ސަރުކާރާއި ދައުލަތާ އެކު ވިޔަފާރި ކުރާ ފަރާތްތައް ގާނޫނަކުން ހިމާޔަތް ކުރެވެން ޖެހޭ: މެމްބަރު ނަޝީދު

ދައުލަތުގެ ނަމުގައި ނުވަތަ ސަރުކާރުގެ ނަމުގައި ހިންގާ ވިޔަފާރީގެ މުއާމަލާތްތަކުގައި ބައިވެރިވާ "ތާޑްޕާޓީ" ހިމާޔަތް ކުރެވޭނެ ރަނގަޅު ނިޒާމެއް ނެތް ކަމަށާއި އެފަދަ ފަރާތްތައް ހިމާޔަތް ކުރެވޭނެ ނިޒާމެއް ގާނޫނުނަކުން ކަނޑައަޅަން ޖެހޭ ކަމަށް ކުރީގެ ރިފޯމް މިނިސްޓަރު އަދި ރައްޔިތުންގެ މަޖިލީހުގެ ކުޅުދުއްފުށީ ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެ އެވެ.

ނަޝީދުގެ އަމިއްލަފުޅު ބްލޮގަށް އޭނާ ދެއްވާފައިވާ ވީޑިއޯ އިންޓަވިއެއްގައި ވިދާޅުވީ ދައުލަތުގެ ނުވަތަ ސަރުކާރުގެ ނަމުގައި ހިންގާ ވިޔަފާރިތަކުގައި ބައިވެރިވަމުން އަންނަ ބޭރުގެ ވިޔަފާރިވެރިންނާއި އިންވެސްޓަރުންގެ އަދަދު ދުވަހަކަށް ވުރެ ދުވަހެއް އިތުރުވަމުން އަންނަކަން ފާހަގަކުރެވޭ ކަމަށެވެ. ނަމަވެސް އެފަދަ ވިޔަފާރީގެ މުއާމަލާތްތަކުގައި ސަރުކާރާ އެކު ނުވަތަ ދައުލަތާ އެކު ބައިވެރިވުމަކީ މާބޮޑު އިތުބާރެއް، ޔަގީން ކަމެއް ނެތް ކަމެއްގެ ގޮތުގައި އިންވެސްޓަރުންނަށް ސިފަވަމުންދާ މަންޒަރު ފެންނަމުންދާކަން ނަޝީދު ފާހަގަކުރެއްވި އެވެ.

"އާއްމު ފަރުދަކު އެހެން އާއްމު ފަރުދަކާ އެކު ހިންގާ ވިޔަފާރީގެ މުއާމަލާތަކަށް ވުރެ އާއްމު ފަރުދަކު ސަރުކާރާ އެކު ނުވަތަ ދައުލަތާ އެކު ކުރާ ވިޔަފާރީގެ މުއާމަލާތްތަކަށް ކުރާ އިތުބާރާއި ޔަގީންކަން ބޮޑުވާނެ ކަމާއި ސަރުކާރުން އަބަދުވެސް ކަންކުރާނީ ގާނޫނުގައިވާ ގޮތަށް ކަމަށް އިންވެސްޓަރު އަބަދުވެސް ގަބޫލް ކުރާނެ. ނަމަވެސް މިއަދު އެކަންތައް ވަނީ އެގޮތަށް ނޫން. ދައުލަތާ އެކު ނުވަތަ ސަރުކާރާ އެކު ކުރާ ވިޔަފާރީގެ މުއާމަލާތްތަކަކީ ކަނޑުގައި އަޅާ ރޮނގެއްފަދަ އެއްޗެއް ކަމުގައި ވެގެން ނުވާނެ. އެ ވާން ޖެހޭނީ ހިލައިގައި ކަނޑައި ނެގިފައި އޮންނަ އެއްޗެއްހާ ސާފު އެއްޗަކަށް،" ނަޝީދު ވިދާޅުވި އެވެ.

ނަޝީދު ވިދާޅުވީ އެފަދަ ވިޔަފާރީތައް ހިންގުމުގައި ބައިވެރިވާ ފަރާތަކީ މައުސޫމް ގޮތުގައި ގާނޫނުގެ ރަނގަޅު ފަޅީގައި ހުރެގެން ބައިވެރިވާ ފަރާތެއް ކަމުގައިވާ ނަމަ އެފަދަ ފަރާތްތައް ހިމާޔަތްކުރެވޭނެ ނިޒާމެއް އެކަށައަޅަން ޖެހޭނެ ކަމަށެވެ.

"މައުސޫމް ތިން ވަނަ ފަރާތެކޭ އަޅުގަނޑު މިދަންނަވަނީ ތިމާ އަމިއްލައަށް ކުށެއް ނުކޮށް ހުރެ، ރަނގަޅު ގޮތުގައި ތެދު ނިޔަތުގައި ދައުލަތާ އެކު ވިޔަފާރީއެއް ކުރާ ފަރާތެއް، އެއްގޮތަކަށް ވެސް ކޮރަޕްޝަންގެ ކުށެއް ކޮށްގެން ނުވަތަ ސަރުކާރުގެ މީހަކާ ބައިވެރިވެގެން ނުރަނގަޅު އަމަލެއް ކޮށްގެން ދައުލަތުގެ މުދަލެއް ހޯދާ މީހަކު ހިމާޔަތް ކުރެވެން ޖެހެއެކޭ ނޫން މިދަންނަވަނީ،"ނަޝީދު ވިދާޅުވި އެވެ.

އިންވެސްޓަރުންނަށް އެފަދަ ހިމާޔަތްތެރިކަމަކާ ރައްކާތެރިކަމެއް ނެތި ސަރުކާރުން ހިންގާފައިވާ އެފަދަ ވިޔަފާރީގެ މުއާމަލާތްތަކުގެ ސަބަބުން ނުކުންނަ މައްސަލައް މިހާރު ވެސް ކުރިމަތިވަމުންދާ ކަން ނަޝީދު ފާހަގަކުރެއްވި އެވެ. އެގޮތުން ހުޅަނގު ދެކުނު ހާބަރުން ސަރުކާރުން ބިން ވިއްކުމަށް ކުރި އިއުލާނާ ގުޅިގެން އެބިން ގަތުމަށް އެތައް މިލިޔަން ރުފިޔާއެއް ހަރަދުކޮށްފައިވާ ބަޔަކު އެބަތިބި ކަމަށާއި އޭރު ވެސް އެކަމަކީ ކުރެވޭނެ ކަމެއް ނޫން ކަމަށް ގާނޫނުގައި ބުނަމުން ދިޔައިރު ވެސް ސަރުކާރުން ދެކުނީ އެއީ ކުރެވިދާނެ ކަމެއް ކަމުގައި ނަޝީދު ވިދާޅުވި އެވެ. ނަމަވެސް ފަހުން އެ ވިޔަފާރީގެ މުއާމަލާތްތައް ހިންގާފައި އޮތީ ގާނޫނޫ ހަމަތަކުން ނޫން ކަމަށް ކޯޓުން ހުކުމްކުރުމުން ގެއްލުންވީ އިންވެސްޓަރުންނަށް އެކަނި ކަމަށް ވެސް އޭނާ ވިދާޅުވި އެވެ.

"އެކަމުގައި އިންވެސްޓް ކުރި މީހުންނަށް އެކަމުން ގެއްލުންވީ، އެފައިސާ ވެސް އެ ބިން ވެސް އެފަރާތަކަށް ފަހުން ލިބުނީ އެއް ނޫން. އަނެއްކޮޅުން ރާއްޖޭގައި މިހާރު ހިންގަމުން މިގެންދާ ހައުސިންގް ޔުނިޓްތައް އެޅުމުގެ މަޝްރޫއުތަކުގެ ފުރުސަތު ހުޅުވާލީމަ ބޭރުގެ އިންވެސްޓަރުންނަށް އުޒޫރައެއްގެ ގޮތުގައި މިލިބެނީ ވިލާ އެޅުމަށް ރަށެއް ނުވަތަ ބިމެއް. ނަމަވެސް ވިލާ އެޅުމުގެ ކަންތައްތައް ކުރިއަށްދަނީ ކޮން ގާނޫނެއްގެ ދަށުން ކަމެއް ނުވަތަ އެކަމަށް ހުއްދަ ދެނީ ކޮން ބައެއް ކަމެއް ވެސް ނޭނގޭ،" ނަޝީދު ވިދާޅުވި އެވެ.

ނަޝީދު ވިދާޅުވީ ދިވެހި ދައުލަތުގެ ފަރާތުން ނުވަތަ ސަރުކާރުގެ ފާރާތުން ހިންގާ ނުވަތަ ހުޅުވާލާ ވިޔަފާރީގެ ވިޔަފާރީތަކަކީ ސައްހަ ކަމެއްތޯ ޔަގީން ކަށަވަރު ކުރުމަކީ ބަންޑާރަ ނައިބުގެ މަސްއޫލިއްޔަތެއް ކަމުގައިވާއިރު މީގެކުރިން އެފަދަ ކަންތައްތައް ހިނގާފައި ވަނީ އެކަންތައް އެގޮތަށް ނުކުރެވިގެން ކަމަށެވެ. އަދި އެފަދަ ވިޔަފާރީތައް ދައުލަތުން ނުވަތަ ސަރުކާރުން ކުރާއިރު އެކަންކަމަކީ ސައްހަ ކަމެއްތޯ ބެލުމަށް ބަނޑާރަ ނައިބު މަސްއޫލިއްޔަތު އިތުރަށް ހަރުކަށި ކުރުމަކީ ވެސް ކުރެވިދާނެ ކަމެއްގެ ގޮތުގައި ދެކެވަޑައިގެންނަވާ ކަމަށް ވެސް ނަޝީދު ވިދާޅުވި އެވެ.

"ސަރުކާރުގެ ނަމުގައި ހުޅުވާލާ ވިޔަފާރީތަކީ ގާނޫނާއި ހިލާފަށް ނުވަތަ ގާނޫނާ އިދިކޮޅަށް ކޮށްފައިވާ ކަމެއް ކަމުގައިވާ ނަމަ ނުވަތަ ސީދާ ކަނޑައެޅިގެން ގާނޫނާ އިދިކޮޅަށް ކުރި ކަމެއް ކަމުގައިވާ ނަމަ އެކަމެއް ކުރި ޒިންމާ އުދުލާ ވަޒީރު ނުވަތަ ބަންޑާރަ ނައިބު ފަރުދީ ޖިނާއީ ޒިންމާ އުފުލަން ޖެހޭ ގޮތަށް އޮތުމަކީ ވެސް ކުރެވިދާނެ ކަމެއް، އަދި އެ ވިޔަފާރީގެ ސަަބަބުން ގެއްލުން ލިބޭ އިންވެސްޓަރަށް ލިބެން ޖެހޭ އުޒޫރައާއި އެކަމުގެ ސަބަބުން ލިބޭ ގެއްލުން ލިބެން ޖެހޭ ގޮތަށް ހެދުމަކީ ވެސް މިހާރު ކުރަންޖެހޭ ކަމެއް. ނޫނިއްޔާ ކިލަނބުވެގެން ދަނީ ރާއްޖޭގެ ނަން،" ނަޝީދު ވިދާޅުވި އެވެ.