މާލޭގެ ބައެއް ސަރަހައްދުތަކުން މިރޭ ދޮޅުގަޑިއެއްހާއިރަށް ކަރަންޓް ކެނޑިއްޖެ

ސްޓެލްކޯގެ އިންޖީނެއް ފެއިލްވެގެން މާލޭގެ ބައެއް ސަރަހައްދުތަކުން މިރޭ ދޮޅުގަޑިއެއްހާއިރަށް ކަރަންޓް ކެނޑިއްޖެ އެވެ.

ކަރަންޓްގެ ހިދުމަތްދޭ ސަރުކާރުގެ ކުންފުނި، ސްޓެލްކޯގެ އޮފިޝަލަކު ވިދާޅުވީ ހަވީރު 5:40ން ފެށިގެން މިރޭ 7:10 ހާ ހަމަޔަށް ކަރަންޓް ކެނޑުނީ މާފަނުން ބައެއް ސަރަހައްދުތަކުންނާއި މައްޗަންގޮޅިން ކަމަށެވެ.

"އަޅުގަނޑުމެން ހަތް ނަމްބަރު ޖަނަރޭޓަރު ފެއިލްވެގެން ކަރަންޓް ކެނޑުނީ. ނަމަވެސް ކަރަންޓް ނުދެވި އެހާ ގިނައިރުވީ ހައިވޮލްޓޭޖް ޑިސްޓްރިބިއުޝަން ނިޒާމަށް ދިމާވި މައްސަލައަކުން،" އެ އޮފިޝަލް ވިދާޅުވި އެވެ.

މީގެ ހަފުތާއެއްހާ ދުވަސްކުރިން ވެސް މާފަންނު ބައެއް ސަރަހައްދުތަކުން ރޭގަނޑު ދަންވަރު ކަރަންޓް ކެނޑިފައިވެ އެވެ.

މިއަހަރުގެ ކުރީކޮޅު މާލޭގެ ކަރަންޓް ނިޒާމްގެ ލޯޑު ބޮޑުވެގެން، މަހެއްހާ ދުވަސްވަންދެން އެކި ސަރަހައްދުތަކުން ކަރަންޓް ކެނޑިފައިވެ އެވެ. އަދި އެ މައްސަލަ ހައްލުވީ އެ ކުންފުނިން އަލަށް ބެހެއްޓި އަށް މެގަވޮޓްގެ ދެ ޖަނަރޭޓަރު ބޭނުންކުރަން ފެށުމުންނެވެ.