މަސްތުވާތަކެތީގެ ވިޔަފާރިއަށް ބަންދު ބޯޑު އަޅުވަންޖެހޭ ގަޑި މިއޮތީ އައިސްފަ: އުމަރު

ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ކުރާ ފަރާތްތަކުގެ މަސައްކަތް ހުއްޓުވުމުގެ މަސައްކަތް ފުލުހުން ފަށާފައިވާ ކަމަށާއި އެ ވިޔަފާރިތަކުގައި ބަންދު ބޯޑު އެޅުވަންޖެހޭ ގަޑި މިހާރު އަތުވެއްޖެ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.

ވޭތުވެދިޔަ ހަފުތާގެ ތެރޭގައި ފުލުހުން ހިންގި ހާއްސަ އޮޕަރޭޝަންތަކެއްގައި ރާއްޖޭގައި އެންމެ ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ދެ ނެޓްވޯކެއްގެ އިސްވެރިން ހައްޔަރުކުރުމާ ގުޅިގެން ފުލުހުންނަށް ދެއްވި ފަރިއްކޮޅެއްގައި ވާހަކަފުޅޫ ދައްކަވަމުން އުމަރު ވިދާޅުވީ ޝަރީއަތް މެދުވެރިކޮށް ރާއްޖޭގައި މަސްތުވާތަކެތީގެ ވިޔަފާރި ހިންގާ ފަރާތްތަކަށް ހައްގު އަދަބު ސަރުކާރުން ދޭނެ ކަމަށެވެ.

"ދިވެހިރާއްޖޭގެ މަސްތުވާ އެއްޗެހި އެތެރެކޮށް ވިއްކާ ނެޓްވޯކްތަކަށް އަޅުގަނޑު ދަންނަވާނީ، އެމީހުން މަސައްކަތް ނިންމާފައި 'ކުލޯސް' (ނުވަތަ) ބަންދު ބޯޑު އަޅުވަންޖެހޭ ގަޑި މިހާރު މިއޮތީ އައިސްފައޭ. އިރާދުކުރެއްވިއްޔާ ދިވެހި ފުލުހުންގެ ހުރިހާ ފައުޖުތައް އަދި ޝަރުއީ ކޯޓުތައް މެދުވެރިކޮށް ހައްގު އަދަބު ރާއްޖެއަށް މަސްތުވާތަކެތި އެތެރެކުރާ މީހުންނަށް އަޅުގަނޑުމެން ދޭނަން،" އުމަރު ވިދާޅުވި އެވެ.

ހޯމް މިނިސްޓަރު ވިދާޅުވީ މަސްތުވާތަކެތީގެ ވިޔަފާރިތަކާ ދެކޮޅަށް ވަރަށް ވަރުގަދަ ހަމަލާއެއް ދިނުމަށް ފުލުހުން ތައްޔާރުވަމުން އަންނަ ކަމަށާއި އެ ހަމަލާގެ ފެށުމުގެ ގޮތުން ހިންގުނު ދެ އޮޕަރޭޝަންގައި ފުލުހުން ބޮޑު ކާމިޔާބީއެއް ހޯދާފައިވާ ކަމަށެވެ.

އުމަރުގެ ވާހަކަފުޅުގައި އިޝާރާތްކުރެއްވި ދެ އޮޕަރޭޝަނަކީ މި މަހުގެ ފަސް ވަނަ ދުވަހު އަދި ރޭގައި ފުލުހުން ހިންގި އޮޕަރޭޝަނެކެވެ. ފަހެއް ޑިސެމްބަރުގައި ފުލުހުން ހިންގި އޮޕަރޭޝަންގައި އެއް ކިލޯގެ މަސްތުވާތަކެއްޗާއެކު އޭގެ ވިޔަފާރިކުރާ ބޮޑެއް ހައްޔަރުކޮށްފައިވާއިރު، އުމަރު ވިދާޅުވީ ރޭގެ އޮޕަރޭޝަންގައި ފުލުހުން "މަސްތުވާތަކެތީގެ ރާއްޖޭގެ އެންމެ ބޮޑު އެއް ނެޓްވޯކް ފުނޑުފުނޑުކޮށްލާފައިވާ" ކަމަށެވެ.

އުމަރު ވިދާޅުވީ ރާއްޖެއިން މަސްތުވާތަކެތި އެއްކޮށް ފުހެލުމަށް 15 ވަރަކަށް އަހަރު ނަގާނެ ކަމަށެވެ. އަދި މިހާރުން މިހާރަށް މަސްތުވާތަކެތީގެ މައްސަލައަށް ހައްލެއް ނުހޯދައިފި ނަމަ، ކުރިއަށް އޮތް ޖީލުތައް ވެސް ހަލާކުވެގެންދާނެ ކަމަށް އުމަރު ވިދާޅުވި އެވެ.

އުމަރު ވިދާޅުވީ އިންޑިއާ އަދި ލަންކާގައި ތިބެގެން ދިވެހިންގެ ބަޔަކު ރާއްޖެއަށް މަސްތުވާތަކެތި ފޮނުވަމުންދާ ކަމަށެވެ. މިގޮތަށް މިކަން ކުރާ "ޑުރަގް ލޯޑުން" ހައްޔަރުކޮށްގެން ރާއްޖެ ގެނައުމުގެ މަސައްކަތް ފަށާފައިވާ ކަމަށް އުމަރު ވިދާޅުވި އެވެ.

"ދިވެހިންގެ ބަޔަކު ސްރީލަންކާގައި އަދި އިންޑިއާގައި ތިބެގެން މަސްތުވާތަކެތި ރާއްޖެއަށް ފޮނުވާ ހަދަމުން ގެންދޭ. އެތަންތާ ތިބި މީހުންނަށް ވެސް [މަސްތުވާތަކެތި ރާއްޖެއަށް އެތެރެކުރާ މީހުން] އަޅުގަނޑުގެ މެސެޖަކީ ރާއްޖޭގެ ސަރަހައްދުން ބޭރުގައި ތިބުމަކުން ރައްކާތެރި ކަމެއް ނުލިބޭނެއޭ. މިދަންނަވާ ކަހަލަ ޑުރަގްލޯޑުން ހައްޔަރުކޮށްގެން މާލެ ގެނައުމުގެ މަސައްކަތްތަކެއް ވެސް އަޅުގަނޑުމެން ވާނީ ފަށާފައޭ،" އުމަރު ވިދާޅުވި އެވެ.