ދުނިޔޭގެ ފުޓްބޯޅައާ ބެހޭ މައި އިދާރާ (ފީފާ)ގެ އެގްޒެކްޓިވް ކޮމެޓީގެ މެމްބަރުކަމާއި އޭޝިއަން ފުޓްބޯލް ކޮންފެޑެރޭޝަން (އޭއެފްސީ)ގެ ރައީސްކަމުން ގަތަރުގެ މުހައްމަދު ބިން ހައްމާމް އިއްޔެ އިސްތިއުފާ ދެއްވައިފި އެވެ.
ހަމްމާމް ފުރައްވަމުންއާ ދެ މަގާމުން ވެސް އޭނާ އިސްތިއުފާ ދެއްވާފައިވާ އިރު، މިމަހުގެ ނުވަ ވަނަ ދުވަހު ފީފާގެ އެތިކްސް ކޮމެޓީން ވަނީ ހައްމާމްއާ ދެކޮޅަށް އުފުލާފައިވާ ކޮރަޕްޝަންގެ މައްސަލައެއް ވެސް ބަލަން ފަށައިފަ އެވެ.
އިސްތިއުފާ ދެއްވުމަށް ފަހު، ހަމްމާމް ވިދާޅުވީ، ފީފާގެ އެގްޒެކްޓިވް ކޮމެޓީގެ މެމްބަރުކަމާއި އޭއެފްސީގެ ރައީސް ކަމުގެ މަގާމު ފުރައްވަން ފެއްޓެވިތާ ދުވަސް ކޮޅުގެ ތެރޭގައި ތަފާތު ގޮންޖެހުންތަކާ ކުރިމަތިވި ކަމަށާއި އެހެން ނަމަވެސް އެންމެ ފަހު ވަގުތާ ހަމައަށް ވެސް އެ ދެ މަގާމް ފުރުއްވާފައި ވާނީ ވަރަށް ހިތްތިރިކަމާ އެކު ކަމަށެވެ. އަދި މަގާމްތައް ފުރުއްވަމުން އައި ދުވަސްކޮޅު ތެރޭގައި އެކިއެކި ބޮޑެތި މައްސަލަތައް ހައްލު ކުރުމުގައި ގެންގުޅެފައި ވާނީ ވަރަށް އިންސާވެރި ގޮތްގޮތް ކަމަށް އޭނާ ވިދާޅުވި އެވެ.
"އަހަރެންނާ ދެކޮޅަށް ތަފާތު ގޮތްގޮތުން ކޮރަޕްޝަންގެ ތުހުމަތު ކުރިޔަސް އެކަމުގެ ދިފާއުގައި އަހަރެން ވެސް މަސައްކަތް ކުރާނަން. މިއީ އަހަރެން އިސްތިއުފާ ދެއްވަން އެންމެ މަގުބޫލް ވަގުތު. ހަމައެޔާ އެކު އަހަރެން ދެން ވަގުތު ހޭދަ ކުރަން ބޭނުން ވަނީ އާއިލާ އާއި އަހަރެންގެ އަމިއްލަ ވިޔަފާރީގައި." ހަމްމާމް ވިދާޅުވި އެވެ.
ކޮރަޕްޝަންގެ އިނގިލި ހަމްމާމްއާ ދިމާލަށް ދިއްކުރަމުންދާ މިދަނޑިވަޅުގައި އޭނާ މަގާމުން އިސްތިއުފާ ދިނުމުން ފުޓްބޯޅައަށް ލޯބިކުރާ ގިނަ ބައެއްގެ ފާޑުކިޔުންތައް ހަމްމާމް އަށް ވަނީ ރައްދުވާން ފަށައިފަ އެވެ.
ހަމްމާމް އިސްތިއުފާ އިއްޔެ ދިނުމުގެ ކުރިން ވެސް ފީފާ އިން ވަނީ ކޮރަޕްޝަންގެ ތުހުމަތެއްގައި އޭނާ ދެ ފަހަރެއްގެ މަތިން ފުޓްބޯޅައިގެ ހުރިހާ ހަރަކާތްތަކުން ސަސްޕެންޑްކޮށްފަ އެވެ. އެހެން ނަމަވެސް އެ ދެފަހަރު ވެސް އޭނަ ސަސްޕެންޑް ކުރި މައްސަލަ ފީފާ އިން ބާތިލްކޮށް، ކެންސަލް ކުރަން ޖެހުނީ އޭނާގެ މައްޗަށް އެކަން ސާބިތުކުރެވޭ ވަރަށް ހެކި ނެތް ކަމަށް ބުނެ ކޯޓް އޮފް ސީއޭއެސް އިން އެކަން ނިންމުމުންނެވެ.
އޭޝިއަން ފުޓްބޯލް ކޮންފެޑެރޭޝަން (އޭއެފްސީ)ގެ ރައީސްކަމުން ހަމްމާމް އަމިއްލަ ފުޅަށް އިއްޔެ އިސްތިއުފާ ދެއްވާފައިވާ އިރު، މީގެ އެއްމަސް ދުވަސް ކުރިން އޭއެފްސީން ވަނީ އަންނަ އަހަރު އެއިދާރާގެ އިންތިހާބު ބާއްވަން އިއުލާންކޮށްފަ އެވެ. އެހެންނަމަވެސް އިންތިހާބު ބާއްވާނެ ވަކިތާރީހެއް އަދި މުޅިން ފައިނަލްކޮށްފައެއް ނުވެ އެވެ.
date_range
ބުދަ 15 ޖެނުއަރީ 2025