ނިއު ދިއްލީން: އަބްދުﷲ ޖަމީލު
އިންޑިއާ އިން ރާއްޖެ އަށް 25 މިލިއަން ޑޮލަރުގެ ސްޓޭންޑްބައި ކްރެޑިޓް ފެސިލިޓީއެއް ދޭން ނިންމައިފި އެވެ.
ރައީސް އަބްދުﷲ ޔާމީން އާއި އިންޑިއާގެ ބޮޑުވަޒީރު މަންމޯހަން ސިންގް މިއަދު ބޭއްވި ރަސްމީ ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ބޮޑުވަޒީރު ވިދާޅުވީ ރާއްޖެ އަށް ބޭނުންވާ ތެޔޮ ފޯރުކޮށްދޭން މަޝްވަރާކުރެއްވި ކަމަށެވެ.
"އަޅުގަނޑުމެން މިއަދު ވަނީ އެއްބަސްވެފައި ރާއްޖެ އަށް ބޭނުންވާ ތެލުގެ ބާވަތްތައް ފޯރުކޮށްދިނުމަށް. އެގޮތުން ކަމާ ބެހޭ ފަރާތްތަކުގެ މެދުގައި މަޝްވަރާކުރުމަށް ފަހު އެންމެ ރަނގަޅު ގޮތްތަކަކީ ކޮބައިތޯ ބަލާނަން،" މަންމޯހަން ސިންގް ވިދާޅުވި އެވެ.
ބޮޑުވަޒީރު ވިދާޅުވީ ރާއްޖޭގެ ތަރައްގީއަށް ބޭނުންވާ ކަންތައްތައް ކުރުމަށް އެހީތެރިވުމަށް ގުޅިގެން މަސައްކަތް ކުރައްވާނެ ކަމަށެވެ. އެގޮތުން ތައުލީމީ ދާއިރާ އާއި ސިއްހީ ދާއިރާ އިތުރަށް ތަރައްގީކުރުމަށް އެހީތެރިވެދެއްވާނެ ކަމަށް މަންމޯހަން ސިންގް ވިދާޅުވި އެވެ.
ބޮޑު ވަޒީރު ވަނީ އިބްރާހިމް ނާސިރު އިންޓަނޭޝަނަލް އެއާޕޯޓް ހިންގި އިންޑިއާގެ ޖީއެމްއާރުގެ މައްސަލައަށް ހައްލެއް އަންނާނެ ކަމަށް އުއްމީދުކުރައްވާ ކަމަށް ވިދާޅުވެފަ އެވެ. އަދި އިންޑިއާގެ އެ ނޫން އިންވެސްޓަރުންނަށް ދިމާވެފައިވާ މައްސަލަތައް ހައްލުކޮށްދެއްވުމަށް ވެސް ރައީސް ޔާމީނަށް ދެންނެވި ކަމަށް ބޮޑުވަޒީރު ވިދާޅުވި އެވެ.
މަންމޯހަން ސިންގް ވިދާޅުވީ މިއަދު ބޭއްވި ބައްދަލުވުމުގައި ދެ ގައުމުގެ ގުޅުން ވަރުގަދަކުރުމާއި ދިފާއީ ގުޅުން ބަދަހިކުރުމަށް ވެސް އެއްބަސްވެވުނު ކަމަށެވެ. އެގޮތުން ތަމްރީނާއި ވަސީލަތްތައް ފޯރުކޮށްދިނުމުގެ އިތުރުން ޖާގަ އިތުރުކުރުމަށް އެހީތެރިވެދެއްވާނެ ކަމަށް ބޮޑުވަޒީރު ވިދާޅުވި އެވެ.
"އަޅުގަނޑުމެން ވަނީ މި ސަރަހައްދުގެ ކަނޑުތައް ހިމާޔަތްކުރުމަށް ސްރީލަންކާއާ ގުޅިގެން މަސައްކަތް ފަށާފައި. އަދި އަޅުގަނޑުމެން ބޭނުންވޭ މިސަރަހައްދުގެ އެހެން ގައުމުތަކާ ގުޅިގެން ވެސް އެކަން ކުރަން،" މަންމޯހަން ސިންގް ވިދާޅުވި އެވެ.
ބޮޑުވަޒީރު ވިދާޅުވީ ރާއްޖޭގެ ސަލާމަތީކަންތަކަށް ދިމާވެފައިވާ ގޮންޖެހުންތައް ހައްލުކުރުމަށް ދެ ފަރާތުން ގުޅިގެން މަސައްކަތްކުރަން ތައްޔާރަށް އޮތް ކަމަށެވެ. އަދި ރައީސް ޔާމީނާ ގުޅިގެން އިގްތިސާދީ ގުޅުން ބަދަހިކުރުމަށް މަޝްވަރާކުރެއްވި ކަމަށް ވެސް މަންމޯހަން ސިންގް ވިދާޅުވި އެވެ.
date_range
އާދިއްތަ 24 ނޮވެމްބަރ 2024