް ވާދަވެރި ސިޔާސީ ބޭފޫޅެއްގެ ގޮތުގައި ކުރައްވާ އެއްވެސް ކަމަކަށް މި ސަރުކާރުން ހުރަހެއް ނާޅާނެ ކަމަށް ރައީސުލްޖުމްހޫރިއްޔާގެ އޮފީހުގެ ޕްރެސް ސެކްރެޓަރީ މުހަންމަދު ޒުހައިރު މިއަދު ވިދާޅުވެއްޖެ އެވެ.
ސަން އޮންލައިނާ ވާހަކަ ދައްކަވަމުން ޒުހައިރު މިއަދު ވިދާޅުވީ މައުމޫނަކީ އަމިއްލަ ސިޔާސީ ޕާޓީއެއް އުފައްދަވައި އެ ޕާޓީގެ އެންމެ އިސް މަގާމުގައި ހުންނެވި ބޭފުޅެއް ކަމަށް ވުމުން ސިޔާސީ ގޮތުން އިންތިހާބުތަކުގައި ވާދަކުރެއްވުމަކީ ވެސް އެ މަނިކުފާނަށް ގާނޫނު ހުރަސް އަޅާކަމެއް ނޫން ކަމަށާއި ސިޔާސީ ވާދަވެރިއެއްގެ ގޮތުގައި އެ މަނިކުފާނު ކުރައްވާ އެއްވެސް ކަމަކަށް މި ސަރުކާރުން ހުރަހެއް ނާޅާނެ ކަމަށެވެ.
"މި ސަރުކާރުގެ ސިޔާސަތެއް ނޫން އެއީ އެއްވެސް ސިޔާސީ ވާދަވެރި ބޭފުޅަކު ހައްޔަރު ކުރުން. މި ސަރުކާރުން އެކަމެއް ނުކުރާނެ،" ޒުހައިރު ވިދާޅުވި އެވެ.
އެމްޑީޕީގެ ޕާލިމެންޓްރީ ގުރޫޕުގެ ރައީސް ރީކޯ މޫސާ މަނިކު ރޭ ހިންނަވަރުގައި ވާހަކަ ދައްކަވަމުން ވިދާޅުވީ މައުމޫންގެ ވެރިކަމުގައި ރައީސް މައުމޫން ކުށްތައް ކުރައްވާފައިވާ ކަމަށާއި އެ ކުށްތައް ތަހުގީގު ކުރުމަށްޓަކައި މައުމޫން ހައްޔަރު ކުރަން ޖެހޭ ކަމަށެވެ.
ނަމަވެސް ޕްރެސް ސެކްރެޓަރީ ވިދާޅުވީ މައުމޫން ކަމެއް ކުރައްވާފައި އޮތިއްޔާ އެކަން ބަލާނީ މިނިވަން މުއައްސަސާތަކުން ކަމަށާއި އެއީ ސަރުކާރުން ކުރަން ޖެހޭ ކަމެއް ނޫން ކަމަށެވެ.
"ރާއްޖޭގެ ސިޔާސީ ސަގާފަތް މިހާރު މިއޮތީ ވަރަށް ބޮޑަށް ބަދަލުވެފައި. މައުމޫން ކުށެއް ކުރައްވާފައި އޮތިއްޔާ ބައްލަވަން މިހާރު އެބަހުރި މިނިވަން މުއައްސަސާތައް. އެމީހުން އެކަންތައް ބައްލަވާނީ. މިސާލަކަށް ދަންނަވާ ނަމަ އެންޓި ކޮރަޕްޝަން ކޮމިޝަނުން ބައްލަވާނީ ކޮރަޕްޝަންގެ ކަންތައް. އަނިޔާގެ ކަންތައްތައް ބައްލަވާނީ ހިޔުމަން ރައިޓްސް ކޮމިޝަނުން،" ޒުހައިރު ވިދާޅުވި އެވެ.
ޒުހައިރު އެހެން ވިދާޅުވި ނަމަވެސް މިދިޔަ އަހަރުގެ މެދުތެރޭގައި ސަރުކާރުން ވަނީ ޕީއޭގެ ލީޑަރު ޔާމީނާއި އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ހައްޔަރުކޮށްފަ އެވެ. އަދި އެބޭފުޅުން ވަނީ ޖަލުގަޔާއި އަދި އެތައް ދުވަހެއްވަންދެން ގޭބަންދުގައި ބައިތިއްބައިފަ އެވެ.
އަދި ދާދިފަހުން ރައީސް ނަޝީދު ވެސް ވަނީ ސިޔާސީ ކަންކަމުގައި ބައިވެރިވެ ވަޑައިގަތުމަށް މައުމޫން އެނބުރި މާލެ ވަޑައިގެންފި ނަމަ ކުރީގެ ރައީސުނަށް ދިމާވެފައިވާ ފަދަ ދެރަ ހާދިސާއެއް ކުރިމަތިވެދާނެ ކަމުގެ އިންޒާރު ދެއްވައިފަ އެވެ.