"އަންބަރާކޮށް" ޑީޖޭ ބާއްވާނަމަ ފުލުހުން އެކަން ހުއްޓުވާނެ: އުމަރު

ކޮންމެ މީހަކަށް ވެސް ދަތުރުގޮސް ލަވަ ޖަހައި ޕާޓީ ކުރެވިދާނެ ކަމަށާއި ނަމަވެސް ޑީޖޭ ބާއްވައި މަސްތުވާތަކެތި ބޭނުންކޮށް "އަންބަރާ" ކުރާނަމަ ފުލުހުން އެފަދަ ތަންތަނަށް ވަދެ އެކަން ހުއްޓުވާނެ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
~
ޓީވީއެމްގެ އެންމެ ދުވަސްވީ ޝޯވ "ހޭޔަންބޯ"ގައި ވާހަކަފުޅު ދައްކަވަމުން އުމަރު ނަސީރު ވިދާޅުވީ ދަތުރުގޮސް އެއްވެ މަޖާ ކުރުމަކީ ރާއްޖޭގައި ހުއްދަ ކަމެއް ކަމަށާއި ކޮންމެ މީހަކު ވެސް ދަތުރުގޮސް އަޑުގަދަ ކުރާއިން ލަވަ ޖަހައި ޕާޓީ ކުރެވިދާނެ ކަމަށެވެ. އަދި އެފަދަ ކަންތައްތަކަަށް ފުލުހުން ހުރަސް ނާޅާނެ ކަމަށް އުމަރު ވިދާޅުވި އެވެ.

ނަމަވެސް "އަންބަރާ" ނުކުރެވޭނެ ކަމަށް މިނިސްޓަރު ވިދާޅުވި އެވެ. އަންބަރާ ނުކުރެވޭނެ ކަމަށް އުމަރު މާނަ ކުރެއްވީ ހޭޔަންބޯގެ ޕްރެސެންޓަރު އަހުމަދު ޝަކީބު (ޝަކީއްބެ) ވިދާޅުވި އެއްޗަކާ ގުޅިގެންނެވެ. އޭނާ ވިދާޅުވި ގޮތުގައި އެކަހެރި ތަންތަނަށް ގޮސް ނުރަނގަޅު ކަންތައްތައް ކުރުމަކީ "އަންބަރާ ކުރުމޭ" ކިޔަން ފަށައިފި ކަމަށާއި އެއީ އަލަށް ތައާރަފްވި ބަހެއް ކަމަށެވެ.

"އެކަމަކު ބަނގުރާ ބޮއެ ޑްރަގް ބޮއެ އެކަހަލަ ކަމެއް ނުކުރެވޭނެ. އަދި ޑީޖޭ ބާއްވައި މިކަހަލަ ކަންތައްތަކެއް ނުކުރެވޭނެ. މިކަންކަމަށް ފުލުހުން ވަދެ ހުއްޓުވައި ހަދާނެ. އަޅުގަނޑު ދަންނަވާނީ ޕާޓީ ކުރެވޭނެއޭ، އަންބަރާއެއް ނުކުރެވޭނެއޭ،" ހޯމް މިނިސްޓަރު ވިދާޅުވި އެވެ.

އުމަރުގެ ވާހަކަފުޅުގައި ވެރިކަމަށް އަނެއްކާވެސް ކުރިމަތިލައްވާނެ ކަމަށް ވިދާޅުވި އެވެ. ނަމަވެސް 2018 ވަނަ އަހަރު ވެރިކަމަށް ކުރިމަތި ނުލައްވާނެ ކަމަށާއި ފަސް އަހަރުގެ ދެ ދައުރު ފުރިހަމަ ކުރެއްވުމަށް ރައީސް އަބްދުﷲ ޔާމިން އަބްދުލް ގައްޔޫމްގެ ފަހަތްޕުޅުގައި ހުންނަވާނެ ކަމަށް އުމަރު ވިދާޅުވި އެވެ.

އުމަރު ވިދާޅުވި ގޮތުގައި އޭނާގެ ފަރާތުން ރައީސް ޔާމީނަކަށް ސިޔާސީ ތުރެޓެއް ދެން ނެތެވެ.

އޭނާ ވިދާޅުވީ މަރުގެ ހުކުމް ތަންފީޒު ކުރުމަށް ކަރެކްޝަނަލް ސާވިސްގެ މައްޗަށް ހޯމް މިނިސްޓަރުގެ ހައިސިއްޔަތުން އަމުރު ކުރީ ރައީސް ޔާމިނާ މަޝްވަރާ ކުރެއްވުމަށްފަހުގައި ކަމަށެވެ. އަދި ވަޒީރުންގެ މަޖިލީހުން މިހާރު ނިންމާފައިވާ ގޮތަށް މަރުގެ އަދަބު ތަންފީޒު ކުރުމުގެ ގަވާއިދު ހެދުމުގެ މަސައްކަތް އެޓާނީ ޖެނަރަލްގެ އޮފީހުން ކުރަމުންދާ ކަމަށް އުމަރު ވިދާޅުވި އެވެ. އަދި އެ ގަވާއިދު ވަރަށް އަވަހަށް ސަރުކާރުގެ ގެޒެޓުގައި ޝާއިރު ކުރާނެ ކަމަށް އޭނާ ވިދާޅުވި އެވެ.

މީހަކު މެރުމަށް ދަށު ކޯޓަކުންކޮށްފައިވާ ހުކުމެއް ސުޕްރީމް ކޯޓުން ދަމަހައްޓައިފިނަމަ މި ސަރުކާރުން މަރުގެ ހުކުމް ތަންފީޒު ކުރާނެ ކަމަށް ވިދާޅުވާ ވާހަކަފުޅު އުމަރު ތަކުރާރު ކުރެވި އެވެ. އަދި ވިދާޅުވީ ހޯމް މިނިސްޓަރުގެ މަގާމުގައި އޭނާ ހުންނަވަނިކޮށް އެއްވެސް ކުށްވެރިޔަކަށް ފިލައިގެން ނޫޅެވޭނެ ކަމަށެވެ.

"އެއްވެސް ކުށްވެރިޔަކު އަޅުގަނޑު ހޯމް މިނިސްޓަރަކަށް ހުއްޓައި ފިލައިގެން ނޫޅެވޭނެ. އެ މީހަކު ހޯދާނެ އަޅުގަނޑުމެން. ދުނިޔޭގެ ކޮންމެ ތަނެއްގައި އެ މީހަކު ހުއްޓަސް އެ މީހަކު ހޯދައި ޝަރީއަތުގެ ކުރިމައްޗަށް ގެންނާނަން،" ހޯމް މިނިސްޓަރު ވިދާޅުވި އެވެ.