އިންޓަ ސްކޫލް ބެޑްމިންޓަން މުބާރާތް ފަށައިފި

ބާރަ ވަނަ އިންޓަ ސްކޫލް ބެޑްމިންޓަން މުބާރާތް މިއަދު ހެދުނު ފަށައިފި އެވެ.

މާލޭ ކުޅިވަރު އެކުވެނީ ބެޑްމިންޓަން ހޯލުގައި ފެށި އެ މުބާރާތުގައި މިއަދު ކުޅުމަށް ހަމަޖެހިފައި ވަނީ ޓީމް އިވެންޓުގެ މެޗްތަކެވެ. އެ ގޮތުން ޓީމް އިވެންޓުގައި 33 ޓީމް ވަނީ ބައިވެރި ވެފަ އެވެ. އެއީ 20 ފިރިހެން ޓީމާއި 13 އަންހެން ޓީމެވެ.

މިމަހުގެ 30 ވަނަ ދުވަހުގެ ނިޔަލަށް ކުރިއަށްދާ އެ މުބާރާތުގައި ޖުމްލަ 21 ސުކޫލަކުން ވަނީ ބައިވެރިވެފަ އެވެ. އެ ސްކޫލްތަކުގެ ތެރޭގައި އަތޮޅު ތެރޭގެ ފަސް ސްކޫލް ހިމެނެ އެވެ.

ބެންމިންޓަން އެސޯސިއޭޝަނުން ބުނީ، މުބާރާތުގެ އޯޕަން އިވެންޓުގެ މެޗްތައް ފަސް އުމުރު ފުރާއަކަށް ބަހާލައިގެން ކުރިއަށް ގެންދިއުމަށް ނިންމާފައިވާ ކަމަށެވެ. އެގޮތުން އެ ފަސް އުމުރު ފުރާތަކަކީ ނުވަ އަހަރުން ދަށާއި 12 އަހަރުން ދަށާއި 14 އަހަރުން ދަށާއި 16 އަހަރުން ދަށް އަދި 19 އަހަރުން ދަށެވެ. އަދި މުބާރާތުގެ ޓީމް އިވެންޓުތައް ތިން އުމުރު ފުރައަކަށް ބަހާލައިފައިވާ އިރު އެ އުމުރު ފުރާތަކަކީ 14 އަހަރުން ދަށާއި 16 އަހަރުން ދަށް އަދި 19 އަހަރުން ދަށުގެ އުމުރުފުރަ އެވެ.