ނިއުދިއްލީން: އަބްދުﷲ ޖަމީލު
އިބްރާހިމް ނާސިރު އިންޓަނޭޝަނަލް އެއާޕޯޓް (އައިއެންއައިއޭ) އިންޑިއާގެ ޖީއެމްއާރަށް 25 އަހަށް ދީފައިވަނިކޮށް، އެއްބަސްވުން އުވާލި މައްސަލަ ހައްލު ކުރަން ތައްޔާރަށް ހުންނެވި ކަމަށް ރައީސުލްޖުމްހޫރިއްޔާ އަބްދުﷲ ޔާމީން މިއަދު ވިދާޅުވެއްޖެ އެވެ.
ރައީސް އެހެން ވިދާޅުވީ އެމަނިކުފާނު އިންޑިއާއަށް ކުރައްވާ ދަތުރުފުޅުގައި މިއަދު އިންޑިއާގެ ބޮޑެތި ވިޔަފާރިވެރިންނާ ބައްދަލު ކުރައްވަ އެވެ.
ރައީސް ވިދާޅުވީ ޖީއެމްއާރު މައްސަލަ ހައްލުކުރުމަށް މިހާރު ވެސް މަޝްވަރާކުރައްވަމުންގެންދަވާ ކަމަށެވެ.
ރައީސްގެ ވާހަކަފުޅުގައި އެއާޕޯޓް ޖީއެމްއާރަށް އަލުން ހަވާލު ކުރާނެ ކަމަކަށް ވިދާޅެއް ނުވެ އެވެ. ނަމަވެސް އެމަނިކުފާނު ވިދާޅުވީ ވިޔަފާރިއަކީ ވެސް ދެފަރާތަށް ވެސް ފައިދާ ހުރި ގޮތުގައި ކުރަންޖެހޭ ކަމެއް ކަމަށާއި އެ އެއްބަސްވުން އުވާލި ނަމަވެސް ޖީއެމްއާރަށް ރާއްޖޭގެ އެހެން ދާއިރާތަކުގައި އިންވެސްޓް ކުރުމުގެ ފުރުސަތު އެބަ އޮތް ކަމަށް ރައީސް ވިދާޅުވި އެވެ.
"އަޅުގަނޑަށް ހީވަނީ ތިމައްސަލަ މިހާރު ވަރަށް ބޮޑަށް ސިޔާސީވެފައިވާހެން. އެހެންކަމުން ތި މައްސަލައަށް ހައްލެއް ހޯދަން އަޅުގަނޑުގެ ސަރުކާރުން މިދަނީ މަސައްކަތްކުރަމުން،" ރައީސް ޔާމީން ވިދާޅުވި އެވެ.
ޖީއެމްއާރުގެ މައްސަލާގައި ރައީސް ވަހާކަފުޅު ދެއްކެވީ އިންޑިއާގެ ވިޔަފާރިވެރިންނާ ބައްދަލުކުރެއްވުމުން، އެމަނިކުފާނަށް ވިޔަފާރިވެރިން އަމާޒު ކުރި ސުވާލުތަކަށް ޖަވާބުދެއްވަ އެވެ.
އެއާ ޕޯޓުގެ މައްސަލައިގައި ރައީސް އިތުރަށް ވިދާޅުވީ، އިބްރާހިމް ނާސިރު އިންޓަނޭޝަނަލް އެއާޕޯޓް ހިންގާނީ ދިވެހި ސަރުކާރުން ކަމަށެވެ. އަދި އެތަން އިތުރަށް ތަރައްގީކުރަން ޖެހިފައިވާ ކަމަށާއި އެއާޕޯޓުގައި ދެވަނަ ރަންވޭ އެޅުމަށް ބޭނުންވާ ފައިސާ ހޯދުމުގެ މަސައްކަތް ވެސް ކުރައްވަމުން ގެންދަވާ ކަމަށް ރައީސް ވިދާޅުވި އެވެ.
"ޖީއެމްއާރާއެކު ކޯޓުން ބޭރުގައި މައްސަލަ ހައްލުކުރުމަށް މިދަނީ ވާހަކަދައްކަމުން. އެކަމުން އެ މައްސަލައަށް ފިނިކަމެއް އަންނާނެ ކަމަށް އުއްމީދުކުރަން،" ރައީސް ވިދާޅުވި އެވެ.
އެ ބައްދަލުވުމުގައި އިންޑިއާގެ ގިނަވެރިންގެ ސުވާލުތައް އަމާޒުކުރީ ޖީއެމްއާރުގެ މައްސަލައަށެވެ. ނަމަވެސް އެ ބައްދަލުވުމުގައި ބައިވެރިވި ބައެއް ވިޔަފާރިވެރިން ވަނީ ރާއްޖޭގެ ހަކަތަ އާއި އެނޫންވެސް ދާއިރާތަކުގައި އިންވެސްޓްކުރުމަށް ޝައުގުވެރިވާކަން ހާމަކޮށްފަ އެވެ.
އިންޑިއާގެ ވިޔަފާރިވެރިންނާއެކު ބޭއްވި ބައްދަލުވުމުގައި މަޝްހޫރު ބައެއް ކުންފުނިތަކުގެ ވެރިންނާއި ރާއްޖެއާއެކީ މިހާރު ވެސް ވިޔަފާރިކުރާ ފަރާތްތަކުން ވެސް ބައިވެރިވި އެވެ.
date_range
އާދިއްތަ 24 ނޮވެމްބަރ 2024