ބޭސްފަރުވާއަށްދާ ދިވެހިންނަށް ވިސާ ނެތި އިންޑިއާ އަށް ދެވޭ ގޮތަށް ހަމަޖައްސައިފި

ނިއުދިއްލީން: އަބްދުﷲ ޖަމީލު

އިންޑިއާއަށް ބޭސްފަރުވާ ހޯދަން އަންނަ ދިވެހިންނަށް ވިސާ ނެތި އިންޑިއާ އަށް ދެވޭ ގޮތަށް އިންޑިއާ ސަރުކާރުން ހަމަޖައްސައިފި އެވެ.

ރައީސް އަބްދުﷲ ޔާމީނާއި ބޮޑުވަޒީރު މަންމޯހަން ސިންގް ބޭއްވި ބައްދަލުވުމަށް ފަހު ނެރުނު ގުޅިފައިވާ ބަޔާނުގައި ވަނީ ދެ ގައުމުގެ ދެމެދުގައި ވިސާގެ މައްސަލަ ހައްލުކުރުމަށް މަޝްވަރާކުރެއްވި ކަމަށެވެ. އެގޮތުން ރައީސް ޔާމީން ވަނީ އިންޑިއާ އަށް ބޭސްފަރުވާ ހޯދަން އަންނަ ދިވެހިންނަށް ހިލޭ ވިސާ ދިނުމާއި ދެ މަސް ދުވަހުގެ ތެރޭގައި އަލުން އަންނައިރު ދިމާވާ މައްސަލަ ހައްލުކުރުމާ ބެހޭ ގޮތުން މަޝްވަރާކުރެއްވި ކަމަށް އެ ބަޔާނުގައި ބުނެފައި އެވެ.

އެ ބަޔާނުގައި ވަނީ ވިސާ މައްސަލައާ ބެހޭ ގޮތުން މަޝްވަރާކުރުމަށް ފަހު ދެ ފަރާތުން އެކްސްޗޭންޖް އޮފް ނޯޓެއްގެ ދަށުން އެ މައްސަލަ ހައްލުކުރަން އެއްބަސްވެފައިވާ ކަމަށެވެ.

ބޮޑުވަޒީރާ އެކު މިއަދު ބޭއްވި ބައްދަލުވުމުގައި ދިވެހި ސަރުކާރުން ވަނީ ރާއްޖެއަށް ޑީސަލާއި ޕެޓްރޯލް އަދި މަތިންދާބޯޓަށް އަޅާ ތެޔޮ ރާއްޖެއަށް ވިއްކުމާ ގުޅޭ ގޮތުން ވެސް މަޝްވަރާކޮށްފަ އެވެ. އެގޮތުން އިންޑިއާ ސަރުކާރުން އެކަމަށް އެހީތެރިވެދޭނެ ކަމަށް ވެސް އެ ބަޔާނުގައި ބުނެފައިވެ އެވެ.

އެ ބައްދަލުވުމުގައި ރާއްޖެއަށް ބޭނުންވާ ތެޔޮ ފޯރުކޮށްދިނުމަށް، ދެފަރާތުން ބައްދަލުކުރުމަށް ފަހު ވީއެންމެ އަވަހަކަށް ހައްލުކުރެވޭނެ ގޮތްތަކެއް ހޯދަން ވަނީ އެއްބަސްވެފަ އެވެ. އޭގެ އިތުރުން ޕޮލިސް އެކަޑަމީ އެޅުމަށް އެހީތެރިވުމާއި އައިޖީއެމްއެޗް މަރާމާތުކުރުމާއި އެމްއެންޑީއެފްގެ ކޮމްޕޮސިޓް ޓްރޭނިން ސެންޓަރު އެޅުމަށް އެހީތެރިވާނެ ކަމަށް އިންޑިއާގެ ބޮޑުވަޒީރު ވިދާޅުވި ކަމަށް އެ ބަޔާނުގައި ބުނެފައިވެ އެވެ.

ގުޅިފައިވާ ބަޔާނުގައި ވަނީ އިންޑިއާއިން 25 މިލިއަން ޑޮލަރުގެ ކްރެޑިޓް ފެސިލިޓީ ދޭން ނިންމުން ރައީސް ޔާމީން އިންޑިއާގެ ބޮޑުވަޒީރަށް ޝުކުރުއަދާކުރެއްވި ކަމަށެވެ.

އެ ބައްދަލުވުމުގައި ރާއްޖެއަށް ހިލަ އެކްސްޕޯޓްކުރުމަށް ދިމާވެފައިވާ މައްސަލަ ހައްލުކޮށްދެއްވައި އަލުން ހުއްދަ ދެއްވި ކަމަށްޓަކައި ބޮޑުވަޒީރަށް ރައީސް ޔާމީން ޝުކުރު އަދާކުރެއްވި ކަމަށް އެ ބަޔާނުގައި ބުނެފައިވެ އެވެ.

ގުޅިފައިވާ ބަޔާނުގައި ވަނީ ދެ ގައުމުގެ ދެމެދުގައި ކަނޑުދަތުރުފަތުރާއި ވައިގެ މަގުންކުރާ ދަތުރުތައް ފުޅާކުރުމާ ބެހޭ ގޮތުން ވެސް މަޝްވަރާކުރެއްވި ކަމަށެވެ. އަދި އިންޑިއާގެ ކޮއްޗިއާއި މާލެއާ ދެމެދު ކަނޑުމަގުން ދަތުރުކުރުމާއި އެހެން ސަރަހައްދުތަކަށް ވައިގެ ދަތުރުކުރުމަށް ދެ ގައުމުގެ ދެމެދުގައި އެއްބަސްވުމެއްގައި ސޮއިކުރުމަށް ވެސް މަޝްވަރާކުރެއްވި ކަމަށް އެ ބަޔާނުގައި ބުނެފައިވެ އެވެ.

ދެ ގައުމުގެ ވެރިންގެ މެދުގައި ބޭއްވި ރަސްމީ ބައްދަލުކުރެއްވުމުގައި އިންޑިއާގެ މުމްބާއީ، ދިއްލީއާއި މާލެއާ ދެމެދު ވީއެންމެ އަވަހަކަށް ވައިގެ ދަތުރުތައް ފެށުމަށް ދެ ލީޑަރުން މަޝްވަރާކުރެއްވި ކަމަށް ވެސް އެ ބަޔާނުގައި ބުނެފައިވެ އެވެ.

މި ބައްދަލުވުމުގައި ރައީސް ޔާމީން ވަނީ ބޮޑުވަޒީރު މަންމޯހަން ސިންގް ރާއްޖެއަށް ދަތުރުފުޅެއް ކުރެއްވުމަށް ދައުވަތު އަރުވައިފަ އެވެ. އަދި އެ ދައުވަތު ގަބޫލުފުޅުކުރައްވައި ދަތުރުފުޅުކުރައްވާނެ ތާރީހެއް ކަނޑައަޅުއްވާނެ ކަމަށް ވެސް އެ ބަޔާނުގައި ބުނެފައިވެ އެވެ.