ސިއްހީ ދާއިރާއިން އެހީތެރިވުމަށާއި ދިވެހި ހައިކޮމިޝަނަށް ބިމެއް ދިނުމުގެ އެއްބަސްވުމެއްގައި ސޮއިކޮށްފި

ނިއުދިއްލީން: އަބްދުﷲ ޖަމީލު

ރާއްޖޭގެ ސިއްހީ ދާއިރާ އިތުރަށް ތަރައްގީކޮށް ވަރުގަދަކުރުމާއި އައިޖީއެމްއެޗަށް ބޭނުންވާ ޑޮކްޓަރުން ތަމްރީނުކުރުމާއި ދިއްލީގައި ދިވެހި ހައިކޮމިޝަންގެ އިމާރާތެއް އެޅުމަށް ބިމެއް ދިނުމަށް އިންޑިއާ ސަރުކާރުން އެއްބަސްވެއްޖެ އެވެ.

އިންޑިއާއަށް ރައީސް އަބްދުﷲ ޔާމީން ކުރައްވަމުންގެންދަވާ ދަތުރުފުޅުގައި ބޮޑުވަޒީރުގެ އޮފީހުގައި މިއަދު ބޭއްވި ބައްދަލުވުމުގައި ސިއްހީ ދާއިރާއަށް އެހީތެރިކަން ފޯރުކޮށްދިނުމުގެ އެމްއޯޔޫގައި ދިވެހިސަރުކާރުގެ ފަރާތުން ސޮއިކުރެއްވީ ހެލްތު މިނިސްޓަރު ޑރ. މަރިޔަމް ޝަކީލާ އެވެ. އަދި އިންޑިއާ ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު ސަލްމާން ހޫރުޝީދެވެ.

އެ ބައްދަލުވުމުގައި އައިޖީއެމްއެޗަށް ބޭނުންވާ މީހުން ތަމްރީނުކުރުމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު ދުންޔާ މައުމޫނެވެ. އަދި އިންޑިއާގެ ފަރާތުން ސޮއިކުރެއްވީ ފޮރިން މިނިސްޓަރު ސަލްމާނެވެ. މީގެ އިތުރުން ދިވެހި ހައިކޮމިޝަން އެޅުމަށް ބިން ހަވާލު ކުރުމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ
އިންޑިއާގައި ހުންނަވާ ދިވެހި ސަފީރު މުހައްމަދު ނަސީރެވެ. އިންޑިއާގެ ފަރާތުން ސޮއިކުރެއްވީ އާބަން ސެކްރެޓަރީ ޝްރީ ސުދިރެވެ.

ސިއްހީ ދާއިރާއަށް އެއްބާރުލުން ދިނުމުގެ އެމްއޯޔޫގައިވާ ގޮތުން ދެ ފަރާތުގެ ދެމެދުގައި ގުޅުން ވަރުގަދަކުރުމާއި ޑޮކްޓަރުން ތަމްރީނުކޮށްދިނުމާއި އޮފިޝަލުންނާއި އެނޫން ވެސް ސިއްހީ ދާއިރާއަށް ބޭނުންވާ މީހުން ތަމްރީނުކޮށްދިނުން ހިމެނެ އެވެ. އަދި ސިއްހީ ދާއިރާއަށް ބޭނުންވާ ވަސީލަތްތައް ފޯރުކޮށްދިނުމާއި ސިއްހީ ދާއިރާ ކުރިއެވުމަށް ދިރާސާތައް ކުރުމުގެ އިތުރުން ބޭހުގެ ބާވަތްތައް ފޯރުކޮށްދިނުމަށް އެހީތެރިވުން ވެސް ހިމެނެ އެވެ.

އައިޖީއެމްއެޗަށް ބޭނުންވާ މީހުން ތަމްރީނުކުރުމުގެ އެއްބަސްވުމުގައިވާ ގޮތުން ދިވެހި ޑޮކްޓަރުން އިންޑިއާގައި ތަމްރީނުކުރުމާއި އައިޖީއެމްއެޗްގައި މަސައްކަތްކުރުމަށް ދިވެހި ޑޮކްޓަރުން ފޮނުވުން ހިމެނެ އެވެ.

އިންޑިއާއިން ވަނީ 2008 ވަނަ އަހަރު ވެސް އައިޖީއެމްއެޗަށް ބޭނުންވާ އިންސާނީ ވަސީލަތް ތަރައްގީކުރުމަށް އެހީތެރުވުމުގެ އެއްބަސްވުމެއްގައި ސޮއިކޮށްފަ އެވެ. އަދި މިއަދު ސޮއިކުރި އެއްބަސްވުމަކީ ވެސް ފަސް އަހަރު ދުވަހުގެ އެއްބަސްވުމެއް ކަމަށް އިންޑިއާގެ ފޮރިން މިނިސްޓްރީން ބުންޏެވެ.

ނިއުދިއްލީގައި ދިވެހި ހައިކޮމިޝަނެއް އިމާރާތްކުރުމަށް ބިމެއް ދިނުމުގެ އެއްބަސްވުމުގެ ދަށުން ދިއްލީގައި އެމްބަސީތައް ހުންނަ ޗަނަކިއަޕޫރީން ބިމެއް ދިނުމަށް ވަނީ ނިންމައިފަ އެވެ.

ހައިކޮމިޝަން އިމާރާތްކުރުމަށް އިންޑިއާއިން ބިމެއް ދިންއިރު ރާއްޖެއިން ވެސް ވަނީ އިންޑިއާއަށް މާލޭގެ ސޯސަންމަގުން ބިމެއްދިފަ އެވެ.