އާބާދީގައި 800 މީހުން ތިބި ތ. އޮމަދޫއިން ކަރަންޓް ކެނިޑިފައިވާތާ ހަތަރު ދުވަސް ވެފައިވާ ކަމަށް އެރަށު ކައުންސިލުން ބުންޏެވެ. އޮމަދޫ ކައުންސިލްގެ ރައީސް އަބުދުﷲ ޝާއިރު ވިދާޅުވީ ކަރަންޓްގެ މައްސަލައިގާ ރައްޔިތުން ނުކުމެ މުޒާހަރާ ކުރަމުންދާ ކަމަށެވެ.
ސަން އަށް މިއަދު މައުލޫމާތު ދެއްވަމުން ޝާއިރު ވިދާޅުވީ ކެތްތެރިކަން ކޮޅުންލާފައިވާ ރައްޔިތުން ނުކުމެ، ރަށުގައި ހުރި ސަރުކާރުގެ އިދާރާތައް ބަންދުކޮށްފައިވާ ކަމަށެވެ.
"މިހާރު ދެން ކައުންސިލްގެ އިދާރާ ވެސް މިވަނީ ބަންދުކޮށްފައި، ސިއްހީ މަރުކަޒު ވެސް ބަންދުކޮށްފައި، އިންޖީނުގެ ވެސް ބަންދުކޮށްފިހެން އަޅުގަނޑަށް ހީވަނީ،" ޝާއިރު ވިދާޅުވި އެވެ.
އޭނާ ވިދާޅުވީ މަދު ވަގުތުކޮޅަކަށް މިހާރު ވެސް ބައެއް ފަހަރު ކަރަންޓް ދޫކުރާ ކަމަށެވެ. ނަމަވެސް އެއީ ކަރަންޓް ހުރުން ކަމަށް ގަބޫލު ނުކުރައްވާ ކަމަށް ވެސް ވިދާޅުވި އެވެ.
އޮމަދޫން ވާހަކަ ދެއްކި ބައެއް އާއްމުން ވެސް ބުނީ ރަށުގެ ގިނަ ބަޔަކު ނުކުމެ، އިހުތިޖާޖުކުރަމުންދާ ކަމަށެވެ. ކަރަންޓް ނެތި ހަތަރު ދުވަސް ވުމުން ރައްޔިތުންނަށް ބޮޑެތި ގެއްލުންތައް ވެފައިވާ ކަމަށް ވެސް އެމީހުން ބުންޏެވެ.
"ހަތަރު ދުވަސް މިހާރު މިވީ ކަރަންޓް ނެތި، ރޭގަނޑު އެހެން ބައެއް ފަހަރު، މަދު ވަގުތު ކޮޅަކަށް ކަރަންޓް ނުދޭ ވާހަކައެއް ނޫން،" އޮމަދޫން ވާހަކަ ދެއްކި މީހަކު ބުންޏެވެ.
ކަރަންޓްގެ ހާލަތު ގޯސްވީ ރަށުގެ އިންޖީނުގޭގައި ހުރި ތިން ޖަނަރޭޓަރު ވެސް މަރާމާތު ނުކުރެވި ގިނަދުވަސްތަކެއް ވުމުން ކަމަށް ޝާއިރު ވިދާޅުވި އެވެ. ކަރަންޓްގެ ހިދުމަތް ދެމުން އަންނަ ސަރުކާރުގެ ކުންފުނި ފެނަކަ ކޯޕަރޭޝަނަށް އެކަމުގެ ޝަކުވާތައް އެތައް ދުވަހެއް ކުރިން ހުށައެޅުއްވި ކަމަށް ވެސް އޭނާ ވިދާޅުވި އެވެ.
"ކަރަންޓްގެ ކެނޑުމުގެ މައްސަލަ އަޅުގަނޑުމެންނަށް ދިމާވެގެން އުޅޭތާ ވަރަށް ގިނަ ދުވަސް ވެއްޖެ، މިވީގޮތަކީ، ތިން ޖަނަރޭޓަރު އޮޕަރޭޓްކުރަމުން އައިސްމީގެ ހަ މަސް ކުރިން އޮތީ އެއް ޖަނަރޭޓަރު ގޮސްފައި. ފެނަކައިން އަޅުގަނޑުމެންނަށް އެއްވެސް ސްޕެއާއެއް ފޮނުވައެއް ނުދޭ، ދެން ކުރިން ހަލާކުވި ޖަނަރޭޓަރުން ސްޕެއާ ނަގައިގެން އަނެއް ދެ ޖަނަރޭޓަރު މަރާމާތުކުރަމުން އައީ،" ޝާއިރު ވިދާޅުވި އެވެ.
date_range
އާދިއްތަ 24 ނޮވެމްބަރ 2024