ވަތަނިއްޔާގެ 4ޖީ ނެޓްވޯކް މޯބައިލް ފޯންތަކަށް ތައާރަފްކޮށްފި

މި އަހަރުގެ ތެރޭގައި ރާއްޖެ އަށް އަލަށް ތައާރަފްކުރި 4ޖީ ނެޓްވޯކް، ފުރަތަމަ ފަހަރަށް މޯބައިލް ފޯންތަކަށް ވަތަނިއްޔާ އިން ތައާރަފްކޮށްފި އެވެ.

ނަލަހިޔާ ހޮޓެލްގައި މިއަދު ބޭއްވި ނޫސް ކޮންފަރެންސެއްގައި ވާހަކަ ދައްކަވަމުން ވަތަނިއްޔާގެ ސީނިއާ ސްޕެޝަލިސްޓް ޕީއާރް މާކެޓިން ކޮމިއުނިކޭޝަން މަރިޔަމް އަހުމަދު ދީދީ ވިދާޅުވީ ވަތަނިއްޔާގެ 4 ޖީ ނެޓްވޯކް ފޯނުތަކަށް ތައާރަފްކުރުމުގެ ސަބަބުން އިންޓަނެޓް ސްޕީޑް އަވަސްވެގެންދާނެ ކަމަށެވެ. އެގޮތުން ތިން ދުވަހުން ޑައުންލޯޑް ކޮށްލެވޭ އެޕިސޯޑެއް ނުވަތަ ފިލްމެއް މިހާރު "ކޮފީ ތައްޓެއް ބޯލާހާ އަވަހަށް" ޑައުންލޯޑް ކުރެވިގެންދާނެ ކަމަށް އޭނާ ވިދާޅުވި އެވެ.

ވަތަނިއްޔާ އިން ބުނީ ޕޯސްޓްޕެއިޑް ކަސްޓަމަރުންނަށް ހާއްސަކޮށްގެން "4ޖީ ޕޯސްޓްޕެއިޑް ޕްލެޓިނަމް"ގެ ނަމުގައި މިއަދު ތައާރަފް ކުރި އެ ޕެކޭޖުން ރާއްޖޭގައި ލިބޭ އެންމެ ހަލުވި އިންޓަނެޓް ސްޕީޑް، 15 އެމްބީޕީއެސްގައި ލިބިގެންދާ އިރު ގިނަ ކަންތައްތަކެއް އެ ޕެކޭޖުގައި ހިމެނޭނެ ކަމަށެވެ.

އެގޮތުން އެ ޕެކޭޖުން ވަތަނިއްޔާ ނެޓްވޯކުގެ ނަންބަރުތަކަށް އަން ލިމިޓެޑް ކޯލްސް އަދި އެސްއެމްއެސްގެ ހިދުމަތް ލިބިގެންދާ އިރު 6 ޖީބީގެ ޑޭޓާ އެލެވެންސެއް ހިމެނެ އެވެ. އަދި އެހެން ނެޓްވޯކުގެ ނަންބަރުތަކަށް 200 މިނެޓު ވަންދެން ހިލޭ ގުޅާލެވޭ އިރު ރޯމިން ޑިސްކައުންޓެއްގެ ގޮތުގައި 10 ޕަސެންޓުގެ ޑިސްކައުންޓަކާއި އައިޑީޑީ ކޯލްތަކުން (އިންޑިއާ، ލަންކާ، މެލޭޝިއާ ތައިލޭންޑް އަދި ސިންގަޕޫރު) 20 ޕަސެންޓް ޑިސްކައުންޓް ވެސް އެޕެކޭޖުން ލިބިގެން ދެ އެވެ.

ވަތަނިއްޔާގެ ހެޑް އޮފް ނެޓްވޯކް ހުސެއިން ނިޔާޒު މިއަދު ވިދާޅުވީ 4ޖީ ނެޓްވޯކަކީ ދުނިޔެއަށް ވަރަށް އާއެއްޗެއް ކަމަށާއި އެގޮތުން މިއަދު މޯބައިލް ފޯންތަކަށް ތައާރަފް ކުރި 4ޖީ ނެޓްވޯކް، 700 އާއި 1800ގެ ބޭންޑުތަކުގެ ފޯނުތަކަށް އެ ހިދުމަތް ލިބޭނެ ކަމަށެވެ. އަދި އެ ކަވަރޭޖް މިވަގުތު ލިބެންހުންނާނީ ހަމައެކަނި މާލޭ ސަރަހައްދަށް ކަމަށާއި ނަމަވެސް ކައިރި މުސްތަގްބަލެއްގައި ރާއްޖޭގެ ހުރިހާ ސަރަހައްދަކަށް އެ ކަވަރޭޖް ލިބިގެންދާނެ ކަމަށް ނިޔާޒު ވިދާޅުވި އެވެ.

ވަތަނިއްޔާ އިން މިއަދު އަލަށް ތައާރަފްކުރި "4ޖީ ޕޯސްޓްޕެއިޑް ޕްލެޓިނަމް"ގެ އަގަކީ މަހަކު 999 ރުފިޔާ އެވެ. އަދި އެ ޕެކޭޖް ނަންގަވާ ފަރާތްތަކަށް ސިލްވާ ކެޓަގަރީގެ "ރީތި" ވަތަނިއްޔާ ނަންބަރެއް ވެސް ލިބޭނެ ކަމަށް ވަތަނިއްޔާ އިން ބުންޏެވެ.

ރާއްޖެ އަށް އެންމެ ފުރަތަމަ 4ޖީ ތައާރަފް ކުރި އަދި މިހާތަނަށް 4ޖީގެ ހިދުމަތް ރާއްޖޭގައި ހަމައެކަނި ދެމުން އަންނަ ވަތަނިއްޔާ އިން އެ ނެޓްވޯކް އެންމެ ފުރަތަމަ ތައާރަފްކޮށްފައި ވަނީ މި އަހަރުގެ އޭޕްރިލް މަހުގަ އެވެ. އެއަށް ފަހު ކުދި އަދި މެދު ފަންތީގެ ވިޔަފާރިތަކަށް އަމާޒުކޮށް، ވަތަނިއްޔާ ފޯ ބިޒްނަސް ޕޯޓްފޯލިއޯގެ ދަށުން އެންމެ ފުރަތަމަ ޕެކޭޖް ވަތަނިއްޔާ އިން ވަނީ މި އަހަރުގެ ޖޫން މަހުގައި ތައާރަފްކޮށްފަ އެވެ.