ދެވަނަ ގްރޭޑްގައި ކިޔަވަން އުޅުނު އިރު މުހައްމަދު ނައްފާން އާމިރު ލަވަކިޔަން ފަށައިފި އެވެ. ނަމަވެސް ކާމިޔާބެއް ނުލިބުމުން އޭނާ ހުރީ ދެން ލަވަ ނުކިޔަން ނިންމައިގެނެވެ. އެ ނިންމުން އަނބުރާ ގެންދިޔައީ ލަވަ ކިޔުމަށް ޓީޗަރުން އެދެން ފެށުމުންނެވެ. އޭގެ ފަހުން ލަވަ މުބާރާތްތަކުގައި ލިބެން ފެށި ރަން ވަނަތަކާއެކު ލަވައިގެ ދުނިޔެއަށް ނައްފާން ރަނގަޅަށް ވަދެވިއްޖެ އެވެ.
ދިވެހި ލަވައިގެ ދުނިޔޭގައި ނައްފާން ހުރީ ދަނޑިވަޅަކަށް ބަލައިގެނެވެ. އެ ހާއްސަ ވަގުތުކޮޅަކީ "ރާއްޖެ ރަންއަޑު" ގެ ރަން އަޑު ގެ ވެރިޔާއަށް އޭނާ ވެގެންދިޔަ ވަގުތުކޮޅެވެ. ރާއްޖެ ރަންއަޑުން މިއަހަރު ހޮވި ރަންއަޑަކީ ނައްފާން 17، އެވެ.
ރާއްޖެ ރަން އަޑު ސްޓޭޖުން ނައްފާން ފެނިލި ހިސާބަކީ އޭނާ އިންތިޒާރު ކުރަމުން އައި ދަނޑިވަޅެވެ. ނައްފާންގެ ފުރަތަމަ ފެނިލުމުގައި އޯޑިއެންސް ކުރިމައްޗަށް "އޮއްސައިލި" ރެޕް ހުނަރުތަކުން އެންމެން ސިއްސުވާލިއިރު ފަނޑިޔާރުންނަށް ޖެހުނީ ތައުރީފުގެ ބަސްފަތި އަމުނާށެވެ. އެތައް ބަޔެއްގެ ލޯތައް އޭނާއަށް އަމާޒުވި ހިސާބަކީ އެއީ އެވެ.
"ރާއްޖެ ރަން އަޑު" ގައި ނައްފާން ބައިވެރިވީ ރާއްޖޭގެ "ރަން އަޑަ"ކީ އޭނާގެ އަޑަށް ހެދުމަށް ނިޔަތް ގަނެގެނެވެ.
އެ އުއްމީދާއެކު ފަހަރަކު ހަރުފަތެއް ގިރާކޮށް ނައްފާން މިއަދު ވަނީ ލަވައިގެ އުޑުގައި އަލިގަދަ ތަރިއަކަށް ވެފަ އެވެ. އެންމެންގެ ކަންފަތް ވަނީ ނައްފާނަށް ދީފައެވެ.
ނައްފާން ދެކޭ ގޮތުގައި ރާއްޖެ ރަންއަޑުގެ ކާމިޔާބަކީ ހިތް ވަރާއެކު އޭނާ ކުރި ބުރަ މަސައްކަތަށް ލިބުނު އިނާމެކެވެ. "ކާމިޔާބުގެ ސިއްރަކީ ކުރެވުނު ބުރަ މަސައްކަތް. ދެން ބައްޕަ އާއި ސަޕޯޓަރުން،" ނައްފާން ބުންޏެވެ. ކުރެވުނު މަސައްކަތަށާއި ކުރަމުން އައި އުއްމީދުތަކަށް ބަލައި ނައްފާން ބުނީ އޭނާ ނޫން އެހެން ކުއްޖަކަށް ރާއްޖެ ރަންއަޑު ލިބުނު ނަމަ އެއީ އިންސާފެއް ކަމަށް ގަބޫލުކުރާނެ ކަމަށެވެ.
ލަވައިގެ ރެޕް ސްޓައިލްގެ ހުރިހާ ޝަރުތެއް ފުރިހަމަވާ ޒުވާން ލަވަކިޔުންތެރިޔާގެ ހުރިހާ ޝައުގު ވެރިކަމެއް ދޫކޮށްލާފައި ވަނީ ވެސް ރެޕް ލަވަތައް ކިޔުމަށެވެ. އޭނާ ބުނަނީ ލޯބީގެ މަޑުމައިތިރި ލަވަތައް ކިޔަން އުނދަގޫ ކަމަށެވެ.
"މީހުން ބުނޭ އަޑެއް ނުވެސް ގުޅެއޭ. އަސްލު އަމިއްލަ އަށް ވެސް އިނގޭ ނުކިޔޭކަން މާ ރޮމޭންޓިކް ލަވަތައް، ކިޔަން ވެސް ވަރަށް އުނދަގޫ،" ނައްފާން ބުންޏެވެ.
ބޭރުގެ ރެޕަރުންގެ ސްޓައިލްތައް ބަލައި ހެދި ނަމަވެސް އަމިއްލަ ސްޓައިލެއް ގެންގުޅޭ ނައްފާން ބުނީ އޭނާގެ ހާއްސަ ފަންނަކީ ރެޕް ކަމަށް ވިޔަސް ކިޔަން ލިބޭ އެއްވެސް ލަވައެއް ދޫކޮށް ނުލާނެ ކަމަށެވެ. އެއްވެސް ފުރުސަތެއް ވެސް ނަގައިލަން ބޭނުން ނުވާ ކަމަށެވެ. މިހާރު ވެސް ލަވަ ކިޔުމުގެ ދާއިރާއިން ޕްރޮޑިއުސަރުންގެ ހުށަހެޅުންތައް ދަނީ އޭނާއަށް އޮހެމުންނެވެ.
"މިހާރު ބޭނުންވަނީ ކުރިއަރައިގެންދާން. އެންމެ ބޭނުންވަނީ އިންޓަނޭޝަނަލް ފެންވަރުގައި ޕާފޯމް ކޮށްލަން،" އޭނާ ބުންޏެވެ.
ހިތުގެ ޑޮކްޓަރަކަށް ވުމުގެ އުއްމީދުގައި ހުރި ނައްފާން ބުނީ އޭނާ ލަވަޔާ ދުރަށް ނުދާނެ ކަށާއި ވަރަށް އަވަހަށް ބޭންޑަކުން ފެނުމަކީ އެކަށީގެންވާ ކަމެއް ކަމަށެވެ.
ހިތުގެ ޑޮކަޓަރަށްވެގެން ނައްފާން އައިސް ފަރުވާދޭން ފެށުމަކީ އުފާވެރި ހަބަރެކެވެ. އޭގެ ކުރިން ނައްފާންގެ ރަން އަޑުން ދިވެހިންގެ ހިތްތަކުގައި ފިރުމައި ދޭން ފެށުމުން ދިވެހި ހިތްތަކަށް އަންނަނީ ޝިފާ ލިބެމުންނެވެ.