މާދަމާ ބާއްވަން ހަމަޖެހިފައިވާ ރިޔާސީ އިންތިހާބަށް ރެޖިސްޓާކޮށްފައިވާ މީހުންގެ ލިސްޓު ލިބިފައިވީ ނަމަވެސް އެ ލިސްޓު ޗެކްކުރުމަށް ދެ ދުވަސް ނަގާނެ ކަމަށް ޖުމްހޫރީގެ ރިޔާސީ ކެނޑިޑޭޓުގެ މަންދޫބު އުމަރު ނަސީރު ވިދާޅުވެއްޖެ އެވެ.
"ސަން" އިން ދެންނެވި ސުވާލަކަށް ޖަވާބު ދެއްވަމުން އުމަރު ވިދާޅުވީ އެ ލިސްޓު ލިބުނު ކަމުގައިވީ ނަމަވެސް ޖުމްހޫރީ ގުޅުމުގެ ފަރާތުން އެ ލިސްޓު ދެގޮތަކަށް ޗެކްކުރަމުން ދާނެ ކަމަށެވެ.
"އަޅުނގަޑުމެންނަށް ލިސްޓު ލިބުނު ކަމުގައިވީ ނަމަވެސް އެ ލިސްޓު ޗެކްކުރުމަށް މަދުވެގެން ދެ ދުވަސް ނަގާނެ. އެއީ އަޅުނގަޑުމެން އޭތި ފިޒިކަލީ ގޮތުން ވެސް ޗެކްކުރާނަން. ލިސްޓުގައި ތިބި މީހުންގެ ތެރެއިން ގާތްގަނޑަކަށް 100 މީހުންގެ ގެތަކަށް ގޮސް އެމީހުން އުޅޭތޯ ބަލާ، ނޫޅޭ ނަމަ އޭގެ ކުރިން އެމީހަކީ އެގޭގައި އުޅޭ މީހެއްތޯ ވެސް ބަލާ ވެރިފައި ކުރާނަން. އެކަމަށް އަޅުނގަޑުމެންގެ ރަށްރަށުގައި ތިބި ޖަގަހަތަކުން ވެސް ހަރަކާތްތެރިވާނެ،" އުމަރު ވިދާޅުވި އެވެ.
ނަމަވެސް ވޯޓާސް ލިސްޓުގައި ޖުމްހޫރީ ގުޅުމުގެ ފަރާތުން ސޮއިކުރުމަށް އިލެކްޝަންސް ކޮމިޝަނަށް ހުށަހެޅި މައްސަލައިގެ ތެރެއިން ރެޖިސްޓަރީ ކުރި މީހުންގެ ފަސް ޕަސެންޓް މީހުންގެ ފިންގާ ޕްރިންޓް ވެރިފައި ކުރުމުގެ ކަންތަކަށް އަދި އެ ކޮމިޝަނުން ބަހެއް ނުލިބޭ ކަމަށް އުމަރު ވިދާޅުވި އެވެ. އަދި އެކަން ފުރިހަމަ ނުވާ ނަމަ ވޯޓާސް ލިސްޓުގައި ޖޭޕީގެ ފަރާތުން ސޮއިނުކުރާނެ ކަމަށް ވެސް އޭނާ ވިދާޅުވި އެވެ.
date_range
ހުކުރު 27 ޑިސެމްބަރ 2024