ބޮލީވުޑްގެ މެގަސްޓާރު އަމީތާބް ބައްޗަން އޭނާގެ ސަޕޯޓަރުންނާ ބައްދަލުކުރުމަށް ކޮންމެ އާދީއްތަ ދުވަހަކު ބާއްވާ ޚާއްޞަ ޙަރަކާތް މިފަހަރު ފެނިގެންދިޔައީ އާދަޔާ ޚިލާފު ވަރުގަދަ ސަލާމަތީ ފިޔަވަޅުތަކަކާ އެކުގައެވެ.
މުމްބާއީގައި ހުންނަ އޭނާގެ އަމިއްލަ ގެ "ޖަލްސާ"ގެ ބޭރުގައި އެއްވެ ތިބި އެތައް ސަތޭކަ ފޭނުންނަށް އަމީތާބް އަތް ހޫރާލީ ވަޒަން ނާރާ ގޮތަށް އުސް ޕްލެޓްފޯމެއްގައި ހަރުކޮށްފައިވާ ދެފުށް ފެންނަ ބިއްލޫރިގަނޑެއްގެ ފަހަތުގައި ހުރެގެންނެވެ. ފުލުހުންނާއި ސަލާމަތީ ބާރުތަކުން ފުރިހަމައަށް ފޯރިމަރަމުން ދިޔަ މި ބައްދަލުވުމުގައި، އަމީތާބްގެ ދަރިފުޅު އަދި މަޝްހޫރު އެކްޓަރު އަބީޝެކް ބައްޗަން ވެސް ބައްޕައާ އެކު ބައިވެރިވެފައިވެއެވެ.
އަމީތާބްގެ ސަލާމަތީ ކަންކަން ކުއްލިއަކަށް މިހާ ވަރުގަދަކުރަން މަޖުބޫރުވީ، އޭނާ ދިރިއުޅޭ ގެއަށް އަމާޒުކޮށް ބޮމުގެ ޙަމަލާއެއް ދޭނެ ކަމަށް ބުނެ ފޮނުވި އިންޒާރުގެ އީމެއިލަކާ ގުޅިގެންނެވެ. ބަންދުރާ-ކުރްލާ ކޮމްޕްލެކްސްގެ ސްކޫލަކަށް ފޮނުވި މި އީމެއިލްގައި، މިދިޔަ އޮކްޓޫބަރު މަހުގެ 31 އަދި މި މަހުގެ 27ގައި ޖަލްސާއަށް ޙަމަލާދޭނެ ކަމަށް އިންޒާރުދީފައި ވާއިރު، މަޝްހޫރު ލަވަކިޔުންތެރިޔާ ދިލްޖީތު ދޮސާންޖްގެ ނަން ވެސް ވަނީ އެ މެސެޖުގައި ފާހަގަކޮށްފައެވެ. "ޚާލިސްތާން ނޭޝަނަލް އާމީ"ގެ ނަމުގައި ފޮނުވާފައިވާ މި މެއިލްގެ މައްސަލަ މުމްބާއީ ފުލުހުން މިހާރު ދަނީ ސީރިއަސް މައްސަލައެއްގެ ގޮތުގައި ބަލައި ތަޙުޤީޤު ކުރަމުންނެވެ.
މުމްބާއީގައި ހުންނަ އަމީތާބް ދިރިއުޅޭ ގެ ކައިރިއަށް އިއްޔެ އެއްވި ސަޕޯޓަރުންނާ އެކްޓަރުންނާ ބައްދަލުކުރަނީ.--ފޮޓޯ/އިންޑިއާޓުޑޭމި ނުރައްކާތެރި ސަލާމަތީ މައްސަލަތަކުގެ އިތުރުން، އަމީތާބް ދަނީ ސިއްޙީ ބައެއް އުނދަގޫތަކާ ވެސް ކުރިމަތިލަމުންނެވެ. އެގޮތުން ޑޮކްޓަރުންގެ ލަފާގެ މަތިން ފުރިހަމަ އަރާމު ހޯދުމަށް ޓަކައި، އާންމުކޮށް ޙަރަކާތްތެރިވާ މީސްމީޑިއާގެ މަންސަތަކާ ވަގުތީ ގޮތުން ދުރަށް ޖެހިލަން ނިންމާފައިވާކަން އޭނާ ވަނީ އަމިއްލަ ބްލޮގް މެދުވެރިކޮށް ހާމަކޮށްފައެވެ. އެހެން ނަމަވެސް، މި ހުރިހާ ގޮންޖެހުންތަކާ އެކުވެސް ފަންނީ މަސައްކަތްތައް މެދުނުކަނޑައި، އިންޑިއާގައި ބޮޑު މަޤުބޫލުކަމެއް ހޯދާފައިވާ ކުއިޒް ޝޯ "ކޯން ބަނޭގާ ކްރޯޑްޕަތީ" ހުށަހަޅައިދިނުމުގައި އޭނާ އަދިވެސް އަންނަނީ ފޯރިއާއެކު ހަރަކާތްތެރިވަމުންނެވެ.
އަމީތާބް އެންމެފަހުން ބެލުންތެރިންނަށް ފެނިފައިވަނީ، ތަމަޅަ ސުޕަސްޓާރު ރަޖްނީކާންތާއެކު ކުޅުނު ފިލްމު "ވެއްޓައްޔަން" އަދި ބޮކްސް އޮފީހުގައި ބޮޑު ކާމިޔާބީއެއް ހޯދި ޑައިރެކްޓަރު ނާގް އަޝްވިންގެ ފިލްމު "ކަލްކީ 2898 އޭޑީ"ގެ ރޯލަކުންނެވެ. އިންޑިއާގެ އިތުރުން ބޭރު ޤައުމުތަކުގެ އެތައް ހާސް ބައެއްގެ ހިތުން ޖާގަ ހޯދާފައިވާ އެކްޓަރުގެ ކުރިއަށްހުރި ފިލްމުތަކުގެތެރޭ، "ކަލްކީ 2898 އޭޑީ"ގެ ސީކުއަލް، "ސެކްޝަން 84"، "ދި އިންޓާން" އަދި "ބްރަހްމާސްތުރާ 2" ހިމެނެއެވެ.